اتىراۋ وبلىسى بويىنشا قىلمىستىق-اتقارۋ جۇيەسى دەپارتامەنتى ءباسپاسوز قىزمەتىنىڭ اقپاراتىنا قاراعاندا, بىلتىر يساتاي اۋداندىق سوتىنىڭ ۇكىمىمەن 32 جاستاعى ازامات قر قىلمىستىق كودەكسىنىڭ 190-بابىمەن (الاياقتىق) كىنالى دەپ تانىلىپ, وعان 1 جىل مەرزىمگە باس بوستاندىعىن شەكتەۋ جازاسى تاعايىندالىپتى. بىراق, سوتتالعان ازامات ايىنا 2 رەت پروباتسيا قىزمەتىنە تىركەلۋ تالابىن ورىنداماعان.
«سوت ۇكىمىمەن تاعايىندالعان ءماجبۇرلى ەڭبەكتى ورىنداۋعا قاساقانا شىقپادى. اتىراۋ قالاسىنداعى مەكەن-جايىن تەكسەرگەن كەزدە, سوتتالعان ازامات ۇيىندە بولمادى. كەيىن سوتتالعان ازاماتقا جازاسىن وتەۋدەن قاساقانا جالتارعانى ءۇشىن «ەسكەرتۋ» بەرىلگەن. وسىنداي زاڭ بۇزۋشىلىقتان سوڭ ءوزىنىڭ تۇرمەگە قامالۋى مۇمكىن ەكەنىن تۇسىنگەن سوتتالعان ازامات پروباتسيا قىزمەتكەرىنە پارا بەرۋگە وقتالعان. ارام ويىن جۇزەگە اسىرۋ ماقساتىندا بەكىرە تۇقىمداس بالىق ساتىپ الىپ, پروباتسيا قىزمەتكەرىنە بەرمەك بولعان كەزدە ۇستالدى», دەپ حابارلادى دەپارتامەنتتىڭ ءباسپاسوز قىزمەتى.
سوت ۇكىمىمەن كىنالى ازامات قر قىلمىستىق كودەكسىنىڭ 367-بابىمەن (پارا بەرۋ) كىنالى دەپ تانىلدى. وعان 2 جىل 1 اي مەرزىمگە باس بوستاندىعىنان ايىرۋ جازاسى تاعايىندالدى.
