اتالعان شارانى جامبىل وبلىستىق تاريحي-ولكەتانۋ مۋزەيى مەن ماجار-قازاق «Barsz» قورى ۇيىمداستىردى.
جيىنعا بەينەبايلانىس رەجىمى ارقىلى وبلىس اكىمىنىڭ ورىنباسارى ەرجان جىلقىباەۆ قاتىسىپ, يشتۆان قوڭىر ماندوكيدىڭ تاعىلىمدى ومىرىنە توقتالدى. عالىمنىڭ مۇراسى ءتۇبى ءبىر تۇركى حالىقتارىنىڭ ورتاق قۇندىلىعى ەكەنىن جەتكىزدى. سونداي-اق, وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا ماديەۆا تاراز تورىندە ءوتىپ وتىرعان كونفەرەنتسيانىڭ ماڭىزدىلىعىنا توقتالىپ, بۇل شارا ەل تاۋەلسىزدىگىنىڭ 30 جىلدىعى قارساڭىندا قولعا الىنعان ءىرى جوبالاردىڭ ءبىرى ەكەنىن ايتتى. سونىمەن قاتار, جيىن بارىسىندا قازاقستان رەسپۋبليكاسىنىڭ ماجارستانداعى توتەنشە جانە وكىلەتتى ەلشىسى جانىبەك جاراسقان ۇلى, ماجار-قازاق «Barsz» قورىنىڭ پرەزيدەنتى اندراش گال, تۇركولوگ عالىم, ەتنوگراف كارا داۆيد شومفاي, «قازاق دياسپوراسىنىڭ» ءتورايىمى وڭايشا ماندوكي ءسوز سويلەدى.
جالپى, اتالعان حالىقارالىق كونفەرەنتسيادا عالىمدار قوڭىر ماندوكي شىعارماشىلىعىنا بايلانىستى باياندامالار جاسادى. عالىمنىڭ مول مۇراسى جونىندە اڭگىمەلەدى. ال جيىنعا مودەراتورلىق ەتكەن م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى تەمىرباي مۇقاشەۆ كونفەرەنتسيانى قورىتىندىلاپ, قاتىسۋشىلارعا العىس ايتتى. «كونفەرەنتسيانىڭ نەگىزگى ماقساتى – يشتۆان قوڭىر ماندوكيدىڭ باي رۋحاني مۇراسىن ناسيحاتتاۋ جانە ەلىمىزدە زەرتتەلۋىنە سەرپىن بەرۋ. سونىمەن قاتار ماندوكي زامانىنداعى ۇلى دالا وركەنيەتى مەن تۇلعالارى تۋرالى قازىرگى ۋاقىتتاعى سوڭعى زەرتتەۋلەردى عىلىمي اينالىمعا ەنگىزۋ, ناسيحاتتاۋ», دەيدى وبلىستىق تاريحي-ولكەتانۋ مۋزەيىنىڭ ديرەكتورى سەيىتجان ءىلياس.
جامبىل وبلىسى
