قوعام • 19 اقپان، 2021

ەلوردادا ەكى مىڭعا جۋىق ادام كوروناۆيرۋسقا قارسى ەكپە قابىلدادى

8 رەت كورسەتىلدى

ەلىمىزدە اقپان ايىنىڭ العاشقى كۇنىنەن باستاپ كوروناۆيرۋس ينفەكتسياسىنا قارسى ۆاكتسيناتسيالاۋ باستالعان بولاتىن. بۇگىن ەل استاناسىندا وتكەن ارنايى ونلاين بريفينگتە وسىعان دەيىن اتقارىلعان جۇمىستار جايلى ەسەپ بەرىلدى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

بريفينگكە قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا، نۇر-سۇلتان قالاسى العاشقى مەديتسينالىق سانيتاريالىق كومەكتى ۇيىمداستىرۋ ءبولىمىنىڭ باسشىسى ءاليا ومىرزاقوۆا قاتىستى.

«بۇگىنگى تاڭدا ەلوردادا ۆاكتسيناتسيانىڭ ءۇشىنشى اپتاسى اياقتالۋدا. ۆاكتسيناتسيا ەمحانالاردا ينفەكتسيالىق ستاتسيونارلاردىڭ، جەدەل مەديتسينالىق جاردەمنىڭ، العاشقى مەديتسينالىق-سانيتارلىق كومەك ۇيىمدارىنىڭ، كوپبەيىندى ستاتسيونارلاردا قابىلداۋ بولىمشەلەرىنىڭ مەديتسينا قىزمەتكەرلەرىنە جۇرگىزىلۋدە. ءتيىستى كونتينگەنتتەن (6300 ادام) بۇگىنگى كۇنى 1 980 ادام ۆاكتسيناتسيالاندى»، دەدى باسقارما باسشىسىنىڭ ورىنباسارى.

ول ءسوزىن جالعاي وتىرىپ، ۆاكتسيناتسيالانعانداردىڭ اراسىندا اسقىنۋلار بولماعانىن ايرىقشا اتاپ ءوتتى.

«قازىرگى ۋاقىتتا رەسەيلىك گام-كوۆيد-ۆاك ۆاكتسيناسىمەن جۇرگىزىلۋدە. پرەپارات ەكى كومپونەنتتى، ءۇش اپتا ارالىقپەن ەكى رەت ەنگىزىلەدى. ەكىنشى كومپونەنتپەن ۆاكتسيناتسيالاۋ 22 اقپاندا باستالادى. ۆاكتسيناتسيانىڭ تولىق كۋرسىنان كەيىن 1،5 اي ىشىندە اعزانىڭ يممۋندىق رەاكتسياسى تۋادى، سوندىقتان ۆاكتسيناتسيالانعاندارعا الدىن الۋ شارالارىن ساقتاۋدى جالعاستىرۋ قاجەت.

ۆاكتسينانىڭ كەلەسى جەتكىزىلىمى اقپان ايىنىڭ سوڭىنا كۇتىلۋدە»، دەدى ءاليا رۇستەموۆا.

ۆاكتسينالاردىڭ جاڭا پارتياسى كەلىپ تۇسكەن ۋاقىتتا مەديتسينا قىزمەتكەرلەرىن ەگۋ ارى قاراي جالعاسادى، سونداي-اق پەداگوگتاردى، كۇش قۇرىلىمدارىنىڭ قىزمەتكەرلەرىن، سوزىلمالى اۋرۋلارى بار ناۋقاستاردى جانە باسقا دا جۇرتتى كەزەڭ-كەزەڭىمەن ەگۋ باستالادى.

«العاشقى مەديتسينالىق-سانيتارلىق كومەك ۇيىمدارىندا ۆاكتسيناتسيا جۇرگىزۋ ءۇشىن ەگۋ كابينەتتەرى، كۇتۋ زالدارى فيزيكالىق قاشىقتىق تالاپتارىن ساقتاي وتىرىپ دايىندالدى، وندا ۆاكتسيناتسيالانعان ادامدار 30 مينۋت بويى مەديتسينالىق باقىلاۋدا بولۋى ءتيىس. ۆاكتسينالاردى تاسىمالداۋعا ارنالعان 20 مۇزداتقىش جانە 82 تەرموكونتەينەر بار. قوسىمشا 22 مۇزداتقىش قوندىرعى (120 ليتردەن) ساتىپ الىندى. بۇل قاجەتتىلىكتى تولىعىمەن جابادى. بارلىق ءتيىستى تۇلعالار كۆي-عا قارسى ۆاكتسيناتسيانى تىركەلگەن ەمحانالاردا تەگىن الاتىن بولادى»، دەپ ۆەدومستۆو وكىلى ءسوزىن اياقتادى.

سوڭعى جاڭالىقتار

ۇقساس جاڭالىقتار