داۆران ارىبجانوۆ 18 جىلدان بەرى دەنساۋلىق ساقتاۋ سالاسىندا ەڭبەك ەتەدى. داۆران تۇرسىنقۇل ۇلى قاتەرلى ىسىككە شالدىققان ناۋقاستارعا ساپالى ەم جاساپ, ولاردىڭ ءومىرىن ۇزارتۋ ءۇشىن رەسەي, اۋستريا, گەرمانيا ەلدەرىندە وقۋدان ءوتىپ, بىلىكتىلىگىن ارتتىرعان. بىلىكتى مامان زاماناۋي ءادىستىڭ كومەگىمەن 12 جىلدان بەرى قاتەرلى ىسىككە شالدىققان ناۋقاستاردى ەمدەپ, وڭ ناتيجەلەرگە قول جەتكىزۋدە.
– ءبىز قازاقستاندا العاش بولىپ تامىر ىشىلىك حيميوتەراپيا جانە حيميوەمبوليزاتسيا ءادىسىن ەنگىزدىك. بۇل ءتاسىل ارقىلى قاتەرلى ىسىكتىڭ تامىرىنا حيميالىق زاتتار 100 پايىز جىبەرىلەدى. ناتيجەسىندە قاتەرلى ىسىكتى ەمدەۋ 20-30 پايىز جاقسارادى. بۇل اۋىر حالدەگى وبىر اۋرۋىنا شالدىققان ناۋقاستاردىڭ ءومىرىن ۇزارتادى. تامىر ىشىلىك حيميوتەراپيا جانە حيميوەمبوليزاتسيا ءادىسى بويىنشا ەم الۋ ءۇشىن شىمكەنتتەگى ونكولوگيالىق ورتالىققا ەلىمىزدىڭ وزگە دە وبلىستارىنان ناۋقاستار كەلەدى. ءتىپتى شەكارا اسىپ, ەم ىزدەپ كەلەتىن ازاماتتار دا بار. مۇنداي وتا ءتۇرى مي, مويىن, باۋىر, ۇيقى بەزى, جاتىر موينى, بۇيرەك, باۋىر ىسىكتەرىنە شالدىققان ناۋقاستارعا جاسالادى, – دەيدى قالالىق ونكولوگيالىق ورتالىقتىڭ حيميوتەراپيا جانە ەندوۆاسكۋليارلى ونكولوگيا ءبولىمىنىڭ مەڭگەرۋشىسى داۆرانبەك ارىبجانوۆ.
بۇگىنگە دەيىن داۆران ارىبجانوۆتىڭ جەتەكشىلىگىمەن بەس مىڭنان اسا ناۋقاسقا وسىنداي وپەراتسيا ءتۇرى جاسالعان. بۇگىندە قالالىق ونكولوگيالىق ورتالىقتاعى بىلىكتى مامانعا سۇرانىس ارتىپ كەلەدى. ەلىمىزدىڭ وزگە وڭىرلەرىنەن بولەك, ءتىپتى, استراحان, ماسكەۋ قالالارى مەن وزبەكستاننان ناۋقاستار كەلىپ, ەم الۋدا.
