سۋرەت جي كومەگىمەن جاسالعان
بۇگىندە ەل اۋماعىندا ءاربىر جاڭا سالىنعان كوپقاباتتى تۇرعىن ءۇي پاتەر سانىنىڭ جارتىسىنا تەڭ تۇراقپەن قامتۋ نورماسىمەن مىندەتتەلگەن. الايدا ارقانىڭ اقىراماشىندا دالادا كولىك قويۋدىڭ تيىمسىزدىگىن ەسكەرگەن تۇرعىندار جەراستى پاركينگتەرىنەن ورىن العاندى ءجون سانايدى. ال مۇنداعى 1 بولمەلى پاتەردىڭ قۇنىنا تەلىنگەن تۇراق باعالارىن اركىمنىڭ قالتاسى كوتەرە بەرمەيدى. سوندىقتان تۇرعىندار ويىن الاڭشالارىن جاعالاپ, كولىكتەرىن كورشى اۋلالارعا دا قويىپ كەتۋگە ءماجبۇر. ال بۇل كوپ جاعدايدا اكىمشىلىك قۇقىقبۇزۋشىلىققا الىپ كەلىپ جاتادى.
«قازىر اۋلالارعا كىرىپ-شىعۋ قيىنداپ كەتتى. اسىرەسە, حالىق سانى كوپ الماتىدان باسقا قالالاردا تۇرعىن ۇيلەردىڭ اۋلاسىندا ۇزاق ايالداپ تۇرا المايسىڭ. بەلگىلەنگەن ۋاقىتتان ۇزاق تۇرساڭ, تۇرعىندار تاراپىنان شاعىم ءتۇسىپ, ايىپپۇل ارقالايسىڭ. جەتكىزۋ قىزمەتىمەن اينالىساتىندىقتان مۇنداي ماسەلەگە كوپ تاپ بولامىز», دەيدى كولىك جۇرگىزۋشىسى ءابدىنۇر وتەپبەرگەن.
اۋلالارداعى اۆتوتۇراق جەتىسپەۋشىلىگى تۇرعىندار قاۋىپسىزدىگىنە دە ايتارلىقتاي اسەر ەتىپ وتىر. بۇل, اسىرەسە, توتەنشە جاعدايلاردا ارنايى تەحنيكالاردىڭ جولىن بوگەپ, ءورتتى اۋىزدىقتاۋدا, جەدەل جاردەم قىزمەتىن كورسەتۋدە ايتارلىقتاي قيىندىق تۋدىرادى. مامانداردىڭ سوزىنشە, قىسىلتاياڭ شاقتا مۇنىڭ ءوزى ءبىرشاما ۋاقىتتى الاتىن كورىنەدى.
استاناداعى اۆتوتۇراقتار تولىعىمەن قالا مەنشىگىنە ءوتتى
«مامانداندىرىلعان تەحنيكا جۇرگىزۋشىلەرى تۇرعىن ءۇي اۋلالارىندا كوپتەگەن قيىندىققا تاپ بولادى. ادەتتە, اۋلا جولى تار بولعانى ازداي, سونىمەن قاتار كوبىنەسە جەڭىل كولىكتەرگە دە تولىپ تۇرادى. بۇل جاعدايدا تەك ابايلاپ ءجۇرۋ عانا ماڭىزدى ەمەس. ەگەر ادامداردى قۇتقارۋ نەمەسە ءورت سوندىرگىش زاتتاردى بەرۋ ءۇشىن باسپالداق ۇسىنۋ قاجەت بولسا, وندا اۆتوساتىنى «تابانعا» ورناتۋ كەرەك. ال ولاردىڭ كولەمى 4 مەتردەن اسادى. مىنە, وسىنداي كەزدە تار اۋلادا ورىن تاڭداۋ قيىنعا سوعادى», دەيدى مامانداندىرىلعان ءورت ءسوندىرۋ ءبولىمىنىڭ كولىك جۇرگىزۋشىسى زاڭعار قىرعىزباەۆ.
