پاۆلودار وبلىسىندا ءبىلىم بەرۋ سالاسىنداعى ءبىراز بىلىقتىڭ بەتى اشىلدى

ايماقتار • 25 اقپان، 2021

پاۆلودار وبلىسىندا ءبىلىم بەرۋ سالاسىنداعى ءبىراز بىلىقتىڭ بەتى اشىلدى

58 رەت كورسەتىلدى

بۇل تۋرالى پاۆلودار وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى ەركىمبەك ايازباەۆ ءمالىم ەتتى، دەپ حابارلايدى Egemen.kz Pavlodarnews.kz سايتىنا سىلتەمە جاساپ.

جانبولات كەنجەعۇل

- دەپارتامەنتىمىز 2020 جىلى 62 مەملەكەتتىك تەكسەرۋ جۇرگىزدى. 2020 جىلى دەپارتامەنتكە زاڭدى جانە جەكە تۇلعالاردان 19 ءوتىنىش كەلىپ ءتۇستى. ونىڭ جەتەۋى قۇزىرەتى بويىنشا باسقا مەملەكەتتىك ورگاندارعا جولداندى، 12-ءسى بويىنشا ءوتىنىش بەرۋشىلەرگە جاۋاپ بەرىلدى، - دەدى ەركىمبەك ايازباەۆ.

سپيكەردىڭ ايتۋىنشا، تۇسكەن شاعىمدار بويىنشا وتكەن جىلى بالاسىنىڭ ساباققا قاتىسۋىن قامتاماسىز ەتپەگەن ءبىر اتا-اناعا شارا قولدانىلعان. سونداي-اق اقسۋدا «پەداگوگ مارتەبەسى تۋرالى» زاڭدى بۇزعان ديرەكتورعا شارا قولدانىلعان. ول بىرنەشە پەداگوگتى مىندەتتەرىنە جاتپايتىن مەكتەپ اۋلاسىن اباتتاندىرۋ جۇمىسىنا تارتقان. مەكتەپ ديرەكتورىنا اكىمشىلىك كودەكس بويىنشا ەسكەرتۋ بەرىلگەن.

سونىمەن قاتار، دەپارتامەنت باسشىسى ەكىباستۇزداعى قىزمەتكەرلەرىنە قىرىنداعان مەكتەپ ديرەكتورىنا قاتىستى ءىس تۋرالى ايتتى.

- ەكىباستۇزداعى ديرەكتورعا قاتىستى اكىمشىلك ءىس قوزعالدى. اكىمشىلىك كودەكستىڭ 409-بابى بويىنشا بارلىق جاۋاپ الىندى. ءبىزدىڭ تاراپىمىزدان ديرەكتورعا 30 ايلىق ەسەپتىك كورسەتكىش مولشەرىندە ايىپپۇل سالىندى، - دەدى ەركىمبەك ايازباەۆ.

سونداي-اق وتكەن جىلى وبلىستىا ۇلتتىق بىلىكتىلىك تەستىلەۋىنە ءبىلىم بەرۋ ۇيىمدارىنىڭ 6621 پەداگوگ قىزمەتكەرى قاتىسقان. ونىڭ ىشىندە 95-ءى تىيىم سالىنعان زاتتاردى پايدالانعانى ءۇشىن شىعارىلدى.

دەپارتامەنت باسشىسى 2020 جىلدىڭ ماۋسىم ايىنداعى ۇلتتىق بىرىڭعاي تەستىلەۋگە 2020 جىلدىڭ 4855 تۇلەگى، وتكەن جىلدار مەن تجكب تۇلەكتەرى ءوتىنىش بەرىپ، تەستىلەۋگە 4395 ادام كەلگەنىن اتاپ ءوتتى.

- قاتىسۋ دەڭگەيى 90،5 پايىزدى قۇرادى. ۇبت كەزىندە كىرەبەرىستە تىيىم سالىنعان زاتتارمەن ۇستالعان 43 ادامعا كىرۋگە رۇقسات بەرىلگەن جوق. تەستىلەۋ كەزىندە تالاپكەرلەر تىيىم سالىنعان زاتتاردى قولداندى، مينيسترلىك وكىلدەرى تىيىم سالىنعان 55 زاتتى تاركىلەدى، - دەدى ەركىمبەك ايازباەۆ.

دەپارتامەنت مەكتەپتەر مەن تەحنيكالىق جانە كاسىپتىك ءبىلىم بەرۋ ۇيىمدارىنان ليتسەنزيالار مەن ولارعا قوسىمشالار الۋعا 549 ءوتىنىشتى قارادى. ونىڭ ىشىندە 300 (54،6%) – ليتسەنزيالار مەن ليتسەنزيالارعا قوسىمشالار بەرىلدى، 162 (29،5%) – قايتارىپ الىندى، 87 (15،8%) – باس تارتىلدى. باس تارتۋدىڭ نەگىزگى سەبەبى – ءوتىنىش بەرۋشىلەردىڭ بىلىكتىلىك تالاپتارىنا سايكەس كەلمەۋى.

فوتو: اشىق دەرەككوزدەردەن

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز