ايماقتار • 23 اقپان، 2021

جانعان ءۇيدىڭ تۇرعىندارى نازاردان تىس قالمايدى

15 رەت كورسەتىلدى

كەشە «ەق» سايتىندا پەتروپاۆلدىڭ بەس قاباتتى ۇيىندە تومەنگى قاباتتاعى كافەدە جارىلعان گاز بالونىنىڭ كەسىرىنەن ۇلكەن ءورت بولىپ، ءۇيدىڭ ءبىر كىرەبەرىسى تولىق ورتتەنىپ، كوپتەگەن ادامداردىڭ جاپا شەككەنىن ايتقان بولاتىنبىز.

بۇگىن اپات ورنىنا وبلىس اكىمى قۇمار اقساقالوۆ بارىپ، بولعان جايدى ءوز كوزىمەن كوردى. جۋرناليستەرگە بەرگەن بريفينگىندە ول قازا بولعانداردىڭ وتباسىنا كوڭىل ايتتى جانە اۋرۋحانادا جاتقانداردىڭ تەزىرەك ساۋىعىپ كەتۋىنە تىلەكتەس ەكەندىگىن جەتكىزدى. اكىم ءوزىنىڭ ويىن بىلاي قورىتتى: «مۇنداي اپاتقا ەندى جول بەرمەس ءۇشىن مەن كوپقاباتتى ۇيلەردە كاسىپ اشقان بارلىق كاسىپكەرلەرگە عيماراتقا گاز بالوندارىن اكەلۋگە، قولدانۋعا قاتاڭ تيىم سالامىن. بۇل تالاپتى جەدەل ورىنداۋ ءۇشىن قۇقىق قورعاۋ ورگاندارىنىڭ، پروكۋراتۋرانىڭ، تج ۇيىمىنىڭ، قالالىق اكىمدىك پەن «اتامەكەن» كاسىپكەرلەر پالاتاسىنىڭ، قوعام وكىلدەرىنىڭ قاتىسۋىمەن كوميسسيا قۇرىلىپ، بارلىق شاعىن كاسىپورىندار تەكسەرىلەتىن بولادى»، دەدى. سونىمەن قاتار اكىم ءۇيدى قالپىنا كەلتىرۋگە قالالىق اكىمدىكتەن قاراجات بولىنەتىندىگىن ايتتى. «وسىنداعى بولمەلەردىڭ يەلەرىنە ءبىر رەتتىك ماتەريالدىق كومەك بەرىلەتىن بولادى. بىردە ءبىر ادام نازاردان تىس قالمايدى»، دەدى ول.

د

وسىدان كەيىن وڭىرلىك كوممۋنيكاتسيالار قىزمەتىنىڭ الاڭىندا تج سالدارى جانە زارداپ شەككەندەرگە كومەك كورسەتۋ بويىنشا قابىلدانىپ جاتقان شارالار تۋرالى تج دەپارتامەنتىنىڭ باستىعى راميل كامالوۆ پەن قالا اكىمى بولات جۇمابەكوۆ ءباسپاسوز ءماسليحاتىن وتكىزدى.

ءۇيدىڭ تولىق مەكەن-جايى ينتەرناتسيونال كوشەسىندەگى 21 ءۇي. بۇل قالانىڭ قاق ورتاسىندا ورنالاسقان عيمارات، بۇرىن ول «كيروۆ اتىنداعى زاۋىتتىڭ» جاتاقحاناسى بولعان. كەيىن تۇرعىندار جەكەشەلەندىرىپ العان ەكەن. ءۇيدىڭ ەكى كىرەبەرىسى بار. بارلىق بولمەلەر سانى 109. جاتاقحانا 1971 جىلى پايدالانۋعا بەرىلگەن. بولمەلەردىڭ اراسى كىرپىشپەن بولىنگەن، ال توبەسى بەتون پليتالاردان تۇرادى. مۇندا گاز ەنگىزىلمەگەن، تۇرعىندار اس-سۋلارىن ەلەكتر پليتالارىندا دايىندايدى.