شەكاراداعى كەزەك ازايادى: وتكىزۋ بەكەتتەرىندە 200 ورىندىق اۆتوتۇراقتار سالىنادى
كوپتى تولعاندىرعان ماسەلە ۇدايى كۇن تارتىبىنەن تۇسپەي 2023 جىلى پرەزيدەنت نازارىنا دا ىلىككەن بولاتىن. ناتيجەسىندە جاڭادان سالىنعان ۇيلەردى اۆتوتۇراقپەن قامتاماسىز ەتۋ مىندەتى جۇكتەلدى. دەگەنمەن قۇرىلىس سالاسىنىڭ ساراپشىلارى قازىردىڭ وزىندە سالىنعان ۇيلەردە تۇراق ورىندارىنىڭ ساقتالۋى ەكىتالاي دەيدى. ويتكەنى ازىرگە مۇنداي ستاندارت استانا مەن الماتى قالالارىندا عانا تولىق ساقتالعان. ولاردىڭ ايتۋىنشا, قۇرىلىس كومپانيالارىنىڭ بارلىعى بىردەي كولىك تۇراعىن ەلەي بەرمەيدى.
«ەلىمىزدە سالىناتىن ۇيلەردىڭ باسىم بولىگى ەكونوم كلاستاعى ۇيلەر. بۇل ۇيلەر ارنايى كەزەككە تۇرىپ, مەملەكەتتىك باعدارلامامەن الىناتىن بولعاندىقتان, ونى الاتىن ادامداردىڭ باسىم بولىگى الەۋمەتتىك جاعدايى تومەن نەمەسە ورتاشا بولعاندىقتان, قۇرىلىس كومپانيالارى كوپ جاعدايدا اقشا ۇنەمدەپ جاتادى. كومپانيالار تۇراق سالعاننان گورى ودان دا سول جەرگە كەڭسە اشىپ, ونى جالعا بەرگەندى دۇرىس كورەدى. ونىڭ ۇستىنە جەراستى پاركينگتەرى تەك كومفورت ساناتتاعى ۇيلەرگە سالىنادى», دەيدى تۇرعىن ءۇي نارىعىنىڭ ساراپشىسى اقادىل جاڭاباەۆ.
ساراپشىنىڭ سوزىنشە, زاڭنامالىق تۇرعىدا ينۆەستورلارعا ناقتى مىندەتتەمەلەر جۇكتەلگەندە عانا ماسەلەنى ايتارلىقتاي ازايتۋعا بولادى.
الماتى اۋەجايىنداعى اۆتوتۇراقتار كەڭەيتىلەدى
«ەۋروپا ەلدەرىندە قالا تۇرعىندارىنىڭ 60 پايىزى كولىك ماسەلەسىن رەتتەسە ماسەلە شەشىلگەن بولىپ ەسەپتەلەدى. قازىرگى تاڭدا بىزدە, ەلوردادا 10 مىڭنان استام اقىلى تۇراقتىڭ ءوزى ازدىق ەتىپ وتىر. سول سەبەپتەن مۇنى تەك قۇرىلىس كومپانيالارىنا اۆتوتۇراق سانىن ارتتىرۋدى مىندەتتەۋ ارقىلى شەشۋگە بولادى», دەيدى ا.جاڭاباەۆ.
ەسكە سالا كەتەيىك, بىلتىر جىل سوڭىندا ەلورداداعى اقىلى تۇراقتاردىڭ بارلىعى كوممۋنالدىق مەنشىككە وتكەن بولاتىن. وسىعان بايلانىستى قالاداعى اۆتوتۇراقتاردىڭ قولدانىستاعى تاريفتەرى قايتا قارالىپ, جول ۋچاسكەسىنە قاراي كولىكتى 15-60 مينۋتتىق تەگىن قويۋ جۇيەسى قاراستىرىلعان ەدى.
نۇربولات امانبەك
