اكىمدىكتىڭ جۇمىستى جاقسى جۇرگىزىپ جاتقانىن قالا تۇرعىندارى كۇندەلىكتى ومىردە ءوز كوزدەرىمەن كورىپ ءجۇر. مىسالى, قالانى اباتتاندىرۋ, جارىقتاندىرۋ جانە جولداردى جوندەۋ جۇمىستارى ۇنەمى العا باسىپ كەلە جاتقانى كوزگە بىردەن تۇسەدى. قازىر پەتروپاۆلدىڭ كوشەلەرى تۇنگى مەزگىلدىڭ وزىندە سامالاداي جارقىراپ تۇرادى. وسىنىڭ ءوزى تۇرعىنداردىڭ كوڭىل-كۇيىن كوتەرىپ تۇراتىنى بەلگىلى.
بولات جۇمابەكوۆتىڭ بايانداماسىندا بىلتىرعى جامان ىندەتتىڭ كەدەرگى جاساۋىنا قاراماي 40 تۇرعىن ءۇي سالىنعان, ونىڭ 26 بيۋدجەت قاراجاتىنىڭ, 14 جەكەمەنشىك كاپيتالدىڭ كۇشىمەن سالىنعانى ايتىلدى. بۇل 183,5 مىڭ شارشى شاقىرىم تۇرعىن ءۇي پايدالانۋعا بەرىلدى دەگەن ءسوز. تۇرعىن ۇيلەر قالانىڭ «جاس وركەن», «بەرەكە» سياقتى مولتەك اۋداندارىندا جانە ش.ءۋاليحانوۆ كوشەلەرىنىڭ بويىندا سالىنۋدا. مۇنداعى جاڭا ۇيلەردىڭ اراسىنا تۇرعىنداردىڭ تىنىستايتىن ورىندارى, بالالاردىڭ ويىن الاڭدارى دا قاتار تۇرعىزىلۋدا. 95 ۇيلەردىڭ اۋلالارى اباتتاندىرىلعان.
بىلتىر پەتروپاۆلدىڭ ەكونوميكاسىنا جالپى سوماسى 98 ملرد. تەڭگەنىڭ ينۆەستيتسياسى قۇيىلعان. بۇل 2019-بەن سالىستىرعاندا 28,4% ارتىق. ونەركاسىپ وندىرىستەرى الدىڭعى قاتاردا ەڭبەك ەتىپ كەلە جاتقان «رادۋگا» جشس – 1,5, «پەتروماشزاۆودتا» – 2, «زيكستو»-دا 5 ەسە ارتقان. ال كيروۆ اتىنداعى زاۋىتتا زاماناۋي كوميۋتەرلەر, پلانشەتتەر شىعارىلا باستادى. وتكەن جىلدىڭ سوڭىنا قاراي ولاردىڭ 54 مىڭ داناسى قۇراستىرىلعان. ال بيىل پەتروپاۆلدا يندۋستريالىق-يننوۆاتسيالىق دامۋ باعدارلاماسى اياسىندا 3 اۋقىمدى جوبا ىسكە اسىرىلماق. بۇل ماقساتقا 5,3 ملرد تەڭگە قاراستىرىلىپ وتىر. ناتيجەسىندە, 300-دەن استام ادام جۇمىسپەن قامتىلادى. وبلىس ورتالىعىن اباتتاندىرۋ جۇمىستارى الداعى ۋاقىتتا دا جالعاسىن تابادى. جاڭا سپورت جانە بالالار ويىن الاڭدارى سالىنىپ, اۋلالارعا اسفالت توسەلمەك.
ارينە, جۇمىستىڭ ءبارى مايدان قىل سۋىرعانداي جايلى ءجۇرىپ جاتقان جوق. ەسەپتى تىڭداۋعا قاتىسىپ وتىرعان وبلىس اكىمى قۇمار اقساقالوۆ بىلتىر قالانىڭ قوعامدىق كولىگى ءۇشىن 100 جاڭا اۆتوبۋسقا اقشا بولىنگەندىگىن, الايدا بۇگىنگە دەيىن سونىڭ 7-ەۋى عانا كەلىپ تۇسكەنىن قاتتى سىنادى. بۇل وبلىستىڭ كولىك باسقارماسىنىڭ عانا ەمەس قالا اكىمدىگىنىڭ دە جۇمىسىنىڭ شالالىعى دەپ ول اتاپ كورسەتتى.
سونىمەن بىرگە مەديتسينالىق كادرلاردىڭ تاپشىلىعى دا ءالى كۇنگە جويىلماعان. ماسەلەن, ءۇشىنشى قالالىق ەمحانادا ءالى التى مامان جەتىسپەيدى ەكەن. ونىڭ ىشىندە وفتالمولوگ, ەندوكرينولوگ, بالالار تراۆماتولوگى, لور, ۋدز مامانى جەتىسپەيدى.
قالا اكىمى تۇرعىنداردان الەۋمەتتىك جەلىلەر ارقىلى كەلىپ تۇسكەن جۇزدەگەن سۇراقتارعا دا جاۋاپ بەردى. نەگىزىنەن جەكەمەنشىك ۇيلەر يەلەرىنەن تۇسكەن بۇل سۇراقتاردىڭ ءبارى دە جۇيەلى جۇمىس بارىسىندا شەشىلەتىندەر ەكەندىگى كورىنىپ تۇر. ماسەلەن, اۋلالاردىڭ اسفالتتاندىرىلۋى, تۇنگى جارىقتاردىڭ بولماۋى, اۆتوبۋس ايالداماسىنىڭ ۇزارتىلۋى جانە ت.ب. اكىم ولاردىڭ بارىنە دە تىڭعىلىقتى جاۋاپ بەردى.
