رۋحانيات • 07 مامىر، 2021

بورىشىمدى ابىرويمەن وتەسەم دەيمىن

30 رەت كورسەتىلدى

تاۋەلسىز قازاقستاننىڭ ايبىندى ارمياسى قازىرگى تاڭدا قۋاتتى دەڭگەيگە قول جەتكىزدى. الەمنىڭ بەدەلدى اسكەري ساراپشىلارىنىڭ ايتۋىنشا، قازاقستان ارمياسى تمد ەلدەرى اسكەرلەرىنىڭ ىشىندە ءۇشىنشى ورىنعا تۇراقتاعان. ۇلتتىق ارميانىڭ ەڭ جاڭا اسكەري تەحنيكامەن جاراقتانۋى، بىلىكتى اسكەري كادرلارمەن قامتاماسىز ەتىلۋى – وسىنىڭ ايعاعى.

اۋە شابۋىلىنا قارسى قورعانىس كۇشتەرىنىڭ جاۋىنگەرلەرى وزگە قارۋلى كۇشتەر سياقتى جاياۋ شابۋىل جاسامايدى. ولار باسقارۋ جۇيەلەرىنەن مالىمەتتەر الىپ، زەنيتتىك-زىمىراندىق كەشەندەر ارقىلى ۇرىس جۇرگىزەدى. سول سەبەپتى اۋە شابۋىلدارىنا قارسى كۇشتەرىنىڭ ەڭ باستى مىندەتى – بەيبىت جانە سوعىس ۋاقىتىندا ستراتەگيالىق ماڭىزدى اسكەري جانە اكىمشىلىك نىسانداردى اۋە شابۋىلدارىنان قورعاۋ.

بۇگىندە قارۋلى كۇشتەرىمىزدىڭ اراسىندا ەڭ ۇتقىر جانە سونى تەحنيكالىق جاعىنان جابدىقتالعان اۋە قورعانىس كۇشتەرىنىڭ اسكەري جاۋىنگەرلەرى دە وزدەرىنىڭ قول جەتكىزگەن جەتىستىكتەرىمەن ەرەكشەلەنىپ ءجۇر. ولاردىڭ ەلىمىزدىڭ قورعانىس قابىلەتىن نىعايتۋعا قوسقان ۇلەسى وراسان.

ءبىز جاستار – ەگەمەن ەلدىڭ قورعانىمىز. بيىل قاستەرلى تاۋەلسىزدىگىمىزگە وتىز جىل. ەل تاۋەلسىزدىگىن ساقتاپ قالۋ – بۇگىنگى جاستاردىڭ قولىندا. «باتىرلار سوعىستا عانا تانىلادى» دەپ بەكەر ايتىلماعان. باتىر باۋىرجان مومىش ۇلى اتامىزدىڭ «ەشكىم باتىر بولىپ تۋمايدى. باتىرلىق تا مىنەز سەكىلدى وسكەن ورتا، كورگەن تاربيەگە بايلانىس­تى قالىپتاسادى» دەگەن ءسوزى بار. وسى ءسوزدىڭ استارىنا ۇڭىلسەڭ، كوپ نارسەنى اڭعاراسىڭ. بەيبىت زاماندا دا ناعىز ەرلىك پەن باتىرلىق جاسالادى. ءومىر مەن ءولىم قاتار كەلگەن قاس-قاعىم ساتتە ءاربىر ادامنىڭ بويىندا بولاتىن قورقىنىشتى جەڭىپ، جانكەشتى ارەكەتتەرگە بارعان تالاي ەرجۇرەك ازاماتتار ەلىمىزدە جەتەرلىك.

ءبىر كەزدەرى ءبىزدىڭ اكە، اتالارىمىز، اعا بۋىن ازاماتتىق بورىشتارىن جات جەردە وتەدى. ال ءبىز، جاستار باقىتتىمىز. سەبەبى كىندىك قانىمىز تامعان تۋعان جەردىڭ توپىراعىندا ءجۇرىپ، ءوز ەلىمىزدە، بەيبىت ومىردە وتان الدىنداعى بورىشىمىزدى اتقارىپ كەلەمىز. سول سەبەپتى كەلەشەك ۇرپاق اسكەري مىندەتىن وتەۋدەن جاسقانباۋى قاجەت. ويتكەنى تۇسىنە بىلگەن جانعا وتاندى قورعاۋ – ابىرويلى مىندەت.

مەن جامبىل وبلىسىنىڭ شۋ قالاسىندا دۇنيەگە كەلگەنمىن. اقىل توقتاتقاننان باستاپ بولاشاعىمدى اسكەري سالامەن بايلانىستىرۋدى قالادىم. بۇل – مەنىڭ جۇرەك قالاۋىممەن جاسالعان تاڭداۋىم، بالالىق ارمانىم ەدى. قازىر ءىنىم دە الماتى وبلىسىندا وتان الدىنداعى بورىشىن وتەپ ءجۇر. شاڭىراعىمىزدىڭ بەرەكەسى بولىپ وتىرعان انام مەن اپكەم سول ەكى ۇلدىڭ – ەل قورعانىندا جۇرگەن قوس جاۋىنگەردىڭ تىلەكشىسى.

 

ءسۇنيات سوۆەت،

قورعانىس مينيسترلىگى 44813-اسكەري ءبولىمىنىڭ اسكەري قىزمەتشىسى

 

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار