ايماقتار • 21 اقپان، 2021

ءتىلسىز جاۋ تاعى دا باس كوتەردى

652 رەت كورسەتىلدى

«جۇت جەتى اعايىندى» دەگەن راس-اۋ، كەشە عانا جامبىل وبلىسىنداعى جاڭاتاس قالاسىنداعى كوپقاباتتى ءۇيدىڭ بىرىنەن شىققان ورتتەن بەس بالا مەرت بولىپ قايعى جۇتىپ قالىپ ەدىك، بۇگىن پەتروپاۆل قالاسىنداعى بەس قاباتتى ءۇيدىڭ ءبىر كىرەبەرىسى تۇتاستاي ورتتەنىپ، ازىرگە بەلگىلى بولعانىنداي 2 ادام قازا بولىپ، ون ادام جاراقات الدى.

ءورت ورنىندا كەشكى ساعات 18.00-دە بولعانىمىزدا ول ءالى تۇتىندەپ جاتتى. وبلىس ورتالىعىنىڭ ورتسوندىرگىش قىزمەتتەرى مەن جەدەل-قۇتقارۋشىلار گازعا قارسى قۇرالمەن قىزۋ جۇمىس ىستەۋدە ەكەن. پوليتسيا دەپارتامەنتىنىڭ قىزمەتكەرلەرى اينالانى قورشاپ، قاۋىپسىزدىك ءۇشىن ەشكىمدى كىرگىزبەي قويعان. ءبىزدىڭ جۋرناليستىك كۋالىگىمىزدى كورگەن سوڭ عانا وقيعا ورنىنا جىبەردى.

سول جەردەگى كوز كورگەندەردىڭ ايتۋىنا قاراعاندا قۇتقارۋشىلار ادامداردى بىرنەشە زەمبىلمەن شىعارعان. قازىر جۇزدەن اسا تۇرعىن سول ماڭداعى №2 مەكتەپكە ورنالاستىرىلىپتى. قۇلاعان توبەلەر مەن زاتتاردىڭ اراسىندا قالعان ادامدار ىزدەستىرىلىپ جاتتى.

ءۇيدىڭ ءبىرىنشى قاباتىندا «قارا جورعا» اتتى كافە بار ەكەن. وبلىستىق توتەنشە جاعدايلار دەپارتامەنتىنىڭ باستىعى راميل كامالوۆتىڭ ايتۋىنا قاراعاندا ءورت وسى جەردەن شىققان دەپ بولجانۋدا. بىراق ءبىرىنشى قاباتتا ودان باسقا دا بىرنەشە كاسىپكەرلىك كەڭسەلەرى بولعان ەكەن. ءورت بالكي سولاردىڭ بىرىنەن شىعۋى مۇمكىن. ءبىز بارعان كەزدە دالادا بىرنەشە گاز بالوندارى جاتتى. سوعان قاراعاندا ءۇيدىڭ تۇرعىندارى دا اكەلەتىن گازدى پايدالانعان سياقتى.

ءۇيدىڭ كىرەبەرىسى قۇلاعان. قۇتقارۋشىلار ونى سىرىپ، جول سالىپ قانا ىشكە كىرە العان، سونداي-اق سىرتتان باسپالداقپەن كىرۋدە. ۇيلەردەن قالىڭ ءتۇتىن شىعىپ جاتقاندىقتان قۇتقارۋشىلاردىڭ جۇمىسىن قيىنداتا تۇسكەن. «قازىر وسى جەردە 14 تەحنيكا مەن 60-تان ارتىق ادام جۇمىس ىستەۋدە»، دەدى ر.كامالوۆ.

ءورت ماڭىندا ايعاي-شۋ، بايبالام، دۇربەلەڭ جوق. ورتسوندىرگىشتەر مەن پوليتسيا جاعدايدى تولىق باقىلاۋعا العان. ساعات 20.00 كەزىندە ءورت تولىق ىرىقتاندىرىلدى.

سوڭعى جاڭالىقتار

تاميلانىڭ تارتۋى

ونەر • كەشە

مۋتاتسيالانعان ۆيرۋس

مەديتسينا • كەشە

ۇقساس جاڭالىقتار