ايماقتار • 11 ناۋرىز، 2021

قىزىلوردادا پوليتسەيلەر كوروناۆيرۋسقا قارسى ۆاكتسينا سالدىرا باستادى

74 رەت كورسەتىلدى

10 ناۋرىزدان باستاپ قۇقىق قورعاۋ ورگاندارىنىڭ  قىزمەتكەرلەرى كوروناۆيرۋستىق ينفەكتسياعا قارسى ەكپە سالدىرا باستادى. ۆاكتسيناتسيا بويىنشا ۇيىمداستىرۋ شارالارى وبلىستىق دەنساۋلىق ساقتاۋ باسقارماسىمەن جانە وبلىستىق سانيتارلىق-ەپيدەميولوگيالىق باقىلاۋ دەپارتامەنتىمەن كەلىسىلگەن، دەپ حابارلايدى Egemen.kz.

ۆاكتسيناتسيا №1،3 جانە 6 قالالىق ەمحانالار بازاسىندا جۇرگىزىلۋدە.

بۇگىن №6 قالالىق ەمحانادا قىزىلوردا قالالىق پوليتسيا باسقارماسىنىڭ باسشىلارى باستاعان  جەكە قۇرامى «سپۋتنيك V» ۆاكتسيناسىن سالدىرا باستادى.

ءبىرىنشى كەزەكتە ەكپەنى ۋچاسكەلىك پوليتسيا ينسپەكتورلارى سالدىردى، سەبەبى ولاردىڭ  باستى قىزمەتى حالىقپەن تىعىز قارىم-قاتىناستا، تىكەلەي بايلانىستا بولۋ.

ۋچاسكەلىك ينسپەكتور، پوليتسيا اعا لەيتەنانتى بەكجان احمەتوۆ جانە  پوليتسيا كاپيتانى بولات ەركەبۇلان العاشقىلاردىڭ ءبىرى بولىپ ۆاكتسينا سالدىرۋعا نيەت بىلدىرگەن. اڭگىمە بارىسىندا ولار ەكپەنىڭ قاجەتتىلىگىن تۇسىنەتىندىكتەرىن اتاپ ءوتتى. ويتكەنى، اينالاسىنداعىلاردىڭ دەنساۋلىعى ماڭىزدى. ۆاكتسيناتسيادان كەيىن پوليتسيا قىزمەتكەرلەرىنىڭ جاعدايى دارىگەرلەردىڭ باقىلاۋىندا بولادى. بارلىق قىزمەتكەرلەردىڭ جاعدايى تۇراقتى.

«كوروناۆيرۋسقا قارسى ۆاكتسيناتسيا باستالعانىن حابارلاعان كەزدە مەن ونى بىردەن العىم كەلەتىنىن ايتتىم. ءبىز، پوليتسەيلەر، سونداي-اق مەديتسينا قىزمەتكەرلەرى ازاماتتارمەن تىعىز بايلانىستا جۇمىس ىستەيمىز. ءبىز كۇن سايىن حالىقپەن تىعىز قارىم-قاتىناستا جۇمىس جاساپ، كۇنى-ءتۇنى الدىڭعى شەپتەمىز. ۆاكتسينا الۋ مەنىڭ دەنساۋلىعىما عانا ەمەس، اينالامداعىلاردىڭ ساۋلىعى ءۇشىن دە قاجەت»، دەپ ءوز پىكىرىن ءبىلدىردى قىزىلوردا قالالىق پوليتسيا باسقارماسى باستىعىنىڭ  ورىنباسارى،  پوليتسيا پولكوۆنيگى ساكەن بورىباەۆ.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار