بۇل تۋرالى الماتى قالالىق پوليتسيا دەپارتامەنتى باستىعىنىڭ ورىنباسارى رۋستام ابدراحمانوۆ مالىمدەدى.
ونىڭ ايتۋىنشا, قىز كۇدىكتىمەن 16 ناۋرىزدا تانىسقان. 20 ناۋرىزدا 102 نومىرىنە اياجان ەدىلوۆانىڭ جوعالعانى تۋرالى حابارلاما كەلەدى. 21 ناۋرىزدا ارنايى جەدەل توپ قۇرىلىپ, سوتقا دەيىنگى تەرگەۋ باستالدى.
بەلگىلى بولعانداي, بويجەتكەن 19 ناۋرىزدان 20 ناۋرىزعا قاراعان ءتۇنى ولتىرىلگەن. ونىڭ دەنەسى بولشەكتەلگەن كۇيىندە تابىلدى. كۇدىكتى دەنەنىڭ ءبىر بولىگىن الاتاۋ اۋدانىنان تىس جاقتاعى قوقىسقا تاستاعان. ول ءوز ارەكەتىن قىلمىستىڭ ىزدەرىن جاسىرۋعا تىرىسقاندىعىمەن تۇسىندىرەدى. كۇدىكتى ءوز كىناسىن تولىعىمەن مويىندادى.
ەسكە سالا كەتەيىك, 19 ناۋرىزدا الماتىدا 19 جاستاعى اياجان ەدىلوۆا جوعالىپ كەتتى. 22 ناۋرىزدا ونىڭ دەنەسى تابىلدى. پوليتسيا «ادام ءولتىرۋ» بابى بويىنشا تەرگەۋ باستادى, بۇل ءىس بويىنشا تۇركىستان وبلىسىنىڭ 1993 جىلى تۋىلعان تۇرعىنى ۇستالدى.
پوليتسيانىڭ حابارلاۋىنشا, جوعالىپ كەتكەن كۇنى بويجەتكەن الەۋمەتتىك جەلى ارقىلى تانىسقان جاڭا دوسىمەن كەزدەسۋگە كەتكەن. مارقۇم اياجاننىڭ تۋىستارى ونىڭ ەرەكشە قاتىگەزدىكپەن ولتىرىلگەنىن ايتىپ وتىر. ازىرگە بويجەتكەن كۇدىكتىنىڭ جالعىز قۇربانى بولماۋى مۇمكىن دەگەن كۇدىك بار.
