سۋرەتتە: جىتىقارا اۋداندىق پوليتسيا ءبولىمىنىڭ باستىعى بولات يمانوۆ
اقپاننىڭ اق بورانىنان كولىك جارىعى تاياق تاستام جەردەن ارىگە اسپايتىن كۇرە جولدىڭ ۇستىندە سوڭعى ەكى كۇن ىشىندە بىرلەسكەن قۇتقارۋ قىزمەتتەرى 14 اپاتتىق-قۇتقارۋ وپەراتسياسىن, 2 ىزدەستىرۋ شاراسىن جۇرگىزگەن. ناتيجەسىندە, جول بويىندا قار قۇرساۋىندا قالعان, ىشىندە ون شاقتى بالا بار, 169 ادام قۇتقارىلدى.
«اۆتوكولىك جولدارىندا قالىڭ قارعا باتىپ قالعان 25 اۆتوكولىكتى سۇيرەپ شىعارىپ, قاۋىپسىز جەرگە جەتكىزدىك. جالپى, سوڭعى ەكى كۇن ىشىندە قارلى بوراننىڭ سالدارىن جويۋ جۇمىستارىنا 55 قۇتقارۋشى, تجد مەن پوليتسيا دەپارتامەنتىنىڭ 116 تەحنيكاسى قاتىستى. 37 ارنايى تەحنيكا مەن جول قىزمەتىنىڭ 50 جۇمىسشىسى اۆتوكولىك جولدارىنداعى قار ۇرلەپ تاستاعان جەرلەردى ارشۋ جۇمىستارىمەن اينالىسىپ جاتىر», - دەدى توتەنشە جاعداي دەپارتامەنتىنىڭ باستىعى ءبىرجان كارىموۆ.
سوڭعى ەكى كۇن ىشىندە قارلى بوراننىڭ سالدارىنان كۇرە جولداردا كولىك قاقتىعىسى دا جيىلەدى. ماسەلەن, 23 اقپان كۇنى ساعات 14:00 شاماسىندا قوستاناي – قارابۇتاق باعىتىنداعى كۇرە جولدىڭ بويىنداعى ايەت وزەنىنەن وتەتىن كوپىردىڭ ۇستىندە 5 بىردەي اۆتوكولىكتىڭ سوقتىعىسىپ قالدى. وبلىستىق پوليتسيا دەپارتامەنتى باسشىسىنىڭ كەڭەسشىسى ەلەنا كاشارينانىڭ ايتۋىنشا, جكو ناتيجەسىندە «لەكسۋس» اۆتوكولىگىنىڭ جۇرگىزۋشىسى دەنە جاراقاتىن العان. «اۋەلى «فولكسۆاگەن» اۆتوكولىگى مەن شاعىن اۆتوبۋس سوقتىعىسىپ قالادى. جول اپاتىنا تۇسكەندەردىڭ جاعدايىن بىلمەك بولىپ تاعى ءبىر شاعىن اۆتوبۋس كەلىپ توقتاعاندا, ونىڭ ارتىنان قىتايلىق جۇك كولىگى كەلىپ سوققان. كەيىن تورتەۋىنە «لەكسۋس» كەلىپ سوعىلادى» - دەدى ە.كاشارينا.
قۇتقارۋشىلار اقپاننىڭ اجال ۇرلەگەن دۇلەي بورانىنان اراشالاپ قالعان جولاۋشىنىڭ ءبىرى – جىتىقارا قالاسىنىڭ تۇرعىنى كۇلاش كوبەنوۆا. ول 23-اقپان كۇنى بوران ەندى باستالىپ جاتقاندا تاكسيگە ءمىنىپ قوستانايدان جىتىقاراعا قاراي جولعا شىققان. ءبىرازدان كەيىن اينالا اقتۇتەككە اينالىپ, جولدى كورۋ قيىنعا سوعا باستايدى. جىتىقاراعا 30 شاقىرىم قالعاندا ء تورت جولاۋشى مىنگەسكەن «ۆاز 21114» اۆتوكولىگى باعىتىن جوعالتىپ, جول شەتىنە شىعىپ كەتەدى. بيىك جولدىڭ شەتىندەگى قالىڭ قارعا جارتىلاي باتىپ قالعان كولىكتى ادام كۇشىمەن سۇيرەپ شىعارۋ مۇمكىن ەمەس.
ء«بىز جىتىقارا قالاسىنىڭ پوليتسيا بولىمىنە حابارلاسىپ كومەك سۇرادىق. كەزەكشى: «كۇتىڭىزدەر, قازىر قۇتقارۋ جاساعى جولعا شىعادى» - دەدى. ايتقانداي-اق, قۇتقارۋشىلار دا تەز جەتتى», - دەيدى ك.كوبەنوۆا.
قار قۇرساۋىندا قالعان جولاۋشىلاردان حابار تۇسىسىمەن جىتىقارادا اۋداندىق پوليتسيا ءبولىمى باستىعىنىڭ جەتەكشىلىك ەتۋىمەن ارنايى توپ قۇرىلىپ, قۇتقارۋشىلار دەرەۋ جولعا شىعادى. وقيعا ورنىنا ەكى «ۋاز» كولىگىمەن جەتكەن قۇتقارۋ توبى قار قۇرساۋىندا قالعان جولاۋشىلاردى ءوز كولىكتەرىنە مىنگەستىرىپ, كەرى قايتادى. بىراق كولىكتەرى كۇرتىك قارعا قايتا-قايتا باتىپ قالا بەرگەن سوڭ, پوليتسەيلەردىڭ وزدەرى كولىكتەن ءتۇسىپ جاياۋ جۇرۋگە تۋرا كەلگەن. ەكى شاقىرىمنان كەيىن پريگورودنوە ەلدى مەكەنىنە جەتكەن قۇتقارۋشىلار جولاۋشىلاردى جەرگىلىكتى كاسىپكەردىڭ كۇزەت عيماراتىنا ورنالاستىرادى.
«قۇتقارۋشىلار كەلىپ جەتپەگەندە, امان قالۋىمىز ەكىتالاي ەدى. ويتكەنى, العاش جول شەتىندەگى قالىڭ قارعا جارتىلاي باتىپ قالعان كولىگىمىزدى بوران ءاپ ساتتە كورسەتپەي تاستادى. كولىكتىڭ ەسىگىن اشپاق تۇرماق, جانىنا جاقىنداي الماي قالدىق. اياق-قولىمىزدان جان كەتىپ, ءۇمىت ۇزىلە باستاعاندا قۇتقارۋشىلار دا جەتتى», - دەدى جولاۋشىلاردىڭ ءبىرى تاتيانا مىسليك.
جول كۇزەتىندەگى ءتارتىپ ساقشىلارى سوڭعى تاۋلىكتىڭ ىشىندە 40-تان استام اۆتوكولىكتى قار قۇرساۋىنان الىپ شىققان.
وبلىستىق توتەنشە جاعداي دەپارتامەنتىنىڭ مالىمەتىنشە, قارلى بورانعا بايلانىستى وڭىردە رەسپۋبليكالىق جانە وبلىستىق ماڭىزى بار 19 اۆتوكولىك جولىنىڭ جەكەلەگەن ۋچاسكەلەرىندە ءالى دە كولىك قوزعالىسىنا رۇقسات جوق.
