اۋا رايىنىڭ قولايسىزدىعىنا بايلانىستى بارلىق كولىك تۇرلەرى ءۇشىن رەسپۋبليكالىق ماڭىزى بار بەس اۆتوجول جانە وبلىستىق ماڭىزى بار بارلىق اۆتوجولدار جابىلعانىمەن جولعا شىعىپ كەتكەندەر كوپ بولعان.
«قوزعالىستى شەكتەۋ كەزەڭىندە توتەنشە جاعدايلار قىزمەتىمەن بىرلەسىپ, قار قۇرساۋىنان 62 ادام مەن 22 تەحنيكا شىعارىلدى», دەيدى سقو پوليتسيا دەپارتامەنتى پاترۋلدىك پوليتسيا باتالونىنىڭ كومانديرى, پوليتسيا پودپولكوۆنيگى ەرلان ماديەۆ.
ماسەلەن, جەكسەنبىگە قاراعان ءتۇنى پاترۋلدىك پوليتسيا باتالونىنىڭ قىزمەتكەرلەرى ءامىرجان توققوجين جانە سەرگەي پولۋيانوۆ مامليۋتكا-قوستاناي اۆتوجولىندا كوكتايعاق جولدان شىعىپ كەتكەن «Lada Kalina» جانە «ۆاز 2110» كولىكتەرىن كورەدى. ءتارتىپ ساقشىلارى جۇرگىزۋشىلەر مەن جولاۋشىلاردىڭ زارداپ شەكپەگەنىنە كوز جەتكىزىپ, «قازاۆتوجول» جشس جول-پايدالانۋ ۋچاسكەسىنىڭ شەبەرى ۆيكتور شۋلەپوۆكە ايتىپ, ول جەڭىل كولىكتى تىركەمەگە الۋ ءۇشىن «زيل-131» اۋىر جۇك كولىگىن جىبەرەدى.
ءسويتىپ, ەكى كولىك تە جولعا شىعارىلدى.
سولتۇستىك قازاقستان وبلىسى
