«اتاڭنان مال قالعانشا, تال قالسىن» دەپ تۇسىنگەن دانا حالقىمىز كورەگەندىكتىڭ كوركەم ۇلگىسىن كورسەتسە كەرەك. ونى و باستان تۇيسىنگەن استانالىق قالامگەرلەر بىردەن وسىنداي يگى ىسكە ءوز ۇلەسىن قوسۋعا نيەتتەنىپ, كوتەرىڭكى كوڭىل كۇيمەن جينالدى.
قالامعا سەرت ەتكەن جاندار قاتار-قاتار ساياباقتىڭ اباي كوشەسىنە قاراعان جاعىندا 25 ءتۇپ اعاش وتىرعىزدى. كارى-جاسىنا قاراماي ءبارى دە ءبىر-ءبىر كۇرەك ۇستاپ, جاس كوشەتتىڭ جايقالىپ وسۋىنە تىلەكتەرىن ءبىلدىردى. جازۋشىلارمەن بىرگە نۇر-سۇلتان قالاسى اكىمىنىڭ ورىنباسارى باقتيار ماكەن مەن بايقوڭىر اۋدانىنىڭ اكىمى نۇربول نۇرساعاتوۆ تا بىلەك ءتۇرىپ, جۇمىسقا كىرىستى.
«قويشىعارا سالعارا ۇلى اعامىزدىڭ «بۇل سەنبىلىككە الدىمەن وزدەرىڭدى كورۋگە كەلدىم. پاندەميا جاعدايىندا كوپ ءجۇرىپ-تۇرا الماعاندىقتان, وسىنداي ەل-جۇرت قاتىساتىن جۇمىسقا كەلگەنىمىز ءبىر جاعىنان قالانىڭ تازالىعىنا, ەكولوگياسىنا قوسقان پايدالى ۇلەسىمىز بولسا, ەكىنشى جاعىنان جۇزدەسۋىمىزگە دە سەپ بولعانى جاقسى عوي», دەگەن سوزىندە جان بار دەپ ويلايمىن. بۇگىن «قالامگەرلەر اللەياسىندا» وتىرعىزعان اعاشتار ەرتەڭگى بولاشاقتىڭ اعالارعا دەگەن قۇرمەتىن ارتتىرۋعا سەپ بولاتىنى ءسوزسىز», دەدى قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى.
اتالعان شاراعا قازاق ادەبيەتىنىڭ كورنەكتى وكىلدەرى سۇلتان ورازالين, قويشىعارا سالعارا ۇلى, الىبەك اسقاروۆ, نەسىپبەك ايت ۇلى, تولىمبەك ءادىرايىم, سادىبەك تۇگەل جانە باسقا دا بەلگىلى اقىن-جازۋشىلار قاتىستى. مۇشەلىككە وتكەن جاس بۋىن دا اعالارىمەن بىرلەسىپ, ساياباقتىڭ ءسانىن كەلتىردى.
بايقوڭىر اۋدانىنىڭ اكىمدىگى ۇيىمداستىرعان ىستىق شاي مەن باۋىرساق تا قالامگەر قاۋىمنىڭ كوڭىلىن كوتەرىپ, جۇمىستان كەيىن ەمەن-جارقىن ديدارلاسۋعا دانەكەر بولدى.
