ونلاين دۇكەندەردىڭ ايى وڭىنان تۋىپ, ءىت-جوبالاردىڭ جولى بولعانى دا وسى شاق. شىنىندا دا, بۇل كەزەڭدە توتەنشە جاعدايدى ءتيىمدى مۇمكىندىككە اينالدىرا بىلگەندەردىڭ ۇپايى تۇگەل بولدى. تastamat-تى جاساعان توپتى دا وسى قاتارعا جاتقىزۋعا بولادى.
Tastamat دەپ وتىرعانىمىز – «قازپوشتا» كومپانياسىنا تيەسىلى پوستاماتتىڭ وتاندىق بالاماسى. ياعني, سالەمدەمەلەردى جەدەل ءارى ءتيىمدى جەتكىزۋگە ارنالعان تەرمينال. اتاۋى قازاقتىڭ «تاستا», «قالدىر» دەگەن سوزىنەن الىنعانى ايتپاسا دا تۇسىنىكتى. ونلاين-دۇكەندەردىڭ وڭ جامباسىنا كەلەتىن بۇل تەرمينالدى ءوزىمىزدىڭ جىگىتتەر ويلاپ تاپقان. ويلاپ تاپتى دەگەندە, پوستاماتتىڭ نەگىزىندە جاساپ شىققان. بۇل 2018 جىل بولاتىن.
– سول جىلدارى پوستاماتتىڭ باعاسى تىم قىمبات ەدى. ونىڭ بىرەۋى 10 مىڭ دوللار تۇراتىن. ءبىز وسى تەرمينالدىڭ وتاندىق ءتۇرىن جاساپ كورگىمىز كەلدى. تەرمينالدىڭ ەسكيزىن ءوزىمىز دايىندادىق. ءسويتىپ, ىشكى نارىقتان قۇرىلعىنى ىستەي الادى-اۋ دەگەن كومپانيالارعا ىزدەۋ سالدىق. تەمىردەن ءتۇرلى دۇنيەلەر جاسايتىن الماتىلىق كومپانياعا كوڭىلىمىز اۋدى. ولار ءبىر تەرمينالدى دايىنداۋعا 1 مىڭ دوللار جۇمسايدى ەكەن. بىزگە دە كەرەگى وسى. بىردەن كەلىستىك. Tastamat-تىڭ قاڭقاسىنان بولەك, ىشىندەگى باعدارلامالىق جۇيەسىن جاساۋ قاجەت. مۇنى دا ءوزىمىزدىڭ جىگىتتەر ازىرلەدى. وسىلايشا, QR-كود ارقىلى جاشىكتەردى اشىپ-جابۋ قىزمەتى دايىن بولدى, – دەيدى Tastamat كومپانياسىنىڭ باس ديرەكتورى ءارى تەڭ قۇرىلتايشىسى الىشەر قوعاباي.
Tastamat-تى ويلاپ تاپقاندار – تيمۋر ءجۇنىسوۆ جانە دانيار اسانوۆ ەسىمدى جىگىتتەر. ال يدەيانى ءساتتى جۇزەگە اسىرعان توپتىڭ قاتارىندا بۇلاردان بولەك تاعى بىرنەشە جىگىت بار. ۇركەردەي توپتىڭ تىڭ تابىسى BI-Group قۇرىلىس كومپانياسىنىڭ باسشىلىعىنا ۇنايدى.
– وسىلايشا, ءبىز BI-Group-پەن بىرلەسىپ كومپانيا سالعان تۇرعىن ءۇي كەشەندەرىن tastamat-پەن قامتاماسىز ەتە باستادىق. BI-Group ءوز تۇرعىندارىنا tastamat-تىڭ كومەگىمەن ءتيىمدى قىزمەت ۇسىنعاندى ءجون كوردى. ءسويتىپ, كومپانيانىڭ ۇيلەرىنە 30 تەرمينال ورناتتىق. كەيىن جوبانى كوممەرتسيالاندىرۋدى قولعا الدىق. 2019 جىلى تاعى 170 تەرمينال جاساپ, اۋەلى نۇر-سۇلتان مەن الماتىعا, كەيىن تاعى جەتى قالاعا ورناتتىق. قازىر ءبىزدىڭ تەرمينالداردى ەلىمىزدىڭ توعىز قالاسىنان كەزدەستىرۋگە بولادى, – دەيدى ءا.قوعاباي.
دەرەكتەرگە سۇيەنسەك, 2018 جىلدان بەرى tastamat ارقىلى 150 مىڭنان استام سالەمدەمە ءوز يەسىنە تاپسىرىلعان. جوبانى تۇراقتى تۇردە پايدالاناتىن 29 سەرىكتەس كومپانيا بار. ولاردىڭ ىشىندە «قازپوشتا», AliExpress, «الەم-تات», flip.kz, ەمەح, IHERB, Poni Express, Boxberry, AVON, Oriflame, بيوسفەرا, OZON, SATU, Leroy Merlin سەكىلدى كۋرەرلىك قىزمەتتى قاجەت ەتەتىن بەلگىلى كومپانيالار مەن دۇكەندەردى اتاپ وتۋگە بولادى. سونىمەن قاتار ۇلتتىق پوشتا وپەراتورى – «قازپوشتا» كومپانياسىمەن tastamat-تاردى پايدالانۋ تۋرالى شارت جاسالعان. ءسويتىپ, جوبا پوشتالىق ەسەپكە الۋ جۇيەسىنە ەنگىزىلدى. بۇل ونى «قازپوشتا» دا, ونىڭ كليەنتتەرى دە پايدالانا الادى دەگەن ءسوز.
