ەلىمىزدە بيە ءسۇتىن وڭدەيتىن عىلىمي-زەرتتەۋ ينستيتۋتىن اشۋ جوسپارلانۋدا. بۇل تۋرالى «24 kz» حابارلادى.
بۇل باستاما قازاقستان مەن گەرمانيانىڭ بىرلەسكەن جوباسى ارقىلى جۇزەگە اسىرىلعالى وتىر. وسى ماسەلەگە بايلانىستى بەرليندە ەكىجاقتى كەزدەسۋ وتكىزىلدى. جيىن بارىسىندا ۇلتتىق سۋسىنىمىزدى نەمىس كاسىپكەرىنىڭ پاتەنتتەمەگەنى ءمالىم بولدى. تەك KUMUS دەگەن اتاۋمەن نەمىس تاۋارى رەتىندە تىركەلگەن. ال پاتەنت ماسەلەسىن كەلەر جىلى اشىلاتىن ينستيتۋت شەشەتىن بولادى.
ءبىزدىڭ قىمىزىمىزعا نەلىكتەن ولار قىزىعۋشىلىق تانىتتى؟ ونىڭ ءمانىسى مىنادا ەكەن. گەرمانياداعى كاسىپكەر گانس تسولماننىڭ اتاسى قانداسىمىزدىڭ ايتۋىمەن قىمىز ءىشىپ, تۋبەركۋلەز اۋرۋىنان ساۋىققان.
«قىمىزدىڭ وتانى قازاقستان ەكەنىن الەم بىلەدى. ونى شىعارىپ كەلە جاتقانىما 20 جىل بولدى. مەنىڭ 3 قىزىم, 7 نەمەرەم بار. بارلىعىمىز وتباسىمىزبەن وسى شيپالى سۋسىندى پايدالانامىز. سوندىقتان مەنىڭ قازاق ەلىنە العىسىم شەكسىز جانە قىمىزدى وڭدەۋ مەن ساقتاۋدىڭ ءادىس-تاسىلدەرىمەن بولىسۋگە قاشان دا دايىنمىن. ءبىز قازاقستاندىق ارىپتەستەرمەن الماتىدا قىمىزدى بىرلەسىپ زەرتتەيمىز دەپ شەشتىك», - دەيدى كاسىپكەر گانس تسولمان.
بىرنەشە جىل بۇرىن بۇل كاسىپكەر «بولاشاق» باعدارلاماسىمەن گەرمانيانىڭ شتۋتگارت قالاسىندا جىلقى شارۋاشىلىعىنىڭ ەكونوميكاسى بويىنشا ءبىلىم الىپ جۇرگەن قازاقستاندىق جاس عالىم ايتۋعان مۇقاشەۆپەن كەزدەسەدى. سول كەزدە قىمىز ءوندىرۋدىڭ ءتاسىلى جونىندە وي بولىسەدى. سوندا جەرلەسىمىز بۇل ءونىمدى ەكسپورتقا شىعارۋ كەرەكتىگىن ايتىپتى. «قىمىزدى زەرتتەۋ 50 جىلداردىڭ باسى مەن 80 جىلداردىڭ ورتاسىنا دەيىن جۇرگىزىلدى. بىراق, گەرمانيادا بۇل تۇرعىدا تاجىريبە مول. ونى بىزگە 5 جىلدىڭ ىشىندە ۇيرەنىپ الۋعا بولادى. ونىڭ ۇستىنە بىزدە بيە ورىستە جايىلادى. سوندىقتان ءبىزدىڭ قىمىز ءدامى مەن تابيعيلىعى جاعىنان اسىپ تۇسەدى. قازىر عالىمدار ەۋروپالىق ءادىستى قولدانا وتىرا, قىمىزدى الەمگە تانىمال ەتۋگە نيەتتى», - دەيدى ا. مۇقاشەۆ.
كەلەر جىلى اشىلۋى جوسپارلانعان ينستيتۋتتا جىلقى شاراۋشىلىعىنا ماماندار دايارلاۋ ماسەلەسى قولعا الىنادى. وسى جەردەن قىمىزعا سەرتيفيكات بەرۋ دە شەشىمىن تاباتىن بولادى.
«قازىر 200-گە جۋىق ساۋىن بيەم بار. قازاقستاندىقتار ءۇشىن بۇل كوپ ەمەس شىعار, بىراق مەندە بۇدان ارتىق وسىرەتىن جەرىم دە جوق. كۇن سايىنعى 600 ليتر قىمىزدىڭ 100 ءليترى عانا ساتىلادى. سوندىقتان ماعان قىمىزدىڭ وزگە دە قاسيەتتەرىن تەرەڭ بىلگەن ارتىق ەمەس. قىمىز قۇرامىن زەرتتەيتىن عىلىمي ينستيتۋت اشىلسا, وتاندىق ءونىمنىڭ ءورىسى كەڭەيەرى ءسوزسىز», - دەيدى گ. تسولمان.
باقىتبەك كەنەش ۇلى.
دەرەككوز: «24 kz»
فوتو: «24 kz».
