تاياۋدا «يگى ىستەر مارافونى» جالپىۇلتتىق جوباسى اياسىندا قاراعاندى وبلىستىق تاريحي-ولكەتانۋ مۇراجايى وسى اتالعان تاريحي مەكەنگە ەكوتۋر ۇيىمداستىردى. بۇل ءىس-شاراعا جاستار رەسۋرستىق ورتالىعىنىڭ وكىلدەرى, وقىتۋشىلار, وقۋشىلار جانە مۋزەي قىزمەتكەرلەرى قاتىستى. ارحەولوگيالىق پاركتە ولار بىرەگەي تاريحي ەسكەرتكىشتەرمەن تانىسىپ قانا قويماي, سول ماڭداعى اۋماقتى قوقىستان تازارتتى.
قازىرگى تاڭدا تالدى تاريحي-ارحەولوگيالىق پاركىندە ۇلكەن شارۋالار قولعا الىنا باستاعان. مىسالى, وبلىستىق مادەنيەت, ارحيۆتەر جانە قۇجاتتاما باسقارماسىنىڭ قىزمەتكەرلەرى مەن ە.بوكەتوۆ اتىنداعى قاراعاندى ۋنيۆەرسيتەتىنىڭ ارحەولوگ-عالىمدارى بۇل جەردە ساياباق قۇرۋ جوباسىن ازىرلەدى. جوبا بويىنشا ارحەولوگيالىق زەرتتەۋلەر, قالپىنا كەلتىرۋ جانە كونسەرۆاتسيالاۋ جۇمىستارى جۇرگىزىلدى. پاركتە كۇزەت تاقتالارى مەن نىسانداردىڭ ورنالاسۋ ورىندارى كورسەتىلگەن. قازىرگى ۋاقىتتا تۋريستەر ءۇشىن قاجەتتى اقپارات ءۇش تىلدە جازىلعان QR-كودى بار باننەرلەردى ورناتۋ بويىنشا دايىندىق جۇمىستارى جۇرگىزىلۋدە. سونداي-اق الداعى ۋاقىتتا تالدى تاريحي-ارحەولوگيالىق پاركى بويىنشا ەكسكۋرسيالىق تۋرلار ازىرلەنىپ, سىناقتان وتكىزىلەدى جانە تۋريستىك جولسىلتەمەلەر شىعارىلادى.
ەسكە سالساق, تالدى تاريحي-ارحەولوگيالىق پاركىنىڭ قۇرامىنا ەنەتىن قاراجارتاس قورىمىنداعى ەڭ ءىرى بەعازى-ءداندىباي كەسەنەسىنىڭ تابىلۋى عىلىم ءۇشىن ۇلكەن جاڭالىق بولدى. وسىدان ءتورت جىل بۇرىن قايتا قالپىنا كەلتىرىلگەن بۇل ەسكەرتكىش پيراميدالىق-ساتىلى قۇرىلىم بولىپ سانالادى جانە سىرتقى ءپىشىنى مىسىر مەن اتستەك پيراميدالارىن ەسكە تۇسىرەدى.
قاراعاندى وبلىسى,
شەت اۋدانى
