قازاقستاندا مامىر ايىندا جازعى اتموسفەرالىق پروتسەستەرگە اۋىسىپ, ەلىمىزدىڭ سولتۇستىگى مەن وڭتۇستىك, وڭتۇستىك-شىعىسىنداعى تاۋلى, تاۋ ماڭىنداعى ايماقتاردا جاۋىن-شاشىن كوبەيەدى. مامىر ايىندا كۇن جىلىنعان سوڭ, قايتا سالقىن ءتۇسۋى ىقتيمال.
«كوپجىلدىق مالىمەت بويىنشا, وڭتۇستىك ايماقتاردا سۋىق كۇندەر مامىردىڭ ءبىرىنشى جارتىسىندا, ال سولتۇستىكتە – ايدىڭ سوڭىندا اياقتالادى. بىراق كەي جىلدارى وڭتۇستىك ايماقتاردا ىزعارلى سالقىن كۇندەر مامىردىڭ سوڭىندا دا, ال سولتۇستىك جانە شىعىستا ءتىپتى ماۋسىمدا دا بولۋى ابدەن مۇمكىن», دەلىنگەن بولجامدا.
3 مامىردان باستاپ ەلىمىزدىڭ كوپتەگەن بولىگىندە ازداعان بۇلتتى كۇن رايى, تەمپەراتۋرانىڭ جوعارىلاۋى بولجانىپ وتىر. ءبىرىنشى ونكۇندىكتىڭ ورتاسىندا رەسپۋبليكانىڭ كەي اۋماقتارىندا نايزاعايلى جاڭبىر جاۋىپ, ەكپىندى جەل سوعادى. ءبىرىنشى ونكۇندىكتىڭ سوڭىندا قازاقستاننىڭ كوپ بولىگىنە باتىس انتيتسيكلونى اسەر ەتىپ, تەمپەراتۋرانىڭ 5-10 گرادۋسقا دەيىن تومەندەۋى ىقتيمال. سولتۇستىكتە تۇندە 3 گرادۋسقا دەيىن ۇسىك ءجۇرۋى مۇمكىن.
«بولجامعا سايكەس, ايدىڭ ەكىنشى ونكۇندىگىندە دە سالقىن كۇندەر كەلەدى. ەلىمىزدىڭ سولتۇستىك جارتىسىندا اۋانىڭ تەمپەراتۋراسى 5 گرادۋس سۋىقتى كورسەتۋى مۇمكىن, كۇندىز 10-15 گرادۋس جىلى بولادى, ال وڭتۇستىكتە تۇندە +3+10 گرادۋس, كۇندىز +12+20 گرادۋس جىلى بولادى.
ايدىڭ ەكىنشى جانە ءۇشىنشى ونكۇندىكتەرىندە كۇن جىلىنىپ, سولتۇستىك ايماقتاردا ناعىز جازعى ىستىق كۇن رايى كەلەدى, كۇندىز كۇن +25+33 گرادۋسقا دەيىن, ال وڭتۇستىكتە - +30+38 گرادۋسقا دەيىن ىسيدى», دەيدى سينوپتيكتەر.
ماماندار ءبىر ايعا ارنالعان اۋا رايى بولجامىن كونسۋلتاۆتىك بولجام رەتىندە قابىلداپ, ونىڭ كەيىننەن سينوپتيكالىق جاعدايدىڭ وزگەرۋىنە قاراي تۇزەتىلۋى مۇمكىن ەكەنىن اتاپ ءوتتى.
