2020 جىلعى 4 ناۋرىزدا وتكەن تىڭداۋلاردىڭ قورىتىندىسى بويىنشا ۇكىمەتكە 69 ۇسىنىم توپتاماسى جىبەرىلگەن بولاتىن. بۇگىن سەناتورلار بىرقاتار مينيسترلىكتەردىڭ, سالالىق مەملەكەتتىك ورگانداردىڭ جانە بيزنەس قاۋىمداستىقتىڭ باسشىلىعىمەن قانداي تارماقتاردىڭ ورىندالعانى جانە الداعى ۋاقىتتا قايسىسى ورىندالاتىنىن تالقىلادى.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ وتكەن جىلدىڭ جەلتوقسانىندا ۇسىنىلعان وسىنداي ەسەپكە سەناتورلار ريزا بولماعانىن ەسكە سالدى. ول كەزدە ۇسىنىستاردىڭ ورىندالۋى تومەن دەڭگەيدە بولعان ەدى. سوندىقتان تاعى ءبىر كەزدەسۋ وتكىزۋ تۋرالى شەشىم قابىلدانعان بولاتىن.
«وتكەن جىلعى جەلتوقسانداعى وتىرىستا ءبىزدىڭ كوميتەت مەملەكەتتىك ورگانداردىڭ ۇسىنىمداردى ىسكە اسىرۋ بويىنشا جۇمىس جەتكىلىكتى دەڭگەيدە ەمەس دەپ شەشتى. سوندىقتان قازىر ءبىز سىزدەرمەن تاعى دا كەزدەسىپ وتىرمىز. وسى ۋاقىت ارالىعىندا مەملەكەتتىك ورگاندارمەن بەلگىلى جۇمىس جۇرگىزىلگەنىن اتاپ وتكىم كەلەدى. بىراق, بۇل جەردە وسى سالاداعى ماسەلەلەردىڭ جۇيەلى شەشىلۋى وتاندىق بيزنەس وكىلدەرىنە بايلانىستى بولاتىنىن ءتۇسىنۋ ماڭىزدى», - دەدى داۋرەن ادىلبەكوۆ.
ۇلتتىق ەكونوميكا ءمينيسترىنىڭ ورىنباساى تيمۋر جاقسىلىقوۆتىڭ ايتۋىنشا, قازىرگى كەزدە ولاردىڭ دەپارتامەنتى كاسىپكەرلەردى داعدارىسقا قارسى مەملەكەتتىك قولداۋ شارالارىن جۇزەگە اسىرىپ جاتىر. سونىمەن قاتار, ەكونوميكانىڭ ەڭ كوپ زارداپ شەككەن سالالارىنداعى شاعىن جانە ورتا بيزنەسكە بانك نەسيەلەرىن جەڭىلدىكپەن قايتا قارجىلاندىرۋ تەتىگى ىسكە قوسىلدى.
يندۋستريا جانە ينفراقۇرىلىمدى دامىتۋ ءمينيسترىنىڭ ورىنباسارى امانياز ەرجانوۆ تا سەنات ۇسىنىمدارىنىڭ ورىندالۋى تۋرالى ايتتى. پارلامەنتتىك تىڭداۋعا قاتىسۋشىلار بەرگەن ۇسىنىستارىنىڭ 40%-دان استامى قازىردىڭ وزىندە ورىندالدى. قالعان تارماقتار ازىرلەنىپ جاتقان 2025 جىلعا دەيىنگى جەڭىل ونەركاسىپتى دامىتۋدىڭ جول كارتاسى جوباسىنا ەنگىزىلگەن.
وتىرىستاعى نەگىزگى بايانداماشى سەناتور ەدىل مامىتبەكوۆ قازاقستاندىق ەكسپورتتاۋشىلار ەاەو كەڭىستىگىندە ءجيى تاپ بولاتىن ساۋدا كەدەرگىلەرى پروبلەمالارىن, سونداي-اق ءبىزدىڭ ەلگە يمپورتتالاتىن تاۋارلاردىڭ ساپاسىنىڭ تومەندىگى ماسەلەلەرىن شەشۋ ءالى دە تالاپ ەتىلىپ وتىرعانىن اتاپ ءوتتى. سونىمەن قاتار, سەناتوردىڭ ايتۋىنشا, قازىرگى كەزدە مەكتەپ فورماسىن وندىرۋشىلەرگە ۇلتتىق ستاندارتتى مىندەتتى ەتۋ اسا ماڭىزدى. بۇل قازاقستاندىق مەكتەپ فورماسىنىڭ ءوندىرىسىن 100% ۇلعايتۋعا مۇمكىندىك بەرەدى.
