قازاقستان • 17 اقپان، 2021

فرانتسيانىڭ ۇلكەن شىعىس ايماعى قازاقستانمەن كوپجاقتى ىنتىماقتاستىققا دايىن

9 رەت كورسەتىلدى

ۇلكەن شىعىس (فرانتسيا) وڭىرلىك كەڭەسى توراعاسىنىڭ ءبىرىنشى ورىنباسارى جان-ليۋك بول قازاقستانمەن جان-جاقتى ىنتىماقتاستىقتى دامىتۋعا مۇددەلىلىگىن ءبىلدىردى، دەپ حابارلايدى Egemen.kz

تاريحي دامىعان ەلزاس، لوتارينگيا، شامپان، ۆوگەز ايماقتارىن قامتيتىن ۇلكەن شىعىس قۋاتتى ەكونوميكالىق الەۋەتكە يە. اۆتوكولىك جاساۋ، جوعارى تەحنولوگيالىق ماشينا جاساۋ، مەتاللۋرگيا، اۋىل شارۋاشىلىعى ونىمدەرى جانە دامىعان «جاسىل ەكونوميكا» جىل سايىن وڭىرلىك ءىجو-ءنىڭ 150 ملرد ەۋروعا دەيىن ءوندىرىپ، ۇلكەن شىعىستى فرانتسياداعى جەتەكشى پوزيتسياعا شىعارۋدا. سونداي-اق 5،5 ملن حالقى جانە شۆەيتساريامەن شامالاس اۋماعى بار ءوڭىر الەمدىك نارىقتاعى باسەكەلەستىك ارتىقشىلىقتارىن سەنىمدى تۇردە ساقتاپ وتىر.

قازاقستاننىڭ باس كونسۋلى انۋاربەك احمەتوۆ وسى ءوڭىر باسشىلىعىنىڭ وكىلىن قازاقستانداعى اعىمداعى جاعدايمەن، مەملەكەت باسشىسى جۇرگىزىپ وتىرعان ساياسي باعىتپەن، سونداي-اق ەلىمىزدىڭ ەكونوميكالىق الەۋەتىمەن ەگجەي-تەگجەيلى تانىستىردى.

تاراپتار بىرلەسكەن جۇمىس جوسپارلارىن تالقىلاپ، ىنتىماقتاستىقتىڭ نەعۇرلىم كەلەشەگى مول باعىتتارىن، ياعني كولىكتىك ماشينا جاساۋ، جاڭارتىلاتىن ەنەرگەتيكا، اۋىل شارۋاشىلىعى، تاماق ونەركاسىبى، «جاسىل ەكونوميكا» جانە تسيفرلاندىرۋدى ايقىندادى.

كەلىسسوزدەردىڭ ماقساتى بولاشاقتا قازاقستاندا جانە ۇلكەن شىعىستا جاڭا جۇمىس ورىندارىن قۇرۋعا، ولاردىڭ باسەكەلەستىك ارتىقشىلىقتارىن نىعايتۋعا مۇمكىندىك بەرەتىن ىقتيمال بىرلەسكەن جوبالاردى ىزدەستىرۋ بولدى.

سونىمەن قاتار، ج-ل.بول قازاقستانمەن وڭىرلىك دەڭگەيدە، اكىمدىكتەرمەن جانە كومپانيالارمەن ناقتى جانە اتاۋلى جۇمىس ىستەۋگە دايىن ەكەنىن ءبىلدىردى. ماسەلەن، ارال تەڭىزىنىڭ قالپىنا كەلتىرىلۋىنە مۇددەلى بولا وتىرىپ، ول ءوڭىردىڭ قورشاعان ورتانى قورعاۋ سالاسىنداعى تاجىريبەسىن اتاپ ءوتتى.

فرانتسۋز تىلىنە اۋدارىلعان اباي شىعارمالارىنىڭ جيناعىن سىيعا العان ساياساتكەر ۇلى اقىن ءارى ويشىلدىڭ شىعارماشىلىعىنا شىنايى قىزىعۋشىلىق تانىتتى.

سوڭعى جاڭالىقتار

ۇقساس جاڭالىقتار