فوتو: اشىق دەرەككوز
بۇل تۋرالى بايانداعان ەرسايىن ناعاسپاەۆ اتالعان ناتيجەگە بىرقاتار سالانىڭ سەرپىندى دامۋى ىقپال ەتكەنىن جەتكىزدى. اتاپ ايتقاندا, ماشينا جاساۋ, قۇرىلىس ماتەريالدارىن ءوندىرۋ جانە جەڭىل ونەركاسىپ نەگىزگى درايۆەرلەرگە اينالدى.
يندۋستريالىق وسىممەن قاتار قۇرىلىس سالاسىندا دا وڭ ديناميكا بايقالادى. ءۇش ايدىڭ قورىتىندىسى بويىنشا ورىندالعان قۇرىلىس جۇمىستارىنىڭ كولەمى 1,2 ترلن تەڭگەگە جەتىپ وتىر, بۇل وتكەن جىلدىڭ وسى كەزەڭىمەن سالىستىرعاندا 14,8%-عا جوعارى. سونىمەن بىرگە 3,9 ملن شارشى مەتر تۇرعىن ءۇي پايدالانۋعا بەرىلدى.
«1 توقساننىڭ قورىتىندىسى بويىنشا وڭدەۋشى ونەركاسىپتىڭ نەگىزگى سەكتورلارىندا جيىنتىق كورسەتكىشى 8,5% بولاتىن وڭ ديناميكا بايقالادى. ءوندىرىس كورسەتكىشتەرى ماشينا جاساۋدا, حيميا ونىمدەرىن, قۇرىلىس ماتەريالدارىن, رەزەڭكە جانە پلاستماسسا بۇيىمدارىن وندىرۋدە, جەڭىل ونەركاسىپتە جانە وڭدەۋ ونەركاسىبىنىڭ باسقا دا سالالارىندا ءوستى. ماشينا جاساۋ سالاسىنداعى ءوندىرىس كولەمى كولىك قۇرالدارى, اۋىل شارۋاشىلىعى جانە تەمىرجول تەحنيكاسى ءوندىرىسىنىڭ ءوسۋى ەسەبىنەن 21,9%-عا ۇلعايدى», دەدى ەرسايىن ناعاسپاەۆ.
جالپى, وڭدەۋ ونەركاسىبىندەگى تۇراقتى ءوسىم ەكونوميكانى ارتاراپتاندىرۋعا نەگىز بولىپ, ەلدىڭ وندىرىستىك الەۋەتىن كۇشەيتۋگە ۇلەس قوسىپ وتىر.
ءى توقسانداعى ەكونوميكالىق ءوسىمدى وڭدەۋ, قۇرىلىس, كولىك جانە ساۋدا سالالارى قامتاماسىز ەتتى
