تىكەلەي ەفير Facebook جانە Instagram جەلىلەرىنىڭ ۆەدومستۆولىق پاراقشالارىندا كورسەتىلدى. پوليتسەيلەر ينتەرنەت-الاياقتىقتىڭ تۇرلەرىن, جاسالۋ جولدارىن, ولاردىڭ كەڭىنەن پايدالانىلاتىن ايلا-امالدارىن اشكەرەلەپ, حالىققا الاياقتاردىڭ قۇرىعىنا ءتۇسىپ قالماس ءۇشىن نە ىستەۋ كەرەكتىگىن ءتۇسىندىردى. سونىمەن قاتار قاتىسۋشىلاردىڭ سۇراقتارىنا جاۋاپ بەردى.
جىل باسىنان بەرى وڭىرىمىزدەگى بارلىق الاياقتىق قىلمىستاردىڭ سانى 70-كە جەتسە, سونىڭ ىشىندەگى 60-ى ينتەرنەت-الاياقتىق بولىپتى. ءبىزدىڭ: «پوليتسيا تسيفرلى تەحنولوگيالاردى قولدانىپ, ازاماتتارىمىزدى الداۋ ءۇشىن اشىلىپ جاتقان ءبىر كۇندىك سايتتاردى نەگە الدىن الا اشكەرەلەمەيدى. سول ءۇشىن پوليتسيانىڭ ىشىنەن نەگە ارنايى قىزمەت اشپاسقا؟» دەگەن سۇراعىمىزعا بريفينگتە «جەدەل ۋاكىلدەردىڭ تسيفرلى تەحنولوگيالاردى قولدانىپ, قاشىقتىقتان جاسالاتىن الاياقتىقتى اشۋىنا ۇزاق ۋاقىت پەن كوپ كۇش-جىگەر جۇمساۋ قاجەت. دەگەنمەن, ينتەرنەت-افەريستەردى ىزدەۋ, الاياقتىقتىڭ الدىن الۋ جۇمىسى اۋقىمدى تۇردە جۇرگىزىلە بەرەدى» دەگەن جاۋاپ بەرىلدى.
قازىر پەتروپاۆل قالاسى پوليتسيا باسقارماسىنىڭ قىزمەتكەرلەرى قىلمىستىڭ بۇل ءتۇرىنىڭ الدىن الۋ بويىنشا كەڭ اۋقىمدى وپەراتسيانى باستاپ كەتكەن. پب باستىعىنىڭ ورىنباسارى, پودپولكوۆنيك دۋمان سابىرجانوۆتىڭ ايتۋىنا قاراعاندا, اكتسياعا جۇزدەن استام پوليتسەي تارتىلىپتى. ولاردىڭ ءبارى اكىمشىلىك ۋچاسكەلەردەگى اۋلالار مەن كىرەبەرىستەردى ارالاۋدا. ءتارتىپ ساقشىلارى كىرەبەرىستەرگە جادىنامالار جاپسىرىپ جانە تۇرعىندارعا بۋكلەتتەر ۇلەستىرەدى. ال الاياقتىققا قارسى تۇرۋعا ەڭ وسال توپ – زەينەتكەرلەرمەن تۇسىندىرمە جۇمىستارىن جۇرگىزۋدە. «جادىنامالاردىڭ 10 مىڭ داناسى ازىرلەندى, پروفيلاكتيكالىق اكتسيالار بارىسىندا وبلىس ورتالىعىنىڭ بارلىق شاعىن اۋداندارىن قامتۋ جوسپارلانۋدا. سولتۇستىكقازاقستاندىقتاردى الەۋمەتتىك جەلىلەردە جانە مەسسەندجەرلەر چاتتارىندا ينتەرنەت-الاياقتىقتىڭ الدىن الۋ تۋرالى ۇسىنىمدارىمەن بولىسۋگە شاقىرامىز. جاس ازاماتتار كريمينالدىڭ وسى ءتۇرى تۋرالى ەگدە تارتقان تۋىستارى مەن كورشىلەرىن ەسكەرتۋى قاجەت. ينتەرنەت-الاياقتارمەن بايلانىسقان كەزدە شەشىم قابىلداۋعا اسىقپاي, بانككە تەكسەرۋ ءۇشىن قوڭىراۋ سوعۋ, قانداي جاعداي بولسىن, جەكە مالىمەتتەردى ايتپاۋ نە جولداماۋ ماڭىزدى ەكەندىگىن حالىقتىڭ ەسىنە سالۋدامىز», دەيدى دۋمان سابىرجانوۆ.
ارينە, بۇل شارالار الدانعانىنا جۇرتتىڭ ءوزى كىنالى, جەكە دەرەكتەرىن ەشكىمگە ايتپاۋلارى كەرەك ەدى دەپ قاراپ وتىراتىن پوليتسيانىڭ ەسكى تاسىلىنە قاراعاندا تيىمدىرەك بولۋعا ءتيىس.
پەتروپاۆل