جوبانى جۇزەگە اسىرۋداعى تۇپكى ماقسات سالەمدەمەنى جونەلتۋ مەن جەتكىزۋ پروتسەسىن جەڭىلدەتۋ ەكەنى انىق. اسىرەسە, 2020 جىلدىڭ ناۋرىزىندا باستالعان پاندەميا كەزىندە tastamat-قا دەگەن قاجەتتىلىك كۇرت وسكەن.
– پاندەميا باستالعان باستاپقى ءبىر ايدا جۇمىس ونبەدى. بۇعان بيزنەسكە قويىلعان شەكتەۋ شارالارى كەدەرگى كەلتىردى. كەيىن وتاندىق بيزنەس ورىن العان جاعدايعا يكەمدەلە باستادى دا, ءبىز ۇسىنىپ وتىرعان قىزمەتكە سۇرانىس ارتتى. سەرىكتەس كومپانيالار دا كوبەيدى. راسىندا دا, tastamat سالەمدەمەنى ادامداردىڭ ءبىر-بىرىمەن قارىم-قاتىناس جاساماي-اق الۋىنا مۇمكىندىك بەردى. سونداي-اق كۋرەردى كۇتىپ, ونىمەن كەزدەسەتىن ۋاقىتتى جوسپارلاۋدىڭ قاجەتى بولماي قالدى. سوندىقتان ءبىز قوعامعا قاجەتتى جوبانى ۇسىنا الدىق دەپ ويلايمىز, – دەيدى Tastamat كومپانياسىنىڭ باس ديرەكتورى.
Tastamat قالاي جۇمىس ىستەيدى؟ الىشەر قوعابايدىڭ ايتۋىنشا, الگوريتمى – قاراپايىم. كليەنتتىڭ تەلەفون نومىرىنە سالەمدەمەنىڭ tastamat-قا سالىنعانى تۋرالى حابارلاما تۇسەدى. ونى الىپ كەتۋگە ەكى كۇن بەرىلەدى. كليەنت وسى ارالىقتا الىپ ۇلگەرمەسە, سالەمدەمەنى كۋرەرلىك كومپانيا كەرى الىپ قايتادى. الۋشىعا حابارلامامەن بىرگە ارنايى سىلتەمە دە جولدانادى. بۇل – تەرمينالدىڭ «كىلتى». سىلتەمەگە ءوتىپ, QR-كودتى سكانەرلەگەن كەزدە جاشىك اشىلادى. ەگەر كليەنتتىڭ قولىندا كامەراسى جوق قاراپايىم تەلەفون بولسا, وندا تەرمينالعا جابىستىرىلعان QR-كودتىڭ استىنداعى ءنومىردى sms-حابارلامامەن كەرى جىبەرۋ قاجەت. سوندا جۇيە اۆتوماتتى تۇردە جاشىكتى اشىپ بەرەدى.
– ازىرشە tastamat-تى سەرىكتەس كومپانيالار عانا پايدالانا الادى. ويتكەنى, ولارمەن شارت جاسالىپ, تەرمينالدى قولدانۋعا رەسمي رۇقسات بەرىلگەن. قاراپايىم ادامداردىڭ دا پايدالانۋىنا مۇمكىندىك جاسالعان. بىراق ول ءۇشىن ۇيالى تەلەفونعا Tastamat ءموبيلدى قوسىمشاسىن جۇكتەپ الۋ كەرەك. بۇل نەگىزىنەن شاعىن جانە ميكرو بيزنەسپەن اينالىساتىندار ءۇشىن ءتيىمدى جانە بۇعان اقى تولەۋدىڭ قاجەتى جوق. ءبىر رەت تىركەلگەن سوڭ, تاپسىرىستاردى ورىنداي بەرۋگە بولادى, – دەيدى ول.
Tastamat كولەمى ءارتۇرلى 24 جاشىكتەن تۇرادى. ونىڭ تورتەۋى ۇلكەن كولەمدەگى جۇكتەرگە ارنالعان. سالەمدەمەنىڭ جۇگى 15 كيلودان اسپاۋى كەرەك. ءبىر سالەمدەمەنىڭ قۇنى – 200 تەڭگە. ال كليەنت سەرىكتەس كومپانيالاردان تاۋار ساتىپ العاندا, tastamat قىزمەتى تەگىن ۇسىنىلادى. بۇدان بولەك ءتۇرلى جەڭىلدىكتەر مەن بونۋستار دا قاراستىرىلعان.
