جيىننىڭ اشىلۋ سالتاناتىندا ءسوز سويلەگەن مادەنيەت جانە سپورت ءمينيسترى اقتوتى رايىمقۇلوۆا الاشتىڭ الىپ تۇلعاسى قاجىمۇقان مۇڭايتپاس ۇلىنىڭ مەرەيتويىن مينيسترلىك رەسپۋبليكالىق دەڭگەيدە اتاپ وتۋگە دايىندالىپ جاتقاندىعىن ايتتى.
– قاجىمۇقان اتامىز – بار عۇمىرىن كۇرەس ونەرىنە ارناپ, كوزى تىرىسىندە اڭىزعا اينالعان ادام. كەي دەرەكتەرگە سەنسەك, بالۋان بابامىز كۇرەستىڭ بىرنەشە تۇرىنەن 54 مەملەكەتتە بەلدەسىپ, 48 مەدال ولجالاعان. سونىمەن قاتار قاجىمۇقان مۇڭايتپاس ۇلى ەل ەسىندە بوز كىلەم تورىندەگى بالۋاندىعىمەن قاتار, دومبىرا شەرتىپ, ءان سالعان سەگىز قىرلى, ءبىر سىرلى ونەرپاز رەتىندە قالعان. باتىر بابامىزدىڭ 150 جىلدىعى وسى جىلى رەسپۋبليكا كولەمىندە اتاپ وتىلەدى. بۇگىن الەمدى الاڭداتقان پاندەمياعا بايلانىستى سالتاناتتى اشىلۋ ءراسىمىن كەڭ كولەمدە اتاپ ءوتۋ مۇمكىن بولماي وتىر. دەسەك تە, بۇعان قاراماستان بابامىزدىڭ 150 جىلدىعى لايىقتى, جوعارى دەڭگەيدە تويلانادى دەپ سەنىممەن ايتا الامىن. قاجىمۇقان مۇڭايتپاس ۇلىنىڭ ەسىمىن ۇلىقتاۋ, ماڭگىلىك ەستە ساقتاۋ ماقساتىندا ارنايى رەسپۋبليكالىق ءىس-شارالار جوسپارى دايىندالدى. بۇگىننەن باستاپ رەسپۋبليكامىزدىڭ بارلىق وڭىرىندە ءتۇرلى ءىس-شارالار وتكىزىلەدى. وسى ءساتتى پايدالانا وتىرىپ, بارشاڭىزدى سوعان ءبىر كىسىدەي اتسالىسۋعا شاقىرامىن», دەدى اقتوتى رايىمقۇلوۆا.
شارا اياسىندا سەرگەي تسىرۋلنيكوۆ, تيمۋر سىپاتاەۆ سەكىلدى ەلىمىزگە تانىمال زور كۇش يەلەرى كوپشىلىككە ءوز ونەرىن كورسەتتى. ءوز كەزەگىندە سەرگەي تسىرۋلنيكوۆ وتكەن عاسىر پالۋاندارىنىڭ مۇراسىن جاڭعىرتۋ ماڭىزدىلىعىنا توقتالدى.
«باستى ماقسات – وسكەلەڭ ۇرپاقتىڭ بويىنا اتا-بابالارىمىز اماناتتاپ كەتكەن قاسيەتتەردى ءسىڭىرۋ. اتا-بابامىزدىڭ بىزگە قالدىرىپ كەتكەن مۇراسىن جاڭعىرتىپ, سونىڭ نەگىزىندە جاستاردى تاربيەلەۋگە بولادى. سونىمەن قاتار ەلىمىزدە بۇقارالىق جانە بالالار مەن جاسوسپىرىمدەر سپورتىنا باسا ءمان بەرۋ ماڭىزدى. سول جەردەن بولاشاق چەمپيوندار شىعادى. مينيسترلىكتىڭ قولداۋىمەن مەن دە وسى باعىتتى دامىتۋدى جوسپارلاپ وتىرمىن», دەدى س.تسىرۋلنيكوۆ.
رەسمي ءىس-شارادان كەيىن اقتوتى رايىمقۇلوۆا ق.مۇڭايتپاسوۆ اتىنداعى وليمپيادا رەزەرۆىنىڭ مامانداندىرىلعان رەسپۋبليكالىق مەكتەپ-ينتەرنات كوللەدجىنىڭ جۇمىسىمەن تانىسىپ, ءبىلىم ورداسىندا ءتالىم الىپ جاتقان سپورتشى جاستارمەن تىلدەستى.
تاريحي دەرەكتەرگە سۇيەنسەك, قاجىمۇقان مۇڭايتپاس ۇلى 1871 جىلعى 7 ساۋىردە اقمولا ۋەزى, سارىتەرەك بولىسىنا قاراستى جادىك دەگەن جەردە دۇنيەگە كەلگەن. دۇنيە ءجۇزىنىڭ چەمپيوندارى يۆان پوددۋبنىي, يۆان شەمياكين, الەكس ابەرگ, يۆان زايكين, گەورگ لۋريح, پول پونس سىندى پالۋاندارمەن كۇرەسكەن.
