ايماقتار • 17 ءساۋىر، 2021

قوستانايدا قۇراستىرىلاتىن اۆتوكولىكتەرگە سۇرانىس ارتىپ كەلەدى

40 رەت كورسەتىلدى

قازاقستان اۆتوبيزنەس قاۋىمداستىعىنىڭ مالىمەتىنشە،   2021 جىلدىڭ ءبىرىنشى توقسانىندا ەل اۋماعىندا جالپى قۇنى 140،4 ميلليارد تەڭگەدەن اساتىن 19 مىڭ 848 تەحنيكا شىعارىلعان. مۇنىڭ 66%-ى قوستاناي قالاسىنداعى «سارىارقااۆتوپروم» زاۋىتىنا تيەسىلى، دەپ حابارلايدى Egemen.kz.

وتكەن ءۇش ايدىڭ قورىتىندىسى بويىنشا قوستاناي اۆتوموبيل زاۋىتى 13 مىڭ 63 تەحنيكا شىعارعان. بۇل وتكەن جىلدىڭ العاشقى توقسانىمەن سالىستىرعاندا 34،7% -عا ارتىق.

زاۋىت باسشىلىعى مۇنداي ءوسىمدى قوستانايدا قۇراستىرىلاتىن «Chevrolet» اۆتوموبيلدەرىنىڭ سوڭعى ۋاقىتتا جوعارى سۇرانىسقا يە بولۋىمەن بايلانىستىرادى. اتالمىش جەڭىل كولىك ءتۇرى قازىر قازاقستان نارىعىندا ەڭ جوعارى سۇرانىسقا يە بولىپ تۇر. قوستاناي ماشينا جاساۋ زاۋىتى ءبىرىنشى توقساننىڭ وزىندە 10 مىڭ 153  «Chevrolet» شىعارعانىن مالىمدەدى.

 - ءبىز جىل وتكەن سايىن اۆتوموبيل ءوندىرىسىنىڭ كولەمىن ۇلعايتۋمەن قاتار، ءونىمنىڭ جەرگىلىكتى ۇلەسىن ارتتىرا وتىرىپ، قازىرگى حالىقارالىق تالاپقا ساي زاماناۋي ءارى ساپالى كولىكتەر شىعارۋعا قادام باستىق. بۇل باعىتتا ءبىز ىشكى نارىقتى قامتاماسىز ەتۋمەن قاتار، ەكسپورت ماسەلەسىن دە قولعا الىپ وتىرمىز. ماسەلەن، جىل باسىنان بەرى 2000-عا جۋىق قوستانايلىق كولىك شەتەلگە ساتىلدى، - دەدى «سارىارقااۆتوپروم» جشس ديرەكتورى سىرىم سەمەيباەۆ.

بىلتىر قوستاناي اۆتوموبيل زاۋىتى ءوندىرىس كولەمىن ۇلعايتۋ جونىنەن رەكوردتىق كورسەتكىشكە قول جەتكىزىپ، 40 مىڭ 50 تەحنيكا شىعاردى. بۇل -  قازاقستاندا جاسالعان بارلىق تەحنيكانىڭ 51،7% پايىزى. زاۋىت باسشىلشىعى   Jac، Chevrolet، UAZ جانە MAN برەندتەرىنە دە سۇرانىس ارتىپ كەلە جاتقانىن ايتتى.

ەستەرىڭىزدە بولسا، بيىل ناۋرىز ايىندا سارىارقااۆتوپروم» مەن رەسەيدىڭ «اۆتوۆاز»-ى ءوزارا ىنتىماقتاستىق تۋرالى كەلىسىمگە وتىرىپ، قوستانايلىق زاۋىت KIA اۆتوموبيلدەرىن شىعارۋدى قولعا العان. وسىنداي ءوندىرىس كولەمىن ۇلعايتۋ شارالارىنىڭ ناتيجەسىندە قوستانايلىق زاۋىت بيىل 100 مىڭ تەحنيكا شىعارۋدى جوسپارلاپ وتىر. 

قوستاناي وبلىسى

سوڭعى جاڭالىقتار

ۇقساس جاڭالىقتار