ال ءۇيدىڭ ءبىرىنشى قاباتى ءتۇرلى كاسىپورىندارعا جالعا بەرىلگەن. سونىڭ ىشىندە «قارا جورعا» مەن «حوچۋ شاشلىكا» اتتى ەكى كافە بولعان. تج دەپارتامەنتىنىڭ باستىعى ر.كامالوۆتىڭ ايتۋىنا قاراعاندا جارىلىستىڭ ەپيتسەنترى «قارا جورعا» كافەسى بولعان. گاز بالونى وسى جەردە جارىلعانى انىقتالعان. بۇل قىتايدان ورالعان قانداسىمىز اشقان كافە ەدى. جىگىتتىڭ ءوزى وقيعا ورنىندا قازا بولدى. ونىمەن ىرگەلەس «حوچۋ شاشلىكا» كافەسى مەن «ۆەرسال» اتتى شاشتراز بولعان. جارىلىستان ورتاق قابىرعا قۇلاپ، جالىنداعان ءورت بارلىق كىرەبەرىستەگى پاتەرلەردى شارپىعان. الدىمەن ەكىنشى قاباتتاعى №22 جانە №24 بولمەلەرگە جەتكەن. ءبىرىنشى كىرەبەرىس ءورت قۇشاعىندا قالىپ، توبەسى قۇلاپ، ۇيگە كىرۋگە مۇمكىندىك بەرمەگەن. ورتسوندىرۋشىلەردىڭ العاشقى ماشيناسى وقيعا ورنىنا كۇندىزگى ساعات تورتتە جەتكەن. ولاردىڭ بولجاۋىنشا ءورت شارپىعان ايماقتىڭ كولەمى 110 شارشى مەتر. ءورت ءسوندىرۋ ءتورت ۋچاسكە ارقىلى جۇرگىزىلگەن. وعان بارلىعى 83 ادام مەن تج دەپارتامەنتىنىڭ 17 تەحنيكاسى قاتىستىرىلعان.

تج قىزمەتكەرلەرىنىڭ كومەگىمەن 120 ادام ەۆاكۋاتسيالانعان. ونىڭ 57 سول ماڭداعى №2 ورتا مەكتەپكە ەنگىزىلگەن. سولاردىڭ ىشىندە 10 ادام سولتۇستىك قازاقستان ۋنيۆەرسيتەتىنىڭ جاتاقحاناسىنا ورنالاسۋدى ءجون كورگەن. ول دا سول ماڭدا ورنالاسقان. ال 63 ادام وزدەرىنىڭ تۋىستارىنىڭ ۇيىنە بارۋدى قالاعان. مەكتەپ پەن ۋنيۆەرسيتەتتىڭ جاتاقحاناسىنا ورنالاستىرىلعاندارعا ىستىق تاماق ۇيىمداستىرىلعان. 

جاپا شەككەن 16 ادام اۋرۋحانالارعا جەتكىزىلگەن، سونىڭ ىشىندە 1996 جىلى تۋعان قانداسىمىز مەرت بولعانىن ايتتىق. ول كاسىپكەرلىكپەن اينالىسىپ، وسى كافەنى اشقان ەكەن. ۇيلەنگەن، ارتىندا ايەلى مەن جاس بالاسى بالاسى قالدى.

ال ارتىنان، قۇلاعان ۇيىندىلەردىڭ استىنان 1999 جىلى تۋعان جاس ايەلدىڭ دەنەسى تابىلعان. اۋرۋحانالارعا جەتكىزىلگەندەردىڭ ءبارى دە 30-40 جاستار اراسىنداعى جاس ازاماتتار. ەكەۋى جاس بالا. ۋلى گازعا تۇنشىعىپ، جاراقات العان 2020 جىلى تۋعان قىز بالانى اتا-اناسى اۋرۋحاناعا جاتقىزۋدان باس تارتىپ، ۇيىنە اكەتكەن. اۋرۋحاناداعى ادامداردىڭ 15 جارالانعان، سونىڭ 7 العاشقى كومەك العان سوڭ تۋىستارى ورنالاستىرىلعان جەرگە قايتتى.

ءورت كەشكى التىدان اسا ءسوندىرىلىپ، تولىقتاي كەشكى سەگىز كەزىندە تۇنشىقتىرىلدى. اۋانىڭ تەمپەراتۋراسى 20-22 گرادۋس سۋىق شاماسىندا بولدى. پوليتسيا ءورت ماڭىن تولىق قورشاپ، باسقا ادامداردىڭ بارۋىن، ءورت سوندىرۋشىلەرگە كەدەرگى كەلتىرمەۋىن قامتاماسىز ەتتى.

سولتۇستىك قازاقستان وبلىسى  

سوڭعى جاڭالىقتار

«كيىك جاپپاي قىرىلىپ جاتىر»..

ايماقتار • بۇگىن، 14:15

پنەۆمونيادان 5 ادام قايتىس بولدى

كوروناۆيرۋس • بۇگىن، 10:00

شقو-دا تۇرعىندار ەۆاكۋاتسيالاندى

ايماقتار • 09 ءساۋىر، 2021

تاسقىن قاۋپى اۋەدەن زەرتتەلدى

ايماقتار • 09 ءساۋىر، 2021

الماتىدا تاۋ باۋرايى وتقا وراندى

ايماقتار • 09 ءساۋىر، 2021

ۇقساس جاڭالىقتار