جىر الىبىن جىرمەن اسپانداتقان الامانعا قازاقستاننىڭ ەڭبەك سىڭىرگەن قايراتكەرى, حالىقارالىق «ايتىس اقىندارى مەن جىرشى-تەرمەشىلەر» وداعىنىڭ باسقارما توراعاسى, اقىن ءجۇرسىن ەرمان, پروفەسسور, فيلولوگيا عىلىمدارىنىڭ دوكتورى تەمىرحان تەبەگەنوۆ, ايتىستىڭ شوق جۇلدىزى بەكارىس شويبەكوۆ, مادەنيەت قايراتكەرى, بەلگىلى ايتىسكەر سەرىك قاليەۆ, 2020 جىلعى «التىن دومبىرا» يەگەرى ايتىسكەر رۇستەم قايىرتاي ۇلى, حالىقارالىق جامبىل قورىنىڭ توراعاسى, اقىن ماناربەك ءىزباساروۆ, قازاقستاننىڭ ەڭبەك سىڭىرگەن ءارتىسى ەرجان قوسبارماقوۆ سىندى ونەر مايتالماندارى قازىلىق ەتتى.
بەكارىس شويبەكوۆ ارناۋمەن اشقان جىر مەرەكەسى ءبىلىم وشاعىنىڭ رەكتورى تاحير بالىقباەۆتىڭ اقىندارعا ءسات-ساپار تىلەۋىمەن باستالدى. ءسوز سايىسىنا تۇسكەن جيىرما اقىننىڭ 12-ءسى فينالعا جولداما الدى. ايتىس ەرەجەسىنە ساي قاعىتپا قالجىڭ, اسەرلى ازىلدەن باستاپ باۋىرلاس قىرعىز بەن قازاق اراسىنداعى الەۋمەتتىك ماسەلەلەردى دە جاس شايىرلار جىرعا ارقاۋ ەتتى. ءسۇيىنباي مەن قاتاعان سەكىلدى تۇلعالاردىڭ تاريحي كەلبەتى دە ولەڭ تىلىمەن ورنەكتەلدى.
ەكى كۇنگە سوزىلعان ايتىستىڭ اقتىق مارەسىندە اۋزىمەن قۇس تىستەگەن شىن جۇيرىكتەر سۋىرىلىپ العا شىقتى. ايتىس قورىتىندىسى بويىنشا Nur Otan پارتياسىنىڭ ارنايى جۇلدەسى گۇلجان ىقىلاسقا, ءسۇيىنباي ارون ۇلى اتىنداعى ارنايى جۇلدە جانارىس تىلەۋبەككە, حالىقارالىق جامبىل قورىنىڭ جۇلدەسى قايىرحان جۇبانيازوۆقا, ءجۇرسىن ەرمان اتىنداعى ارنايى جۇلدە بەكارىس وسپانوۆقا, ورازالى دوسبوسىنوۆ اتىنداعى ارنايى جۇلدە جامالي ايبىنعا, ەسەنقۇل جاقىپبەك اتىنداعى جۇلدە راسۋل ساۋىتبەككە بۇيىرىپ, اقىندارعا قارجىلاي سىياقى تابىستالدى.
ال جۇلدەلى ءۇشىنشى ورىن تەڭ دارەجەدە ونەر كورسەتكەن ءۇش اقىنعا بۇيىردى. ولار شىناربەك تۇرسىن (قىتاي), قابدوللا بەيسحان (موڭعوليا) جانە التىناي قاناپيا (قازۇپۋ). ەكىنشى ورىنعا نۇربول جاۋىنباەۆ (قازۇۋ) پەن دانيار نىسانعاليەۆ (قازۇپۋ) لايىق دەپ تانىلدى. I ورىن قىرعىز ەلىنەن كەلگەن جاس ايتىسكەر نۇرسۇلتان مالدىباەۆتىڭ قانجىعاسىنا بايلاندى. قازىلاردىڭ شەشىمىنەن ءسوز بارىمتاسىندا شاشاسىنا شاڭ جۇقتىرماعان بەكجان بازاربەك (قازۇۋ) باس جۇلدەنى جەڭىپ الدى. جامبىلدىڭ داڭعىل جولىن جىرمەن كومكەرگەن جاس شايىرلارعا ۇيىمداستىرۋشىلار القاسى تاعايىنداعان قوماقتى اقشالاي سىيلىقتار تابىس ەتىلدى.
– جامبىل قازاق جىرىنىڭ الداسپانى. بۇگىنگى دودادا باق سىناعان ورەندەر بيىك دەڭگەيدە ونەر كورسەتتى, تاقىرىپتى جان-جاقتى اشا ءبىلدى. ۇلى بابالارىنىڭ رۋحىنا جىرمەن ەسكەرتكىش قويدى.تالاپتىڭ وتى ارىنداعان جاس تالانتتار قازاق ايتىسىنىڭ بولاشاق جۇلدىزدارىنا اينالادى دەپ سەنەمىز, – دەيدى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاحير بالىقباەۆ.
الماتى
