الەۋمەتتىك جەلىلەردىڭ بىرىندە تسەنترالنىي, زاتونسكي جانە اۋەزوۆ اۋدانى پوليتسيا بولىمدەرىنىڭ باسشىلارىنا رەيدتى كۇشەيتۋ جانە شەكتەۋ شارالارىن بۇزعانداردى ىزدەستىرۋ تۋرالى بۇيرىق بەرىلگەن اۋديوجازبا تارادى. سونداي-اق لاۋازىمدى تۇلعا قىزمەتكەرلەرىنە ناقتى مەرزىم قويعان, اۋديوجازباداعى سوزىنە قاراساق, تۇسكى 16:30-عا دەيىن كوپ زاڭبۇزۋشى تاۋىپ, ايىپپۇلدى كوبىرەك وندىرىڭدەر دەپ تاپسىرعان.
«قازىر بارلىعى دەرەۋ ۋچاسكەلىك پوليتسەيلەردى الىپ اۋماققا شىقسىن, 16:30-عا دەيىن كارانتين شارالارىن بۇزعانداردى انىقتاۋ كەرەك, شۇعىل تارتىپە. توپتارىڭىزدىڭ ناتيجەسى – ءنول, ءبىز «قىزىل ايماقتا» تۇرمىز. قازىر تاپپاساڭىزدار, ەرتەڭ تاڭەرتەڭنەن كەشكە دەيىن بارلىعىڭىز وسى زاڭبۇزۋشىلىق بويىنشا جۇرەسىزدەر. سوندىقتان شۇعىل تۇردە جەلىگە شىعىڭىز, جۇمىستى ۇيىمداستىرىڭىز», دەلىنگەن اۋديو-حابارلامادا.
اۋديوجازبا الەۋمەتتىك جەلىلەرگە تارالعاننان كەيىن شقو پوليتسيا دەپارتامەنتى قىزمەتتىك تەرگەۋدى باستادى. حابارلامانىڭ كەيىپكەرى سەمەي قالالىق پوليتسيا باسقارماسى جەرگىلىكتى پوليتسيا ءبولىمىنىڭ باسشىسى بولىپ شىقتى.
«شقو پوليتسيا دەپارتامەنتى قىزمەتتىك تەرگەۋ جۇرگىزدى. ونىڭ ناتيجەسى بويىنشا دىبىستىق حابارلامانىڭ اۆتورى – سەمەي قپ جەرگىلىكتى پوليتسيا ءبولىمىنىڭ باسشىسى ەكەندىگى انىقتالدى. لاۋازىمدى تۇلعا قىزمەتتىك-اسكەري ءتارتىپتى بۇزعانى ءۇشىن جۇمىسىنان بوساتىلدى», دەدى دەپارتامەنت وكىلى.
