فوتو: ۇكىمەتتىڭ ءباسپاسوز قىزمەتى
وتىرىستا مەملەكەت باسشىسىنىڭ ەكونوميكانىڭ ساپالى ءارى ورنىقتى ءوسىمىن قامتاماسىز ەتۋ جونىندەگى تاپسىرمالارىن ىسكە اسىرۋ بارىسى تالقىلاندى. ۇكىمەت بۇل مىندەتتى وڭدەۋ ونەركاسىبىن دامىتۋ, ينۆەستيتسيالىق بەلسەندىلىكتى ارتتىرۋ جانە وندىرىستەردى تەحنولوگيالىق جاڭعىرتۋ ارقىلى جۇزەگە اسىرىپ وتىر.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا ەكونوميكانىڭ ساپالى ءارى ورنىقتى ءوسىمىن قامتاماسىز ەتۋدى تاپسىردى. بۇل مىندەت وڭدەۋ ونەركاسىبىن دامىتۋ, ينۆەستيتسيالىق بەلسەندىلىكتى ارتتىرۋ جانە وندىرىستەردى تەحنولوگيالىق جاڭعىرتۋ ارقىلى جۇزەگە اسىرىلادى», دەدى ولجاس بەكتەنوۆ.
پرەمەر-مينيستر ەكونوميكالىق ءوسىم قۇرىلىمىنا ەرەكشە نازار اۋدارىپ, سالالاردىڭ ۇلەسى مەن ىشكى ەكونوميكانىڭ تۇراقتىلىعىن اتاپ ءوتتى. ونىڭ ايتۋىنشا, I توقسان قورىتىندىسى بويىنشا ءىجو-ءنىڭ ناقتى ءوسىمى 3% بولدى.
سونداي-اق ءوسىمنىڭ نەگىزگى بولىگى شيكىزاتتىق ەمەس سەكتور ەسەبىنەن قامتاماسىز ەتىلگەنى ايتىلدى. اسىرەسە وڭدەۋ ونەركاسىبى, كولىك, قۇرىلىس جانە ساۋدا سالالارى تۇراقتى ءوسىم كورسەتكەن.
«وسى كەزەڭدە جالپى ىشكى ءونىمنىڭ ناقتى ءوسىمى 3% بولدى. بۇل كورسەتكىش, ەڭ الدىمەن, شيكىزاتتىق ەمەس سەكتورداعى تۇراقتى ءوسىم ەسەبىنەن قالىپتاستى. اتاپ ايتقاندا, وڭدەۋ ونەركاسىبى, كولىك, قۇرىلىس جانە ساۋدا سالالارى وڭ ديناميكا كورسەتتى. سىرتقى ەكونوميكالىق جاعدايدىڭ ناشارلاۋىنا قاراماستان, ءدال وسى شيكىزاتتىق ەمەس سەكتور ءوزىنىڭ تۇراقتىلىعى مەن باسەكەگە قابىلەتتىلىگىن دالەلدەپ وتىر», دەدى ولجاس بەكتەنوۆ.
جالپى, ەكونوميكانى ارتاراپتاندىرۋعا باسىمدىق بەرۋ ەلدىڭ سىرتقى فاكتورلارعا تاۋەلدىلىگىن ازايتىپ, ىشكى نارىقتىڭ تۇراقتىلىعى مەن باسەكەگە قابىلەتتىلىگىن ارتتىرۋعا مۇمكىندىك بەرىپ وتىر.
