تۇركىستاندا شىعارماشىل جاستاردى قولداۋ قورى اشىلدى

رۋحانيات • 25 اقپان، 2021

تۇركىستاندا شىعارماشىل جاستاردى قولداۋ قورى اشىلدى

73 رەت كورسەتىلدى

تۇركىستان قالاسىندا «ساتتار ەرۋباەۆ اتىنداعى شىعارماشىل جاستاردى قولداۋ قورى» اشىلدى. قوردى ۇيىمداستىرۋعا جاستار رەسۋرستىق ورتالىعى ۇيىتقى بولىپ وتىر، دەپ حابارلايدى Egemen.kz.

عالىمجان ەلشىباي

اتالعان يدەيانىڭ باستاماسى رەتىندە بىلتىر وبلىس دەڭگەيىندە ساتتار ەرۋباەۆ اتىنداعى شىعارماشىل جاستار بايقاۋى وتكەن بولاتىن. بايقاۋ ادەبيەت پەن مادەنيەتتىڭ 8 باعىتىن قامتىعان. وبلىستىڭ تۇكپىر-تۇكپىرىندەگى ونەرلى جاستاردىڭ اراسىندا «ۇزدىك جاس ءمۇسىنشى»، «ۇزدىك جاس ديزاينەر»، «ۇزدىك جاس قولونەرشى»، «ۇزدىك جاس عالىم»، «ۇزدىك جاس ءانشى»، «ۇزدىك جاس ايتىسكەر» نوميناتسيالارى بويىنشا وتكەن باسەكەگە تولى بايقاۋ كوپشىلىكتىڭ كوڭىلىنەن شىقتى. يگى باستاما ەل كولەمىندە ۇلت رۋحانياتىنا ەڭبەك ءسىڭىرىپ جۇرگەن جاس شىعارماشىل جاستارعا قولداۋ كورسەتۋ ماقساتىندا ارنايى قور قۇرۋعا ۇلاسىپ وتىر. اتالعان قور جىلىنا ءبىر رەت رەسپۋبليكامىزداعى ەڭ ۇزدىك شىعارماشىل جاستار اراسىندا پوەزيا، ءداستۇرلى ءان، رومان، پروزا، اڭگىمە، ايتىس، عىلىم، قولونەر، زەرگەرلىك ونەر جانە ۇلتتىق ۇلگىدەگى كيىم ديزاينى بويىنشا نوميناتسيالار يەلەرىن انىقتاپ، قارجىلاي جۇلدەلەرمەن ماراپاتتايتىن بولادى. ياعني ارنايى كوميسسيا ۇزدىكتەردى انىقتاپ، تۇركىستاندا تالانتتى جاستاردىڭ باسىن قوسادى.

«ساتتار ەرۋباەۆ اتىنداعى شىعارماشىل جاستاردى قولداۋ قورىنىڭ» توراعاسى ايبەك مارات ۇلى ارنايى ۇيىمداستىرىلعان قايىرىمدىلىق كەشتە قوردىڭ الداعى ۋاقىتتاعى جۇمىس جوسپارىمەن تانىستىردى. قايىرىمدىلىق بالدىڭ وزگە شارالاردان ەرەكشەلىگى – تۇركىستان وڭىرىنە بەلگىلى قولونەرشى مامىت جاڭابەكتىڭ قولىنان شىققان مۇسىندەر جانە سۋرەتشى ءادىلحان مالىكتىڭ سۋرەتتەرى اۋكتسيونعا قويىلدى. «بىلتىر 2020 جىل «ەرىكتىلەر جىلى» دەپ جاريالانسا، بيىل 2021 جىل «قايىرىمدى ىستەر جىلى». قايىرىمدى ءىس تەك قانا ماتەريالدىق كومەك نەمەسە ازىق-ت ۇلىك تاراتۋمەن شەكتەلمەيدى. ونىڭ اۋقىمى كەڭ. ءبىز ەل ىشىندەگى ۇلتتىق ءداستۇردى ولتىرمەي جانە ونەر مەن ادەبيەتتى دارىپتەپ كەلە جاتقان شىعارماشىل جاستارعا قولداۋ كورسەتكىمىز كەلەدى. تۇركىستان ءسوز جۇزىندە عانا ەمەس، ءىس جۇزىندە دە رۋحاني ورتالىققا اينالۋى ءتيىس»، دەيدى «جاستار رەسۋرستىق ورتالىعىنىڭ» باسشىسى، وبلىستىق ءماسليحات دەپۋتاتى امالبەك ءومىرتاي.

جاس تالانتتاردىڭ العاشقى قولداۋشىسى رەتىندە قايىرىمدىلىق شاراعا وبلىستىق، قالالىق ءماسليحات دەپۋتاتتارى، جەكە كاسىپكەرلەر، زيالى قاۋىم وكىلدەرى مەن مەملەكەتتىك قىزمەتكەرلەر قاتىستى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز