ايماقتار • 26 ءساۋىر، 2021

جامبىلدا QazVac وتاندىق ۆاكتسيناسىن سالۋ باستالدى

30 رەت كورسەتىلدى

بىلتىر مەملەكەت باسشىسى قاسىم-جومارت توقاەۆ وتاندىق ۆاكتسينا جاساۋ جونىندە تاپسىرما بەرگەن بولاتىن. جۋىردا عانا قورداي اۋدانىنا جۇمىس ساپارىمەن كەلگەن پرەمەر-ءمينيستردىڭ ورىنباسارى ەرالى توعجانوۆ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بازاسىندا وندىرىلگەن QazVac قازاقستاندىق ۆاكتسيناسىنىڭ ءبىرىنشى پارتياسىنىڭ جونەلتىلۋىنە قاتىسقان ەدى، دەپ حابارلايدى Egemen.kz

بۇگىندە جامبىل وبلىسىندا بۇل جونىندە پرەزيدەنتتىڭ تاپسىرماسى ورىندالۋدا.

وڭىردە بۇگىننەن باستاپ حالىققا QazVac وتاندىق ۆاكتسيناسىن سالۋ باستالدى. كەشە عانا، ياعني 25 ءساۋىر كۇنى وڭىرگە 2000 دوزا وتاندىق ۆاكتسينا جەتكىزىلدى.  قازاقستاندىق ۆاكتسينانىڭ عىلىمي اتاۋى – QazCovid-in، ونىڭ تاۋارلىق اتاۋى – QazVac.

ۆاكتسينا يناكتيۆتەندىرىلگەن، قۇتىداعى 1 دوزالى، 0،5 مل-دەن بۇلشىقەت ىشىنە 2 رەت 21 كۇن ارالىقپەن جۇرگىزىلەدى. ۆاكتسينا توڭازىتقىشتاردا ساقتالادى جانە بارلىق باسقا ۆاكتسينالار سياقتى +2+8 گرادۋس تەمپەراتۋرا رەجيمىندە تەرموكونتەينەرلەردە تاسىمالدانادى. وتاندىق ۆاكتسينانىڭ ەرەكشەلىگى – مۇزداتۋدىڭ  قاجەتى جوق. ياعني، نولدىك پارامەترلەرى بار توڭازىتقىش جابدىقتار قاجەت ەمەس.

وبلىستىق دەنساۋلىق ساقتاۋ باسقارماسىنىڭ مالىمەتىنشە، تاراز، شۋ قالالارىنىڭ جانە وڭىردەگى 10 اۋدانداعى 20 ەمحانانىڭ بارلىق ەگۋ كابينەتتەرىندە وتاندىق ۆاكتسينا بار جانە بۇگىننەن  باستاپ  ەگۋ جۇمىستارى باستالدى.

بۇدان بولەك، وبلىسقا 2021 جىلدىڭ 1 اقپاننان باستاپ «سپۋتنيك V» ۆاكتسيناسىنىڭ  51 300 دوزاسى جەتكىزىلگەن. وبلىستا «سپۋتنيك V» ۆاكتسيناسىنىڭ 1 كومپونەنتىمەن 33 425 ادام ەگىلگەن. ونىڭ ىشىندە 21 كۇننەن كەيىن 8504 ادام ۆاكتسينانىڭ 2 كومپونەنتىن العان. ۆاكتسينا العاندار تاراپىنان دەنساۋلىعىنا تەرىس اسەر بەرىپ، شاعىم كەلتىرگەندەر تىركەلمەگەن.

بۇگىندە وبلىستىڭ بارلىق ەمحانالارىندا 18 جاستان اسقان، قارسى كورسەتىلىمدەرى جوق ادامدارعا QazCovid-in وتاندىق ۆاكتسيناسى جانە «سپۋتنيك V» ۆاكتسيناسى ەگىلىپ جاتىر.

 

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار