فوتو: ەڭبەك جانە حالىقتى الەۋمەتتىك قورعاۋ مينيسترلىگى
جوبادا ينۆاتاكسي قىزمەتىنە قاتىستى بىرقاتار ماڭىزدى وزگەرىس قاراستىرىلعان. ەڭ الدىمەن, ينۆاتاكسي قىزمەتىن الۋشىلار ساناتى ناقتىلانادى. ول ءۇشىن ارنايى ءتىزىم جاسالىپ, وندا قىزمەتكە قۇقىق بەرەتىن مەديتسينالىق كورسەتكىشتەر ناقتى بەلگىلەنەدى. بۇل قىزمەت الۋشىلاردى انىقتاۋ تۇرعىسىندا بىرىڭعاي ءتاسىل قالىپتاستىرۋعا مۇمكىندىك بەرەدى.
سونىمەن قاتار جەرگىلىكتى اتقارۋشى ورگانداردىڭ وكىلەتتىگى كەڭەيتىلىپ, ينۆاتاكسيمەن ساپار ۇزاقتىعىن ءوز بەتىنشە ايقىنداۋ مۇمكىندىگى بەرىلەدى. مۇنداي شەشىم وڭىرلەردەگى ناقتى قاجەتتىلىكتەردى ەسكەرىپ, رەتتەۋدى يكەمدى جۇرگىزۋگە جول اشادى.
قۇجاتتا 18 جاسقا تولعان مۇگەدەكتىگى بار ازاماتتاردى جەكە كومەكشىلەردىڭ الىپ ءجۇرۋ مۇمكىندىگىن بەكىتۋ دە كوزدەلگەن. بۇل ولاردىڭ كۇندەلىكتى قوزعالىسىن جەڭىلدەتۋگە باعىتتالعان.
اۆتوموبيل كولىگىمەن جولاۋشىلاردى تاسىمالداۋ قاعيدالارى دا جاڭارتىلادى. اتاپ ايتقاندا, قوعامدىق كولىكتىڭ جۇكتەمەسى جوعارى بولعان جاعدايدا بالالار اربالارىن الىپ ءجۇرۋ ءتارتىبى ناقتىلانىپ, اۆتوبۋستارداعى باعىتتىق كورسەتكىشتەردى راسىمدەۋگە قويىلاتىن تالاپتار وزەكتەندىرىلەدى.
كونكۋرستىق راسىمدەردى جەتىلدىرۋ اياسىندا تاسىمالداۋشىلاردى باعالاۋدىڭ جاڭا ولشەمشارتتارى ەنگىزىلەدى. ونىڭ ىشىندە ەلەكترلى جانە گيبريدتى اۆتوبۋستاردى پايدالانۋ ىنتالاندىرىلادى. بۇل قادام جىلجىمالى قۇرامدى جاڭارتۋعا جانە قورشاعان ورتاعا تۇسەتىن جۇكتەمەنى ازايتۋعا باعىتتالعان.
سونداي-اق وڭىرلەردەگى اۆتوۆوكزالداردىڭ اتاۋى مەن ورنالاسقان جەرى ناقتىلانىپ, تەكسەرىلەتىن كولىك ينفراقۇرىلىمى نىساندارىنىڭ ءتىزىمى جاڭارتىلادى.
اتالعان بۇيرىق جوباسى 2026 جىلعى 8 ساۋىردە «اشىق نقا» ينتەرنەت-پورتالىندا جاريالانىپ, كوپشىلىك تالقىلاۋىنا ۇسىنىلدى.
