كوروناۆيرۋس • 27 ءساۋىر، 2021

ۆاكتسينا ادامزاتتى بىرىكتىرەدى

38 رەت كورسەتىلدى

دسۇ شەشىمىمەن  24-30 ءساۋىر ارالىعىندا دۇنيەجۇزىلىك يممۋنيزاتسيا اپتالىعى وتكىزىلىپ جاتىر. «ۆاكتسينا ادامزاتتى بىرىكتىرەدى» دەگەن ۇراندى تۋ ەتكەن اپتالىقتىڭ ماڭىزدىلىعى COVID-19-دىڭ الەمدى شىرماۋىنان بوساتپاي تۇرعان تۇسىندا ودان ءارى ايقىندالا تۇسەدى.

ادامزات دامۋىنىڭ سوڭعى 200 جىلىندا ۆاكتسيناتسيا ءتۇرلى جۇقپالى اۋرۋدىڭ الدىن الىپ، ءبىر كەزدەرى حالىقتى قىناداي قىرعان وبا، شەشەك سىندى ىندەتتەردى كەلمەسكە جىبەرگەن. سودان بەرى بۇل سالا ۇنەمى ىزدەنىس ۇستىندە، ۇنەمى اۋرۋعا قارسى  ەكپە جاساۋدا العا قاراي جىلجۋمەن كەلەدى. وتكەن عاسىردا قىزىلشاعا، پوليوميەليتكە، ديفتەريا ت.ب. اۋرۋلارعا ەكپە ەگۋ ەنگىزىلگەنشە قانشاما ءسابي كوكتەي سولدى دەسەڭىزشى. سوڭعى 30 جىلدىڭ ىشىندە عانا بالالار ءولىمىنىڭ دۇنيەجۇزىندە 50 پايىزعا ازايۋىنىڭ ارتىندا ۆاكتسيناتسيالاۋدىڭ وڭ اسەرى بارلىعى انىق. بۇگىندە ەكپە ارقىلى ادام بالاسى 20-عا تارتا ءتۇرلى جۇقپالى اۋرۋدىڭ الدىن الادى. ونىڭ ىشىندە پنەۆمونيا، راك، ەبولا دەرتى سىندى كۇردەلى اۋرۋلار دا بار. سالاداعى عالىمداردىڭ ىزدەنىسى كۇنى كەشە اسا قاۋىپتى سانالاتىن جاتىر مويىنى قاتەرلى ىسىگىنىڭ الدىن الۋعا بولاتىنىن كورسەتتى. بۇگىندە الەمنىڭ كوپتەگەن ەلدەرى ءجاسوسپىرىم قىزداردى، كەيبىر ەلدەردە ۇلداردى دا ونى تۋدىراتىن پاپيللوما ۆيرۋسىنا قارسى ەگۋدى جۇرگىزۋدە.  

ءبىزدىڭ ەلىمىزدە ۆاكتسيناتسيا جاساۋ بالا دۇنيە ەسىگىن اشقاننان باستاپ تەگىن كورسەتىلەدى. ال كوپتەگەن مەملەكەتتەردە وعان قولجەتكىزۋ وڭاي ەمەس. مەملەكەتتىڭ ساتىپ الىپ تۇرعىندارىنا تەگىن سالۋعا مۇمكىندىگى جوقتىعىنان مۇنداي ەلدەردە ونى قالتاسى كوتەرەتىن بايلار عانا جاساتادى. سونىڭ سالدارىنان كەدەي مەملەكەتتەردىڭ حالقىن تەگىن ۆاكتسيناتسيادان جۇيەلى تۇردە وتكىزۋى قۇر قيال، بوس ارمان رەتىندە قالىپ وتىر.

جاڭا زاماندا، الەمدى پاندەميا قۇرساپ تۇرعاندا ۆاكتسيناتسيالاۋ تاقىرىبى كۇن تارتىبىندە الدىڭعى قاتارعا شىققان. ادامزات بالاسى COVID-19 –عا قارسى كۇرەسكە جۇمىلعاندا الەمدەگى الدىڭعى قاتارلى وزىق ويلى عالىمدار وعان قارسى ۆاكتسينانىڭ سان ءتۇرىن جاساۋعا كىرىستى. بۇگىندە ونىڭ قاراپايىم ەكپە تۇرلەرىمەن قاتار، مۇرىنعا تامىزاتىن تامشى، سپرەي تۇرىندەگى، ءتىپتى ايران، يوگۋرت تارىزدىلەرىن دە شىعارۋ قولعا الىنۋدا. اقپارات الماسىپ، ءتاج ىلمەگىن زالالسىزداندىرۋ جەر شارىنداعى عالىمدار تۇگىل پلانەتا تۇرعىندارىن بىرىكتىرىپ جىبەرگەندەي. ءوزىمىزدى جانە جاقىندارىمىزدى قايتسەك ساقتايمىز دەپ كوپتەگەن دۇنيەلەردەن – كوڭىلدى باسقوسۋلاردان، اعايىن-تۋىسپەن ارالاسۋدان شەكتەلدىك، كينو، تەاتر، ويىن-ساۋىق ورتالىعىنان قاشىق جۇرەتىن بولدىق، كەزدەسكەندە قۇشاقتاسىپ امانداۋدان تارتىنامىز، جينالا قالىپ مەيرامحانا، دامحانالارعا بارىپ اس ءىشۋدى دە ۇمىتا باستاعاندايمىز. ۆاكتسيناتسيادان ءوتۋ بىزدەردى بۇرىنعى قالىپتى تىرشىلىككە ورالۋىمىزعا جول اشادى. ارنايى ەكپە الىپ، COVID-19-عا انتيدەنە ءتۇزىلدىرىپ، سونىڭ ارقاسىندا قوعامدىق يممۋنيتەتكە دە جەتەتىن كۇن جاقىنداپ كەلەدى.

دۇنيەجۇزىلىك دەنساۋلىق ساقتاۋ ۇيىمى پاندەميا بىرىكتىرگەن ادامزات بالاسى تەك كەشەگى مەن بۇگىنگى جۇقپالى اۋرۋلارعا عانا ەمەس بولاشاقتا دا ىقتيمال قاتەرلەرگە قارسى قالاي بىرىگىپ، جۇمىلۋدىڭ قانشالىقتى پايدالى بولاتىنىن كورسەتۋدە دەپ اپتالىققا ءمان بەرىپ وتىر. بۇل رەتتە حالقىمىزدىڭ «جۇمىلا كوتەرگەن جۇك جەڭىل» دەيتىن دانالىعى دا ەسكە تۇسەدى. ادامزات پاندەميامەن جۇمىلا كۇرەسۋدە. شىنىندا دا ۆاكتسيناتسيا بىرىكتىرە تۇسكەندەي.

سوڭعى جاڭالىقتار

شەرحان مۇرتازانىڭ ءۇيى

ادەبيەت • كەشە

«جاسىل» ايماقتا ەكى ءوڭىر

كوروناۆيرۋس • كەشە

بۇگىن - انالار كۇنى

قازاقستان • كەشە

الماتىدا تەگىن ءدارى-دارمەك قاتارى ارتتى

مەديتسينا • 18 قىركۇيەك، 2021

الەمدە ەپيداحۋال قانداي؟

الەم • 18 قىركۇيەك، 2021

توكيو مارافونى 2022 جىلعا شەگەرىلدى

سپورت • 18 قىركۇيەك، 2021

الماتىدا تاۋ بوكتەرى ورتەنىپ جاتىر

ايماقتار • 18 قىركۇيەك، 2021

ۇقساس جاڭالىقتار