«شەتەلدىكتەرگە قاتىستى ماسەلە بويىنشا پرەزيدەنت بارلىق جاۋاپكەرشىلىكتى موينىنا الدى. جەر شەتەلدىكتەرگە جالعا دا بەرىلمەيدى, ساتىلمايدى دا. ءبارىمىز قولدايمىز. سول ارقىلى كوميسسيانىڭ ءبىر ۇلكەن جۇمىسى شەشىلدى دەپ ويلايمىن. تاعى ءبىر ماسەلە - ءبىزدىڭ ازاماتتارعا جەكەمەنشىككە اۋىل شارۋاشىلىعى جەرلەرىن بەرۋ. بۇل نەگىزگى ماسەلەلەردىڭ ءبىرى. جەكە ءوزىم اۋىل شارۋاشىلىعى جەرلەرىن جەكەمەنشىككە بەرۋگە قارسىمىن. قارسى بولاتىن سەبەبىم, ازاماتتاردىڭ 99 پايىزى اۋىل شارۋاشىلىعى جەرىن يەلەنبەگەن. كەزىندە جەر بولىنگەندە باسى-قاسىندا بولماعان, وعان قىزىقپاعان. سول ازاماتتاردىڭ 99 پايىزى جەر ماسەلەسىنە ارالاسۋى ءتيىس», دەدى كوميسسيانىڭ ءبىرىنشى وتىرىسىندا مۇرات ابەنوۆ.
سونداي-اق قوعام بەلسەندىسى جالعا جەر بەرۋ نارىعىن دامىتۋ قاجەتتىگىن اتاپ ءوتتى.
«كوپ ەلدە جەردى جالعا بەرۋ نارىعى بار. جىلدان-جىلعا باعاسىن بەلگىلەپ وتىرادى جانە ازاماتتار جالعا بەرۋ ارقىلى تابىس تاۋىپ وتىر. مەنىڭشە بۇل كوپ مەملەكەتتە قولدانىستاعى ءتيىمدى جۇيە. بىزگە دە سونى پايدالانۋعا بولادى», دەدى م. ابەنوۆ.
