ەل پرەزيدەنتى قاسىم-جومارت توقاەۆ وسى سالادا جۇرگىزىلىپ جاتقان رەفورمالاردىڭ نەگىزگى باسىمدىقتارىن بەلگىلەگەن بولاتىن. دەپۋتاتتاردىڭ زاڭ شىعارۋ باستامالارىنىڭ نەگىزى سول باسىمدىقتاردان باستاۋ الادى. «سوت جۇيەسىن رەفورمالاۋدى ءتيىمدى جۇرگىزۋ ماقساتىندا پارلامەنت سوت قۇرىلىسىن جاڭعىرتۋعا, سوت تورەلىگىنىڭ اشىقتىعى مەن ايقىندىعىن, سوت ىستەرىن قاراۋدىڭ تيىمدىلىگى مەن ساپاسىن ارتتىرۋعا باعىتتالعان بىرقاتار زاڭ قابىلدادى. بۇگىنگى شارا سوت جۇيەسىن رەفورمالاۋدى زاڭنامالىق تۇرعىدا قامتاماسىز ەتۋ جانە مەملەكەت باسشىسىنىڭ جولداۋىنان تۋىندايتىن مىندەتتەردى شەشۋدەگى سەنات جۇرگىزىپ جاتقان جۇمىستاردىڭ زاڭدى جالعاسى بولىپ تابىلادى», دەدى كوميتەت توراعاسى ۆلاديمير ۆولكوۆ.
وتىرىستا جوعارعى سوت توراعاسى جاقىپ اسانوۆ جۇرگىزىلىپ جاتقان جۇمىستار تۋرالى پىكىرىمەن ءبولىستى. ول قازىر ەلىمىزدىڭ سوت جۇيەسىندە حالىق سەنىمىن ارتتىرۋعا جانە ازاماتتاردىڭ سوت تورەلىگىنە, سونداي-اق قۇقىق ۇستەمدىگىنە قول جەتكىزۋىن قامتاماسىز ەتۋگە باعىتتالعان باسىم جوبالاردى ىسكە اسىرۋ جالعاسىپ كەلە جاتقانىن اتاپ ءوتتى.
