بيىل اۆتوموبيل جولدارىنىڭ قۇرىلىس-جوندەۋ جۇمىستارىمەن 400-گە جۋىق نىسان جانە 1250 شاقىرىم جولدار مەن ەلدى مەكەن كوشەلەرى قامتىلادى. 780 شاقىرىمنان استام جولدى بيىل پايدالانۋعا بەرۋ جوسپارلانۋدا. جىل قورىتىندىسىمەن وبلىستىق جانە اۋداندىق ماڭىزى بار اۆتوموبيل جولدارىنىڭ جاقسى جانە قاناعاتتى جاعدايداعى ۇلەسىن 79%-دان 81,4%-عا دەيىن ارتتىرۋ كوزدەلۋدە. ماجىلىستە وبلىس اكىمى جول ساپاسىن ارتتىرۋعا قاتىستى بىرقاتار تاپسىرمالار بەردى. جىل سايىن جولداردى جوندەۋگە جۇمسالاتىن قارجىنىڭ تۇراقتى ءبولىنۋىن جانە كۇتىپ ۇستاۋعا جەتكىلىكتى قارجى قاراۋدى تاپسىردى. سونداي-اق جوندەۋدەن وتكەن جولداردى مەرزىمىنەن بۇرىن بۇزىلۋىن بولدىرماۋ ءۇشىن اۋىر سالماقتى جۇك كولىكتەرىنىڭ قوزعالىسىن رەتتەۋ جۇكتەلدى. وبلىس ءۇشىن ماڭىزدى شىمكەنت, تۇركىستان, سارىاعاش اينالما جولدارىنىڭ قۇرىلىسىن باستاۋ بويىنشا يندۋستريا جانە ينفراقۇرىلىمدىق دامۋ مينيسترلىگىمەن ءتيىستى جۇمىستار جۇرگىزۋ قاجەتتىگى ايتىلدى.
ايتا كەتەلىك, تۇركىستان وبلىسىنداعى جولداردىڭ جالپى ۇزىندىعى 18 مىڭ شاقىرىمدى قۇرايدى. وتكەن جىلى اتقارىلعان جۇمىستاردىڭ ناتيجەسىندە وبلىستىق جانە اۋداندىق ماڭىزى بار اۆتوموبيل جولدارىنىڭ جاقسى جانە قاناعاتتانارلىق جاعدايداعى ۇلەسى 74,1%-دان 79%-عا جەتتى. قۇرىلىس-مونتاجداۋ جۇمىستارىن اتقارۋ كەزىندە كەمشىلىكتەرگە جول بەرگەنى ءۇشىن مەردىگەر, تەحنيكالىق جانە اۆتورلىق قاداعالاۋشى مەكەمەلەرگە ايىپپۇلدار سالىندى. ەسكەرتۋلەر بەرىلىپ, 58 مىڭ شارشى مەتردەن استام اسفالت جامىلعىسى, 6,2 شاقىرىم جول نەگىزى بۇزىلىپ, قايتا سالىندى. «ساپالى جول-ادالدىق الاڭى» جوباسى اياسىندا انىقتالعان بارلىق اقاۋلار قالپىنا كەلتىرىلدى.
