ەكى مىڭ جىلدان استام تاريحى بار كونە قالانىڭ باسشىسى بارلىق تۇرعىننىڭ تازا, جاسىل جەلەكتى جانە قاۋىپسىز قالادا ءومىر سۇرگىسى كەلەتىنىن, شاھاردىڭ كوركى مەن تازالىعىن ساقتاۋ قالا اكىمشىلىگىنە جۇكتەلگەنىمەن, ءاربىر سانالى ازامات ءوزى تۇراتىن ورتانىڭ تازا, ءارى قولايلى بولۋىنا ۇلەس قوسۋى كەرەكتىگىن جەتكىزدى.
«تاراز كۇن سايىن كوركەيىپ, اللەيالار مەن دەمالىس ورىندارى كوبەيىپ كەلەدى. كوگالداندىرۋ جۇمىستارىنا دا ءمان بەرىلىپ, جاسىل جەلەكتەر مەن گۇلدەر ەگىلەدى. الايدا, تاراز قالاسىنىڭ وزىنە ءتان ساۋلەتى مەن كەلبەتىن ءجونسىز ىلىنگەن جارنامالار مەن زاڭسىز ورىن تەپكەن نىساندار بۇزىپ تۇر.
وسى ورايدا, اكىمدىك قالا ساۋلەتىن بىركەلكى ەتۋدى قولعا الادى. سىزدەردى عيماراتتاردىڭ سىرتى مەن جارناما قۇرالدارىن ورنالاستىرعاندا بىركەلكى ۇلگىنى ۇستانۋعا شاقىرامىن. قۇرىلىس كومپانيالارى مەن ءوڭىردىڭ كاسىپكەرلەرى جاڭادان سالىنىپ جاتقان نىسانداردىڭ كورىكسىز قورشاۋلارىن رەتكە كەلتىرگەنى ءجون. قالانى جايلى ەتۋ ءۇشىن «قاقپاسىز قالا» قاعيداسى نەگىزىندە مەكەمە سىرتىنداعى قاقپالار مەن قورشاۋلار الىنىپ, ساۋلەتتىك جوبا بويىنشا بىرىزدىلىككە كوشىرىلەدى. تۋعان قالاسىنا شىن جاناشىرلىق تانىتاتىن تۇرعىندار وسى يگى باستامالارعا قولداۋ ءبىلدىرىپ, شاھاردىڭ شىرايىن اشۋعا ءوز ۇلەستەرىن قوسادى دەگەن سەنىمدەمىن», دەلىنگەن اكىمنىڭ ۇندەۋىندە.
بۇگىندە تاراز قالاسىنىڭ ساۋلەتتىك كەلبەتىن ارتتىرۋ, شاھارعا جايلى ورتا قالىپتاستىرۋ, جەرگىلىكتى تۇرعىنداردىڭ جايلى ءومىر سۇرۋىنە جاعداي جاساۋ جۇمىستارى جۇرگىزىلۋدە. قازىرگى كەزدە وبلىس ورتالىعىندا كوپتەگەن نىساندار سالىنىپ, تۇرعىن ۇيلەر پايدالانۋعا بەرىلۋدە. سونداي-اق, الداعى ۋاقىتتاردا دا اكىمدىك تاراپىنان جۇزەگە اسىرىلاتىن جوسپارلار بارشىلىق.
