ايماقتار • 15 اقپان، 2021

گۇلشارا ابدىقالىقوۆا ارداگەرلەرمەن كەزدەستى

16 رەت كورسەتىلدى

بۇگىن قىزىلوردا وبلىسىنىڭ اكىمى گۇلشارا ابدىقالىقوۆا بايقوڭىر قالاسى، تورەتام كەنتى جانە اقاي اۋىلى ارداگەرلەرىمەن كەزدەستى.

- جىل باسىندا سىزدەرمەن كەزدەسىپ، ەلدەگى احۋال جايلى پىكىرلەسىپ، جۇزدەسۋدى ءجون كوردىم. ءبىز قاشاندا قارتتارىمىزدى ۇلىقتاپ، قۇرمەتىمىزدى تانىتىپ كەلەمىز. وبلىستا، اۋدانداردا، اۋىلدىق وكرۋگتەردە «ارداگەرلەر كەڭەسى» جۇمىسى جولعا قويىلعان. زەينەتكە شىقساڭىزدار دا، قوعامدىق جۇمىسقا بەلسەندى ارالاسىپ، جاستارعا ۇلگى بولىپ كەلەسىزدەر. الداعى ۋاقىتتا ايماقتاعى ماڭىزدى شارالاردى وزدەرىڭىزبەن بىرگە اقىلداسا وتىرىپ جۇزەگە اسىراتىن بولامىز، - دەدى گۇلشارا ابدىقالىقوۆا.

جيىندا بايقوڭىر كەشەنىنىڭ جۇمىسى مەن بايقوڭىر قالاسى، تورەتام كەنتى جانە اقاي اۋىلىنىڭ الەۋمەتتىك-ەكونوميكالىق دامۋى، دەنساۋلىق، تۇرعىن ءۇي كوممۋنالدىق، جول جانە الەۋمەتتىك ماسەلەلەر ءسوز بولدى.

سوڭعى وتىز جىلدا العاش رەت بايقوڭىر قالاسىنىڭ باس جوسپارىنا سايكەس 50 پاتەرلى 5 تۇرعىن ءۇيدىڭ قۇرىلىسى سالىنىپ، قولدانىسقا بەرىلدى. بيىل تاعى بەس كوپ پاتەرلى تۇرعىن ءۇيدىڭ قۇرىلىسى باستالادى دەپ جوسپارلانۋدا.

قالادا بارلىق كوپ پاتەرلى تۇرعىن ۇيلەر مەن كەيبىر شاعىن جانە ورتا بيزنەس نىساندارى گازداندىرىلىپ، تابيعي گازدى تولەۋ ءتاريفى وبلىس بويىنشا بىرىڭعاي تاريفپەن تەڭەستىرىلدى. بۇعان قوسا، سۋمەن جابدىقتاۋ جانە سۋ بۇرۋ جۇيەلەرىن جاڭعىرتۋ جۇمىستارى جۇرگىزىلەتىن بولادى.

سونىمەن قاتار، اقاي اۋىلىندا دەنە شىنىقتىرۋ-ساۋىقتىرۋ كەشەنىنىڭ، تورەتام كەنتىندە سۋمەن قامتاماسىز ەتۋ جۇيەسىنىڭ قۇرىلىستارى جۇرگىزىلەدى.

ال 2020 جىلى جۇمىسپەن قامتۋ جول كارتاسى اياسىندا بايقوڭىر قالاسىندا، تورەتام جانە اقاي ەلدى مەكەندەرىندە ەلەكتر جەلىلەرىن رەكونسترۋكتسيالاۋ، كوشەلەردى جوندەۋ جانە جارىقتاندىرۋ، ءبىلىم بەرۋ مەكەمەلەرىن اعىمداعى جوندەۋ جوبالارى جۇزەگە اسىرىلدى. 

كەزدەسۋدە بايقوڭىر قالاسى ارداگەرلەر كەڭەسىنىڭ توراعاسى تابىنباي الماقانوۆ پەن اقاي اۋىلى ارداگەرلەر كەڭەسىنىڭ توراعاسى جاقسىلىق قىپشاقباي ۇلى كوتەرىلگەن ماسەلەلەرگە قاتىستى پىكىر ءبىلدىرىپ، وبلىس اكىمىنە كورسەتىلگەن قۇرمەت ءۇشىن ريزاشىلىعىن جەتكىزدى.

ايتا كەتەيىك، قىزىلوردا قالاسىنا كەلگەن 12 ارداگەر «رۋحاني جاڭعىرۋ» جانە وبلىستىق جاستار رەسۋرستىق ورتالىقتارىنا بارىپ، جۇمىسىمەن تانىستى. سونداي-اق، وبلىستىق ولكەتانۋ مۇراجايىنىڭ جۇمىسىن كوردى.

بۇگىندە وبلىس بويىنشا 75 مىڭنان اسا زەينەتكەر بولسا، ونىڭ 5 مىڭنان استامى بايقوڭىر قالاسى، تورەتام كەنتى مەن اقاي اۋىلىندا تۇرادى.

 

 

سوڭعى جاڭالىقتار

ۇقساس جاڭالىقتار