ايماقتار • 24 اقپان، 2021

ادام ءومىرى ءۇشىن ارپالىس

22 رەت كورسەتىلدى

اقپاننىڭ 22-ءcى كۇنى اتىراۋ-ورال تاسجولىندا بولعان جانتۇرشىگەرلىك جول اپاتىنان 6 ادام قازا بولعان ەدى. وسى وقيعا كەزىندە اۋىر جاراقات العان ءبىر ادامنىڭ ءومىرى ءۇشىن دارىگەرلەر اجالمەن ارپالىسىپ جاتىر، دەپ حابارلايدى Egemen.kz

باتىس قازاقستان وبلىسىنىڭ اقجايىق اۋدانىنا قاراستى اتامەكەن اۋىلى ماڭىندا «تويوتا كوروللا» مەن «لادا پريورا» كولىگى بەتپە-بەت سوقتىعىسىپ، 4 ايەل، 2 ەر ادام قازا تاپقان ەدى. اپاتتان «تويوتا» كولىگىندەگى اتىراۋ وبلىسىنىڭ تۇرعىنى، 42 جاسار ەر ادام عانا امان قالعان. «جەدەل جاردەم» قىزمەتكەرلەرى ونى ەڭ جاقىن جەرگە – تايپاق اۋىلىنداعى اۋرۋحاناعا جەتكىزگەن ەدى.

اۋىل اۋرۋحاناسىنىڭ دارىگەرلەرى جولاۋشىعا العاشقى مەديتسينالىق كومەك كورسەتىپ، اۋىرسىنۋعا قارسى شارالار قولداندى. جاراقات ونىڭ ىشكى قۇرىلىسىندا ەكەن. سول كۇنى تۇنگى ساعات 22-گە قاراي ناۋقاستىڭ جاعدايى ناشارلاي باستايدى. تەز ارادا چاپاەۆ اۋىلىنان اقجايىق اۋداندىق اۋرۋحاناسىنان حيرۋرگيالىق توپ شاقىرىلدى. حيرۋرگ داۋرەن كۇدەسوۆ، اۋرۋحانا ديرەكتورى، جوعارى ساناتتى حيرۋرگ الماس جۇنىسبەكوۆ تايپاققا جەدەل اتتاندى.

حيرۋرگتەر تايپاق اۋرۋحاناسىنا جەتىسىمەن جەدەل وتاعا كىرىسكەن. الايدا كۇردەلى وتا كەزىندە ارىپتەستەردىڭ اقىل-كەڭەسى ءارى كومەگى قاجەت بولدى. ورال قالاسىنان مامان شاقىرتۋعا الاي-تۇلەي سوققان بوران مۇرشا بەرمەدى. وسى كەزدە كورشىلەس جاڭاقالا اۋداندىق اۋرۋحاناسىنىڭ باس دارىگەرى، جوعارى دارەجەلى حيرۋرگ، وتا جاساۋدا 14 جىلدىق ەڭبەك ءوتىلى بار سەرجان ەسەنگوبەكوۆ كومەككە اتتاندى. الايدا 150 شاقىرىمداي جول ءجۇرىپ، اقجايىق اۋدانى ورتالىعىنا جەتكەنىمەن، تايپاققا دەيىن ءالى دە الىس ەدى. ونىڭ ۇستىنە اۋا رايىنىڭ قولايسىزدىعىنا بايلانىستى اۆتوجولدار جابىلعان. بىلىكتى حيرۋرگتىڭ ادام ءومىرىن قۇتقارۋ ءۇشىن الىس جولعا شىققانىن ەستىگەن جول پوليتسياسى قىزمەتكەرلەرى سەرجان سەرىك ۇلىن وزدەرىنىڭ پاترۋلدىك كولىگىمەن تايپاققا جەتكىزەدى. ءسويتىپ، اسا كۇردەلى وتا ءوز ۋاقىتىندا جاسالعان.

– حيرۋرگتار وتا ۇستەلىندە 10 ساعات-تان ارتىق ۋاقىت بويى اجالمەن ارپالىستى. قازىر ناۋقاستىڭ جاعدايى ءالى دە اۋىر، تاسىمالداۋعا كەلمەيدى. دەگەنمەن ەڭ باستى قيىندىق ارتتا قالدى، وتا جاسالدى. دارىگەرلەر ءوز قولىنان كەلەتىننىڭ ءبارىن جاساپ جاتىر. ناۋقاس جازىلىپ، قاتارعا قوسىلادى دەگەن ءۇمىتىمىز بار، – دەيدى باتىس قازاقستان وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ساۋلە زاعيدۋللينا.

ارينە، بۇل جەردە دارىگەرلەر عانا ەمەس، پوليتسيا، توتەنشە جاعدايلار قىزمەتى دە بارىنشا جەدەل ءارى ۇيىمداسا قىزمەت كورسەتۋدە. ادام ءومىرى ءۇشىن ۋاقىتپەن دە، تابيعاتتىڭ توسىن مىنەزىمەن دە ساناسپاي، كومەك قولىن سوزعان بارشا ماماندارعا مىڭ سان العىس!

سوڭعى جاڭالىقتار

«كيىك جاپپاي قىرىلىپ جاتىر»..

ايماقتار • بۇگىن، 14:15

پنەۆمونيادان 5 ادام قايتىس بولدى

كوروناۆيرۋس • بۇگىن، 10:00

شقو-دا تۇرعىندار ەۆاكۋاتسيالاندى

ايماقتار • 09 ءساۋىر، 2021

تاسقىن قاۋپى اۋەدەن زەرتتەلدى

ايماقتار • 09 ءساۋىر، 2021

الماتىدا تاۋ باۋرايى وتقا وراندى

ايماقتار • 09 ءساۋىر، 2021

ۇقساس جاڭالىقتار