كوڭىلدى ەلىتكەن قازاقستان جانە رەسەي سۋرەتشىلەر وداعىنىڭ مۇشەسى, UNESCO, «شابىت» حالىقارالىق فەستيۆالىنىڭ لاۋرەاتى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى «بەينەلەۋ جانە ديزاين» فاكۋلتەتىنىڭ دوتسەنتى كاميلا جاپالوۆانىڭ ء«ومىر ورنەك» اتتى كورمەسى. تاۋەلسىزدىگىمىزدىڭ 30 جىلدىعىنا ارنالعان ءىس-شارا وقىرماندى ەلەڭ ەتكىزدى. ۇلتتىق مۋزەيدە توپتاسقان قالىڭ قاراشانىڭ قىلقالام شەبەرىنە دەگەن قوشەمەتى بولەك بولدى. جاھاندىق ىندەتتىڭ سالدارىنان كوپتەن بەرى مۇنداي عاجاپ تۋىندىلاردى كورمەگەن حالىقتىڭ ونەرگە دەگەن ساعىنىشىن سول كەشتە سەزدىك.
اتالعان كورمەنىڭ العاشقى ءسوزىن ۇلتتىق مۋزەي ديرەكتورىنىڭ ورىنباسارى اباي ساتىبالدين الدى.
«ۇلتتىق ناقىشتا بەينەلەنگەن باتيك ونەرىندە ەرەكشە قولتاڭباسى بار كاميلا جاپالوۆانىڭ سۇلۋلىق الەمى, قۇدىرەتتى قىلقالام ارقىلى دۇنيە ءجۇزىن تاڭعالدىرعان ەڭبەكتەرى مۋزەي قوناقتارىنىڭ جۇرەگىنەن دە ەرەكشە ورىن الاتىنىنا نىق سەنىمدىمىن», دەدى ا.ساتىبالدين.
ىزگى تىلەكتەن كەيىن ونەر يەسىنە ارنايى العىس حات پەن توسبەلگى تابىستالدى. سونىمەن بىرگە ەلورداداعى سۋرەتشىلەر وداعىنىڭ توراعاسى ءومىرالى يسمايلوۆ تا اسەرىمەن ءبولىستى.
وسىناۋ ەرەكشە قولونەرى ارقىلى قازاقتىڭ ۇلتتىق مادەنيەتىن, سالت-ءداستۇرىن ناسيحاتتاپ كەلە جاتقان كاميلا ابەنقىزىنىڭ قايتالانباس تۋىندىلارى سونىڭ ايعاعى», دەدى ءو.يسمايلوۆ. ودان ءارى رۋحاني كەشكە ارنايى كەلگەن مەملەكەت جانە قوعام قايراتكەرلەرى اق تىلەكتى جالعاپ, سۋرەتشىنىڭ شىعارماشىلىعىن جوعارى باعالادى.
كاميلا جاپالوۆا كارتينالارىنىڭ وزىندىك سيپاتى مەن ەرەكشە ءستيلى بار. كارتينالاردىڭ سيۋجەتتەرى ءارتۇرلى, كوبىنە فولكلورلىق ناقىشتا جانە ليريكالىق ابستراكتسيادا قۇرىلعان. بىراق بارلىعىن بىرىكتىرەتىن ەلەمەنتتەر – ۇلتتىق رەڭك پەن كومپوزيتسيانىڭ ىشكى ىرعاعى.
اۆتور باتيك تەحنيكاسىن قولدانا وتىرىپ ەرەكشە ونەر تۋىندىلارىن دۇنيەگە اكەلگەن. كەنەپ بەتىندە دە باتيك ءداستۇرىن قولدانادى. شىنىندا ول باتيك تەحنيكاسىندا 20 جىلدان استام جۇمىس ىستەپ كەلەدى ەكەن. قانشا ۋاقىت وتسە دە بۇدان شىعارماشىلىق ءلاززات الاتىنىن جاسىرمايدى.
سۋرەتشىنىڭ تۋىندىلارىنان ىستىق باتيكتىڭ «كراكلە» سياقتى ءداستۇرلى تاسىلدەرىن قولداناتىنى, تۇستەردى ءمىنسىز ءارى ءدال تاڭداي بىلەتىنى بايقالادى. تاباندىلىق پەن قاجىرلى ەڭبەگىنىڭ, ىزدەنىسىنىڭ ارقاسىندا بۇگىندە كوپتەگەن ماراپات پەن اتاققا يە بولعان.
ايتا كەتەيىك, سۋرەتشىنىڭ قورجىنىندا ۇلتتىق كيىم ۇلگىلەرى دە بار. كورمەگە سۋرەتشىنىڭ كەسكىندەمە جانە باتيك ۇلگىسىندەگى 100-دەن استام تۋىندىسى ۇسىنىلدى ءارى اۆتورلىق ۇلتتىق كيىمدەردىڭ ءسان ۇلگىسى دە كورسەتىلدى.
جاسامپاز ونەر يەسىنىڭ شىعارماشىلىعىن وركەندەتۋ ارقىلى جالپى سۋرەتشىلەردىڭ مارتەبەسىن كوتەرۋدى كوزدەگەن ۇيىمداستىرۋشىلاردىڭ سوزىنە سۇيەنسەك, الداعى ۋاقىتتا اتاۋلى كورمەدەگى باتيك ونەرىنىڭ ەرەكشە تۋىندىلارىن ەلوردا تۇرعىندارى مەن قوناقتارى ءبىر اي بويى تاماشالاي الادى.
