ايماقتار • 02 ناۋرىز، 2021

ءتىلسىز جاۋ سوڭعى اپتادا عانا ءتورت ادامدى مەرت قىلدى

24 رەت كورسەتىلدى

جاڭا جىل باستالعالى سولتۇستىك قازاقستاندا ءتىلسىز جاۋ ءورشىپ تۇر. وبلىستىق تج دەپارتامەنتىنىڭ ءورت ءسوندىرۋ باسقارماسىنىڭ باستىعى دميتري ءراستيحيننىڭ ايتۋىنا قاراعاندا بۇگىنگە دەيىن 138 ءورت بولعان. 

ال بىلتىرعى جىلدىڭ سايكەس مەرزىمىندە ونىڭ سانى 77. ءورتتىڭ كەسىرىنەن 21 ادام كوز جۇمعان. كەلتىرىلگەن ماتەريالدىق شىعىن 71 ملن. تەڭگە، ال بۇل بىلتىرعىدان ون ەسە ارتىق.

سوڭعى اپتادا عانا وبلىستا 17 ءورت بولىپ، 4 ادام مەرت بولدى. ءورتتىڭ  7-ءۋى وبلىس ورتالىعىندا ورىن الدى. سونىڭ ىشىندە گاز بالونىنىڭ جارىلۋى سەبەپتى ەسكى جاتاقحانانىڭ استىنداعى كافەدەن شىققان ورتتەن ەكى ادامنىڭ مەرت بولعانىن جازعان بولاتىنبىز. ال ششورس كوشەسىندەگى 84 ۇيدەن شىققان ورتتەن ءبىر ەر ادامنىڭ ولىگى شىقتى.

ادام ولىمىنە سوقتىرعان تاعى ءبىر ءورت اققايىڭ اۋدانىنداعى نوۆوروسسيسكوە سەلوسىندا بولدى. وندا 2015 جىلى تۋعان جاس بالا ءولدى.

تجد قىزمەتكەرلەرى ءورتتىڭ الدىن الۋ ماقساتىمەن تۇرعىنداردى ەسكەرتۋ جۇمىستارىن سوڭعى ۋاقىتتاردا ءجيى جۇرگىزۋدە. ءورت شىققانىن بىلدىرەتىن داتچيكتەردىڭ 680 داناسى ورناتىلدى. ەكى رەت وسىنداي داتچيكتەردىڭ كومەگىمەن ءورت جىلدام ءبىلىنىپ، ۋاقىتىندا ءسوندىرىلدى. ول اسىرەسە قارت ادامدار ءۇشىن پايدالى.

ورتسوندىرۋشىلەر وت جاعاتىن ۇيلەردەگى پەشتىڭ الدىندا مىندەتتى تۇردە تۇسكەن شوقققا تۇتانبايتىن قالىڭ قالىڭتىردان توسەنىش بولعانىن تالاپ ەتەدى. سونىمەن بىرگە وت تۇتاتۋ ءۇشىن بەنزين نەمەسە كەروسيندى قولدانباۋعا شاقىرادى. جاس بالالاردىڭ دا ۇيدە ۇلكەندەردىڭ قاراۋىنسىز جالعىز قالۋىن بولدىرماۋعا كەڭەس بەرەدى.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار