ەلوردادا 24 ناۋرىزدان 25-ىنە قاراعان ءتۇنى كارانتين رەجيمىن بۇزعان 5 مەكەمە انىقتالدى.
ەسىل اۋدانىندا «VZلەتنىي» رەستو-بارى مەن «شيشكا» لاۋندج-بارى شەكتەۋلەرگە قاراماستان ءتيىستى رەجيمدى بۇزا وتىرىپ جۇمىس ىستەدى.
ءموبيلدى توپ وسىعان ۇقساس بۇزۋشىلىقتى الماتى اۋدانىندا ورنالاسقان «WEST» كومپيۋتەرلىك كلۋبىندا تىركەدى.
سونىمەن قاتار, ساعات 00.00-دەن كەيىن سارىارقا اۋدانىنداعى «سرەدا» رەستو-بارى مەن «Red House» مونشا كەشەنى كەلۋشىلەرگە قىزمەت كورسەتتى.
ەلوردانىڭ باس سانيتارلىق دارىگەرىنىڭ قاۋلىسىندا جازىلعان شەكتەۋلەردى «مياتا»لاۋندج-بارى, سونداي-اق بايقوڭىر اۋدانىندا ورنالاسقان كافەلەردىڭ ءبىرى ساقتاماعان.
جينالعان ماتەريالدار قر اقبتك-ءنىڭ 425-بابىنا سايكەس اكىمشىلىك شارالار قابىلداۋ جانە ءتارتىپ بۇزۋشىلاردى جاۋاپكەرشىلىككە تارتۋ ءۇشىن سانيتارلىق-ەپيدەميولوگيالىق باقىلاۋ باسقارماسىنا جولداندى.
ايتا كەتەيىك, ەلوردادا كوروناۆيرۋس بويىنشا ەپيدەميولوگيالىق جاعداي تۇراقسىز بولىپ وتىر. نۇر-سۇلتان 10 ناۋرىزدان باستاپ ەپيدەميولوگيالىق جاعداي بويىنشا «قىزىل» ايماققا ەندى. قالا تۇرعىندارى مەن قوناقتارىنا ادام كوپ جينالاتىن ورىندارعا بارماۋدى, ماسكا رەجيمىن, الەۋمەتتىك قاشىقتىقتى جانە باسقا دا سانيتارلىق نورمالار مەن تالاپتاردى ساقتاۋدى كەڭەس ەتەدى.
