القالى جيىنعا قاتىسۋشىلار ەلىمىزدەگى بارلىق مەكتەپتىڭ ماڭدايشالارىنا, ولاردىڭ تىلدىك ەرەكشەلىكتەرىنە قاراماستان, ىبىراي اتامىزدىڭ جاستاردى وقۋ مەن بىلىمگە شاقىراتىن «كەل, بالالار, وقىلىق!» دەگەن ۇندەۋىن جازىپ قويۋ تۋرالى باستامانى ۇلى اعارتۋشىنىڭ 180 جىلدىق تويىنا ورايلاستىرىپ, جۇمىلا جۇزەگە اسىرۋ ماسەلەسىن كوتەردى.
ارقالىق پەداگوگيكا ينستيتۋتى عىلىمي كونفەرەنتسيانى ۇلى اعارتۋشىنىڭ 180 جىلدىعىنا وراي ۇيىمداستىرىپ وتىر. عىلىمي جيىندى اتالعان جوعارى وقۋ ورنىنىڭ باسشىسى سەيىتبەك قۋانىشباەۆ اشتى.
– كونفەرەنتسيادا ى.ءالتىنساريننىڭ اعارتۋشىلىق-پەداگوگيكالىق قىزمەتىنىڭ ماڭىزى مەن ۇلى پەداگوگتىڭ جاھاندىق سىن-قاتەرلەر مەن وزگەرىستەر داۋىرىندەگى پەداگوگيكالىق يدەيالارىنىڭ بۇگىنگى كۇننىڭ ماسەلەلەرىمەن ساباقتاستىعى تۋرالى تىڭ پىكىرلەر قوزعالدى, – دەدى ينستيتۋت رەكتورى.
عىلىمي كونفەرەنتسياعا ىبىرايتانۋ سالاسىندا ەڭبەكتەنىپ جۇرگەن وتاندىق عالىمدار مەن تۇركيا, رەسەي عالىمدارى قاتىستى. ارقپي «رۋحاني جاڭعىرۋ» جوبالىق كەڭسەسىنىڭ ديرەكتورى رومان ايماعامبەت ۇلىنىڭ ايتۋىنشا, ەلباسىنىڭ «رۋحاني جاڭعىرۋ» باعدارلاماسى مەن « ۇلى دالانىڭ جەتى قىرى» باعدارلامالىق ماقالاسىنىڭ اياسىندا بۇگىندە تاريحىمىزعا قايتا ءۇڭىلىپ, تالاي تاريحي مۇرالار زەردەلەندى.
– قازىرگى كەزدە ءالتىنساريننىڭ قىزمەتى مەن ەڭبەگىنە عالىمدار جاڭاشا باعا بەرۋدە. كونفەرەنتسيا بارىسىندا ۇلى اعارتۋشىنىڭ پەداگوگيكالىق مۇراسىنىڭ جاڭاشىلدىعى مەن تاريحي ماڭىزى تۋرالى كوپتەگەن عىلىمي توپشىلاۋ ايتىلدى, – دەدى جوبالىق كەڭسە جەتەكشىسى.
قوستاناي وبلىسى
