2020 جىلدىڭ قورىتىندىسى بويىنشا 16 جىلدىق وتىلىمەن قىزىلجار اۋدانى پب انىقتاۋشىسى كۇلميرا جارمۇقانوۆا «ۇزدىك انىقتاۋشى» بولىپ, پەتروپاۆل قالاسىنداعى ەكىنشى پوليتسيا بولىمىندە ەكىنشى جىل قىزمەت اتقارىپ جۇرگەن ۇمىتبەك فارحادوۆ «ۇزدىك تەرگەۋشى» دەپ تانىلدى. گراموتالاردى وبلىستىڭ باس پوليتسەيى, پوليتسيا پولكوۆنيگى مارات تولەباەۆ تابىستادى.
بۇل ەكى ماماندىقتىڭ يەلەرى دە سوتقا دەيىنگى تەرگەۋدى جۇزەگە اسىرادى. سونىڭ ىشىندە تەرگەۋ ءبولىنىسى قىلمىستىڭ تەك اۋىر تۇرلەرىمەن اينالىسادى, ايىرماشىلىعى سول عانا. كۇلميرانىڭ ەڭ سوڭعى ىستەرىنىڭ ءبىرى اليمەنت تولەۋدەن جالتارۋمەن بايلانىستى بولدى. اۋدان تۇرعىنى سوڭعى جىلدارى بالاسىنا كومەك بەرۋدەن جالتارىپ, ەش جەردە جۇمىس ىستەمەگەن. «ونىڭ تابىس كوزى بار ەكەندىگىن دالەلدەۋ ءۇشىن كۇش-قۋات جۇمساۋ قاجەت بولدى. كۇلميرا ءبىر جىلدا 60 استام ءىستى تەرگەگەن. ءبىزدىڭ جۇمىسىمىزدا ادىلەتتىلىككە قول جەتكىزۋ ءۇشىن بارىنشا كۇش جۇمساۋىمىز قاجەت», - دەيدى پوليتسيا مايورى جارمۇقانوۆا.
پوليتسيانىڭ اعا لەيتەنانتى ءۇ.فارحادوۆ: «جۇمىسىم وزىمە ۇناعاسىن قيىندىقتارعا ءمان بەرمەيمىن. مەنىڭ جەتىستىگىم – كاسىپ تاڭداعان كەزدە تۇسىنىستىك بىلدىرگەن, ۇنەمى قولداپ جۇرەتىن اتا-انامنىڭ جانە دە ەكىنشى پوليتسيا ءبولىمى باستىعىنىڭ ورىنباسارى, پوليتسيا مايورى گۇلميرا ساعيتوۆانىڭ ەڭبەگى. ول تەرگەۋگە جەتەكشىلىك ەتىپ, جاس قىزمەتكەرلەرگە كاسىبي داعدىلارىن دامىتۋعا كومەكتەستى», دەيدى ول. ونىڭ سوڭعى تەرگەگەن ءىسى – توپ بولىپ زورلىق-زومبىلىق كورسەتۋمەن توناۋعا بايلانىستى بولدى. سوتقا دەيىنگى تەرگەۋ 12-اق كۇنگە سوزىلدى. ناتيجەسىندە ماتەريالدار سوتقا تاپسىرىلىپ, ايىپتالۋشىلاردىڭ بارلىعى جازاعا تارتىلدى. جالپى, وتكەن جىلى فارحادوۆ 95 قىلمىستىق ءىستى تەرگەدى.
سولتۇستىك قازاقستان وبلىسى
