«وزدەرىڭىز كورىپ وتىرعانداي, جەكەمەنشىككە بايلانىستى بۇگىن كوميسسيا مۇشەلەرىنىڭ ءبىرتۇتاس پىكىرى قالىپتاسقان جوق. جۇمىس توپتارىنىڭ جەتەكشىلەرى دە ويلارىن ورتاعا سالدى. ولار دا شەشىم قابىلداعان جوق. نەگە دەسەڭىزدەر, ماسەلە كۇردەلى. ماسەلە ماعىناسى جاعىنان دا, ءمانى جاعىنان دا وتە ماڭىزدى, تەرەڭ سۇراق بولعاننان كەيىن جۇمىس توپتارىنىڭ باسشىلارى وسىنداي شەشىمگە كەلدى عوي دەپ ويلايمىن. بىرگە تالقىلادىق. اشىعىن ايتقاندا تۇپكىلىكتى شەشىم قابىلداۋ ءۇشىن ءبىراز ۋاقىت كەرەك ەكەنى انىق», دەدى ەرالى توعجانوۆ.
ۇكىمەت باسشىسى ورىنباسارىنىڭ اتاپ وتۋىنشە, اۋىل شارۋاشىلىعى جەرلەرىنە تولىق ينۆەنتاريزاتسيا جۇرگىزۋ قاجەت.
«ول ءبىر كۇننىڭ شارۋاسى ەمەس, ونى بۇكىل ەل بىلەدى. ونى وزدەرىڭىز وسى جەردە تالقىلاپ, ۇسىنىس ەنگىزدىڭىزدەر. بۇل جۇمىس بارىسىندا ەلىمىزدىڭ بارلىق جەرىنىڭ توپىراعىنىڭ قۇنارلىعى ناقتىلانۋى ءتيىس. اۋىل شارۋاشىلىعى جەرلەرىنىڭ كاداسترلىق قۇنىن قايتا قاراستىرۋ كەرەك دەپ ويلايمىن. مامانداردىڭ ايتۋىنشا, بۇل 10 جىلدان بەرى قارالماعان سۇراق. ونى ءبىر كۇننىڭ ىشىندە, ءبىر وتىرىستا شەشىم قابىلدايمىز دەپ تە ايتا المايمىز. جەردىڭ قۇنارىن, نارىقتىڭ قۇنىن ەسكەرە وتىرىپ, جان-جاقتى تالداۋ جۇرگىزىلۋى ءتيىس. حالقىمىز ءار ۋاقىتتا جەردى قازىناعا, بايلىققا تەڭەگەن. وسى جەردە ازاماتتاردىڭ ءبىرازى ساياسي استارى بار ەكەندىگىن ايتىپ جاتىر. ول جا جوق ەمەس. ونى دا ەسكەرۋىمىز كەرەك. قازاقتا سۋدىڭ دا سۇراۋى بار دەگەن ءسوز بار. سوندىقتان وسىنىڭ ءبارىن ەسكەرەيىك», دەدى پرەمەر-ءمينيستردىڭ ورىنباسارى.
