22 ساۋىردەگى ەپيدەميولوگيالىق جاعداي بويىنشا COVID-19 ىندەتىنەن زەرتحانالىق جولمەن راستالعان بارلىعى 17276 جاعداي تىركەلدى. وتكەن ءبىر تاۋلىك ىشىندە زەرتحانالىق جولمەن كوروناۆيرۋس پاندەمياسىن جۇقتىرعان 126 جاعداي راستالىپ وتىر. وسىدان-اق قاتەردىڭ قانشالىقتى قاۋلاپ ءوسىپ كەلە جاتقاندىعىن اڭعارۋعا بولادى. سوڭعى كەزدە سانيتارلىق تالاپتى بۇزۋ تىم جيىلەپ كەتتى. وبلىس ورتالىعىندا بەتپەردە تاقپاي, بەيقام جۇرگەندەردەن كوز سۇرىنەدى.
قاۋىپتى ىندەتتىڭ اسقىنۋىنا بايلانىستى ەمحاناعا ءوز ەرىكتەرىمەن كەلىپ تەكسەرىلگەن 8743 ادامنىڭ 6284-ءى ىندەت جۇقتىرعاندارمەن بايلانىستا بولعان. دەمەك, بۇل ءالى دە تىيىلا قويماعان اس, توي, قۇدالىق ءتارىزدى ەسكى ادەتتىڭ سالدارى.
سوڭعى اپتادا جامان تۇماۋ جۇقتىرۋدىڭ 705 جاعدايى تىركەلىپ, اۋرۋلار سانى ءبىرشاما وسكەندىگى بايقالىپ وتىر. ەڭ وكىنىشتىسى, سوڭعى ءبىر تاۋلىكتە مەكتەپ وقۋشىلارى اراسىندا 16, مەكتەپكە دەيىنگى بالالار اراسىندا قاۋىپتى ىندەتتىڭ 3 جاعدايى تىركەلگەن.
دەرت داۋىلى تولاستار ەمەس. ءورشۋدىڭ سەبەبى وزىمىزگە بايلانىستى بولىپ وتىرعانىن ەسكەرمەسەك, بەلگىسىز دەرتتىڭ بەتى قايتپايتىن ءتۇرى بار.