تەرمينالدار بارىنشا قاداعالانادى. جۇيەگە ءتۇرلى داتچيكتەر ورناتىلعان. ەگەر جاشىكتى كۇشتەپ اشىپ جاتسا, بىردەن جۇيەگە سيگنال تۇسەدى ءارى سول جەردە دابىل قاعىلادى. بۇدان بولەك, ءاربىر تەرمينالدىڭ ءوز بەينەكامەراسى بار. بۇگىنگە دەيىن tastamat-تارعا قاتىستى ەكى-ءۇش قۇقىق بۇزۋشىلىق تىركەلگەنىن دە اتاپ وتكەن ءجون.
جالپى, تەرمينالدى ازىرلەۋ بارىسىندا تۇركيا, پولشا سەكىلدى ەۋروپا ەلدەرىنىڭ تاجىريبەسى نازارعا الىنعان.
– ءبىز ءبىرىنشى كەزەكتە ءونىمنىڭ باعاسى قولجەتىمدى بولسا دەدىك. بىراق شەتەلدىك تەرمينالداردىڭ قۇنى قىمبات. ونى جاساتۋدان بولەك, جەتكىزۋ شىعىنى بار. قىرۋار قارجى جۇمسالاتىندىقتان, وزىمىزدە جاساۋدى ءجون كوردىك. الداعى جوسپارىمىز – tastamat تەرمينالدارىنىڭ سانىن 1 مىڭعا جەتكىزۋ. بىزگە قىزمەت كورسەتىپ وتىرعان كومپانيانىڭ بۇعان مۇمكىندىگى جەتەدى. بۇدان بولەك, قاراعاندى مەن نۇر-سۇلتان قالالارىنان تاعى ەكى كومپانيانى قاراستىرىپ قويدىق. تەرمينالدى وتە ارزان باعاعا جاساي الاتىن قىتايلىق كومپانيا دا تابىلدى. الايدا ءبىز وتاندىق وندىرىسكە باسا ءمان بەرەمىز. ويتكەنى, tastamat-تىڭ ءوزى – تازا وتاندىق ءونىم, – دەيدى الىشەر قوعاباي.
سونىمەن قاتار كومپانيانىڭ نەگىزگى جوسپارلارىنىڭ قاتارىندا تاپسىرىستاردى ۇلەستىرەتىن 500-دەي پۋنكت اشۋ مىندەتى تۇر. فرانچايزينگ مودەلى نەگىزىندە tastamat-تىڭ جۇيەسىن شاعىن جانە ميكرو بيزنەسكە ۇسىنۋعا دا دايىن. مۇنداي قادام كەز كەلگەن تاراپ ءۇشىن ءتيىمدى كورىنەدى.
– پاندەميا كەزىندە ءبىراز يدەيا تۋىندادى. ماسەلەن, ءبىزدىڭ كومپانيانىڭ ءوز كۋرەرلەرى پايدا بولدى. بۇگىندە نۇر-سۇلتان مەن الماتى قالالارىندا كۋرەرلەرىمىز جۇمىس ىستەيدى. تاعى بىرنەشە يدەيامىزدى جۇزەگە اسىرساق دەيمىز. ماسەلەن, «Tastamat-تان tastamat-قا» قىزمەتىن ۇسىنۋدى كوزدەپ وتىرمىز. ماسەلەن, ءبىر زاتتى قالانىڭ اناۋ شەتىندەگى مەكەنجايعا جەتكىزۋ كەرەك. كۋرەرمەن سالىپ جىبەرسە, ورتاشا ەسەپپەن 1 مىڭ تەڭگەدەن استام قارجى جۇمسالادى. ال ءتيىمدى جول – tastamat. ياعني سالەمدەنى وزىڭىزگە جاقىن تەرمينالعا قالدىراسىز دا, بىزگە ونى قايدا جەتكىزۋ كەرەكتىگى تۋرالى ءوتىنىم قالدىراسىز. Tastamat-تىڭ كۋرەرلەرى سالەمدەمەنى الىپ, ءسىز كورسەتكەن مەكەنجايعا جاقىن ورنالاسقان تەرمينالعا اپارىپ سالادى. بۇل ءۇشىن تولەنەتىن اقى اسا كوپ تە ەمەس, – دەيدى كومپانيانىڭ باس ديرەكتورى.
كومپانيا Astana Hub حالىقارالىق ءىت-ستارتاپتار تەحنوپاركىندە ورنالاسقان. ستارتاپ جوبا بولعاندىقتان, تەحنوپاركتىڭ جەڭىلدىكتەرىن بارىنشا پايدالانۋدا. ماسەلەن, قازىرگى كۇنگە دەيىن كومپانياعا سالىقتىق جەڭىلدىكتەر جاسالىپ كەلەدى. مۇندا ازىرشە 15 ادام جۇمىس ىستەيدى.
ەل ۇكىمەتى ەرەكشە باسىمدىق بەرىپ وتىرعان ەلەكتروندى ساۋدانى جاڭا دەڭگەيگە شىعارۋعا ۇمتىلعان جىگىتتەردىڭ جوباسى قولداۋعا لايىق.
