حالىقارالىق قوعامداستىق قازاقستاننىڭ جاپپاي قىرىپ-جويۋ قارۋىن تاراتپاۋ رەجيمىن نىعايتۋعا قوسقان ۇلەسىن مويىنداي وتىرىپ, قازاقستان رەسپۋبليكاسى ۇلتتىق يادرولىق ورتالىعىنىڭ باس ديرەكتورى ەرلان باتىربەكوۆتى يادرولىق سىناقتارعا جان-جاقتى تىيىم سالۋ تۋرالى شارت ۇيىمىنىڭ (ياسجتشۇ) دايىندىق كوميسسياسى جۇمىس توبىنىڭ توراعاسى ەتىپ سايلادى. تاعايىنداۋ ءراسىمى الەمنىڭ 150-دەن استام ەلىنىڭ وكىلدەرىنىڭ قاتىسۋىمەن ونلاين رەجيمدە وتكىزىلدى.
ەستەرىڭىزگە سالا كەتەيىك, ياسجتشۇ يادرولىق سىناقتارعا جان-جاقتى تىيىم سالۋ تۋرالى شارتتىڭ ساقتالۋىن باقىلاۋدى جۇزەگە اسىراتىن حالىقارالىق ۇيىم.
«ياسجتشۇ-نىڭ جۇمىس توبىنا توراعالىق ەتۋ ەلىمىزدىڭ جاپپاي قىرىپ-جويۋ قارۋىن تاراتپاۋ رەجيمىن نىعايتۋعا بەت العان باعىتىنا بەرىلگەن جوعارى باعا ەكەنى ءسوزسىز», دەدى ەرلان باتىربەكوۆ. تاۋەلسىزدىك جىلدارىندا قازاقستان الەمدەگى قۋاتى جاعىنان ءتورتىنشى ورىنداعى يادرولىق ارسەنالدان باس تارتىپ, يادرولىق قارۋ سىناقتارىنىڭ ينفراقۇرىلىمى مەن سالدارىن جويۋ بويىنشا كەڭ اۋقىمدى قىزمەت جۇرگىزدى, جاھاندىق قاۋىپ-قاتەردى ازايتۋ, جاپپاي قىرىپ-جويۋ قارۋىن تاراتپاۋ رەجيمىن نىعايتۋ جۇمىستارىن جۇرگىزۋدە بىرەگەي تاجىريبە جيناقتادى. قازاقستان ياسجتشۇ-عا ەلەۋلى قولداۋ كورسەتىپ, ونىڭ ماقساتتارىنا قول جەتكىزۋدە تاباندىلىق تانىتتى.
ماسەلەن, ۇلتتىق يادرولىق ورتالىق پەن ياسجتشۇ-نىڭ حالىقارالىق مونيتورينگ جۇيەسىن – حمج قۇرۋ تۇرعىسىنداعى بەلسەندى ىنتىماقتاستىعى بايقالادى.
اتاپ ايتقاندا, قر ۇلتتىق يادرولىق ورتالىعىنىڭ جەدەل باسقارۋىمەن ءتورت سەيسميكالىق جانە ءبىر ينفرادىبىستىق حمج ستانساسى, سونداي-اق قازاقستان ۇلتتىق دەرەكتەر ورتالىعى – KNDC جۇمىس ىستەيدى. قازىرگى ۋاقىتتا ورتالىق ازيادا العاشقى اسىل گازداردى راديونۋكليدتىك مونيتورينگىلەۋ ستانساسى قۇرىلىپ جاتىر. قازاقستاننىڭ ياسجتشۇ دايىندىق كوميسسياسىنىڭ جۇمىسىنا توپ توراعاسى رەتىندە قاتىسۋى قازاقستاننىڭ بىرەگەي تاجىريبەسىن, جيناقتالعان جانە ۋاقىتپەن تەكسەرىلگەن جاھاندىق قاۋىپ-قاتەردى تومەندەتۋ ادىستەرىن تاراتۋعا جاقسى مۇمكىندىك. بۇل ەلىمىزدىڭ يادرولىق سىناقتارعا جالپىعا بىردەي تىيىم سالۋ پروتسەسىنە قوسقان كەزەكتى ماڭىزدى ۇلەسى بولماق.
ايتا كەتەيىك, بيىل سەمەي يادرولىق سىناق پوليگونىنىڭ جابىلۋىنا 30 جىل تولادى. وسىدان تۋرا 30 جىل بۇرىن قر تۇڭعىش پرەزيدەنتى – ەلباسى نۇرسۇلتان نازارباەۆ وتە ماڭىزدى تاريحي قۇجات – سەمەي يادرولىق سىناق پوليگونىن جابۋ تۋرالى جارلىققا قول قويدى. ءبىزدىڭ ەلىمىز تمد ەلدەرى اراسىندا العاشقىلاردىڭ ءبىرى بولىپ 1996 جىلى حالىقارالىق قاۋىپسىزدىك پەن يادرولىق قارۋدى تاراتپاۋ جۇيەسىندەگى ىرگەتاسىنىڭ ءبىرى بولىپ تابىلاتىن يادرولىق سىناقتارعا جان-جاقتى تىيىم سالۋ تۋرالى شارتقا قوسىلدى.
