سوعان قاراماستان, زاڭدى بەلدەن باسىپ جۇرگەندەر كوپ. وپەراتسيانىڭ 4 كۇنى ىشىندە عانا وبلىستا بالىق رەسۋرستارىن زاڭسىز اۋلاۋدىڭ 70-كە جۋىق زاڭ بۇزۋشىلىقتارى انىقتالدى.
– اۋەدەن شولۋ كەزىندە جاعالاۋ سىزىعىنان ايىراتىن ءنومىرى جوق 18 ديۋرالدى قايىقتارى تابىلدى. «راحمەتوللا» ۋچاسكەسىندە قىزمەتكەرلەر 2 رەزەڭكە قايىق, ەسكەك, قايىق موتورى مەن قاپشىقتاعى اۋلاردى انىقتادى. بارلىق زاتتاي دالەلدەمەلەر بالىق ينسپەكتسياسىنا جولداندى. 64 ادامعا قاتىستى جالپى سومماسى 1 ملن. تەڭگەدەن استام اكىمشىلىك ايىپپۇلدار سالىندى, - دەدى وبلىستىق پوليتسيا دەپارامەنتىنىڭ باستىعى ساعات ماديەۆ.
كەشە تابيعاتتى قورعاۋ جانە اۋماقتىق بالىق ينسپەكتسياسىنىڭ قىزمەتكەرلەرى مي-8 تىكۇشاعىمەن وسكەمەن قالاسىنان بۇقتىرما سۋ قويماسىنىڭ جاعالاۋ سىزىعى بويىمەن – بوكەن وزەنىنىڭ ساعاسى – «تورانعى» شىعاناعى, جولنۇسقاۋ, امانات, شەڭگەلدى اۋىلدارى, قارا ەرتىس وزەنىنىڭ ساعاسى, تۇعىل اۋىلى, زايسان كولىنىڭ سولتۇستىك-باتىستاعى تىيىم سالىنعان بولىگى باعىتى اۋەدەن باقىلاندى. سونداي-اق, قىزمەتكەرلەر ۇلان, كۇرشىم, تارباعاتاي جانە كوكپەكتى اۋداندارىنىڭ اڭشىلىق القاپتارىن تەكسەردى.
بارلىق يەسىز قايىقتار مەن بالىقشىلارعا بەينەتۇسىرىلىم جۇرگىزىلىپ, ورنالاسۋ ورىندارىنىڭ كارتاسىندا بەلگى قويىلدى. اقپارات كۇرشىم, تارباعاتاي, كوكپەكتى اۋداندىق پوليتسيا قىزمەتكەرلەرىنە جولداندى.
بالىقشى ازاماتتار بالىق اۋلاۋدىڭ نورمالارى مەن قاعيدالارىن بۇزعانى ءۇشىن اكىمشىلىك جاۋاپكەرشىلىك (قر اقبتك-ءنىڭ 381-بابى) عانا ەمەس, قىلمىستىق جاۋاپكەرشىلىك (قر قك-ءنىڭ 335-بابى) قاراستىرىلعانىن دا ەستە ۇستاعاندارى ءجون.
