ەلباسى وسى قادامى ارقىلى دا ءوزىنىڭ وزگە جۇرتتارعا ونەگە كورسەتە الاتىن, ۇلتى ءۇشىن, ەلىنىڭ بولاشاعى ءۇشىن تاعدىرلى قادامدارعا بارا الاتىن سۇڭعىلا باسشى, سارابدال ساياساتكەر ەكەنىن تاعى ءبىر رەت دالەلدەدى. كورەگەن باسشى ءوز تاڭداۋىن جاساردا جاڭىلماپتى. ونىڭ كورەگەندىگى دە وسىندا.
پرەزيدەنت قاسىم-جومارت توقاەۆ ساياسي ساباقتاستىقتى ساقتاي وتىرىپ, ەلباسى ارقالاپ كەلگەن مەملەكەت باسقارۋ جۇگىن ءارى قاراي نىق سەنىممەن الىپ كەتتى. بۇعان سودان بەرگى ەكى جىلدىڭ بەدەرىندەگى پرەزيدەنتتىڭ قىزمەتى كۋا.
الەمدىك تاجىريبەگە سۇيەنىپ, ساياسي-ەكونوميكالىق ۇدەرىستەرگە زەر سالساق, مەملەكەتتى كەم دەگەندە ءتورت جىل باسقارعان ادامنىڭ عانا ەڭبەگىن وبەكتيۆتى باعالاۋعا بولادى. جاھاندىق ستاتيستيكادا قامتىلعان 204 مەملەكەتتىڭ باسقارۋ مودەلىنە جۇرگىزىلگەن تالداۋ وسىنى كورسەتىپ وتىر. قاسىم-جومارت كەمەل ۇلى توقاەۆتىڭ قازاقستان پرەزيدەنتى رەتىندە قىزمەتكە كىرىسكەنىنە ەكى جىل عانا ۋاقىت ءوتتى. جوعارىدا ايتىپ وتكەنىمدەي, بۇل باعا بەرۋگە جەتكىلىكتى كەزەڭ ەمەس. دەگەنمەن وسى ەلدىڭ ازاماتى رەتىندە پرەزيدەنتتىڭ اتقارعان جۇمىستارىن باعالاۋعا نەگىز بار. وسى ەكى جىلدا بۇرىن بولماعان ىشكى جانە سىرتقى سىناقتار مەن تاۋەكەلدەر ورىن الدى. ءتىپتى ەكونوميكالىق جانە ۇلتتىق قاۋىپسىزدىككە ىقپال ەتەتىن ءتۇرلى ىشكى جانە سىرتقى فاكتورلار پايدا بولدى. سوندىقتان ەكىجىلدىق مەرزىم دە وڭاي بولعان جوق. بىراق كەدەرگىلەرگە قاراماستان, ەلىمىزدى كەزدەسكەن قيىندىقتاردان امان-ەسەن الىپ ءوتىپ, العا جەتەلەپ, كاسىبي مامان, بىلىكتى باسشى ەكەنىن دالەلدەدى.
جالپى, پرەزيدەنتتىڭ جۇمىسىن ءۇش ولشەم بويىنشا باعالاعان دۇرىس. ءبىرىنشىسى – ساياسي ەركىندىك, ەكىنشىسى – ەكونوميكالىق ەركىندىك, ءۇشىنشىسى – ازاماتتىق قوعام ەركىندىگى.
ساياسي ەركىندىك تۋرالى ءسوز قوزعار بولساق, مەملەكەت باسشىسىنىڭ باستاماسىمەن ۇلتتىق قوعامدىق سەنىم كەڭەسى قۇرىلدى. كەڭەس اياسىندا ەلىمىزدەگى ساياسي ەركىندىكتى نىعايتۋعا باعىتتالعان جۇمىستار اتقارىلدى. ماسەلەن, ساياسي پارتيالاردى تىركەۋ كەزىندەگى كەدەرگىلەر ازايدى, پارلامەنت ماجىلىسىندە ايەلدەر مەن جاستارعا 30 پايىزدىق كۆوتا بەرىلدى. پارلامەنتتىك وپپوزيتسيا ينستيتۋتىن ەنگىزۋ جانە اۋىل اكىمدەرىن سايالاۋ تۋرالى باستامانى دا وسى قاتارعا جاتقىزۋعا بولادى.
ەكونوميكالىق ەركىندىك باعىتىنداعى ىرگەلى جۇمىستىڭ ءبىرى – پرەزيدەنت جانىنداعى رەفورمالار جونىندەگى جوعارى كەڭەستىڭ قۇرىلۋى. بۇل باعىتتا دا قىرۋار شارۋا تىندىرىلۋدا. پرەزيدەنتتىڭ تىكەلەي تاپسىرماسىمەن قولعا الىنعان جەرگە, سالىق كودەكسىنە قاتىستى ەنگىزىلگەن وزگەرىستەر – وسىعان دالەل. شەتەلدەن جۇمىس كۇشىن تارتۋعا بايلانىستى تۇبەگەيلى شەشىم قابىلدانعانىن دا اتاپ ءوتۋ كەرەك.
ازاماتتىق قوعام ەركىندىگى تۇرعىسىنان دا ءبىراز جۇمىس اتقارىلدى. سونىڭ نەگىزگىلەرىنىڭ ءبىرى – ميتينگ تۋرالى زاڭنامانىڭ جەڭىلدەتىلۋى.
ەكى جىلدا ۇلتتىق قۋاتتى نىعايتۋعا باعىتتالعان ءىس-شارالارعا دا كۋا بولدىق. ونىڭ ءۇش ولشەمى بار. ءبىرىنشىسى – حالىقارالىق قاتىناستارعا ۇلەس قوسۋ قابىلەتى, ەكىنشىسى – داعدارىستى احۋال نەمەسە كۇردەلى جاعداي تۋعاندا ەلدىڭ ءومىر ءسۇرۋ قابىلەتى, ءۇشىنشىسى – قولدا بار كۇش-قۋاتىن, رەسۋرسىن پايدالانا وتىرىپ, باسقا ەلدەرگە ىقپال ەتۋ قابىلەتى. قازاقستان قاسىم-جومارت توقاەۆتىڭ باسشىلىعىمەن وسى قابىلەتتىڭ ۇشەۋى دە سىر بەرگەن جوق.
قايىربەك ارىستانبەكوۆ,
ەكونوميكالىق ساياسات ينستيتۋتىنىڭ ديرەكتورى, ۇلتتىق قوعامدىق سەنىم كەڭەسىنىڭ مۇشەسى
