بۇل ەلدەگى جاعداي ءالى دە تۇراقسىز. حالىق پرەزيدەنت جاير بولسونارۋدىڭ ۆيرۋسپەن كۇرەس ارەكەتتەرىنە كوڭىلى تولماي, نارازىلىققا شىعۋدى جالعاستىرۋدا.
ۆاكتسينا ەلگە برازيليا ۇكىمەتى مەن AstraZeneca اراسىنداعى كەلىسىمگە ساي جەتكىزىلگەن. وسىعان ساي برازيليا ءوز ەلىندە 100 ملن دوزاعا دەيىن ۆاكتسينا ءوندىرۋدى جوسپارلاعان ەدى.
جاير بولسونارو ءۇندىستان پرەمەر-ءمينيسترى نارەندرا موديگە حات جىبەرگەننەن كەيىن, AstraZeneca برازيلياعا ەكى ميلليون دايىن دوزانى جەتكىزۋگە كەلىسكەن.
جالپى, ىندەتتىڭ قاۋپىن ءوز دەڭگەيىندە قابىلداماعان ەل پرەزيدەنتى ۆاكتسينا ءوندىرىسى مەن ەلدەگى COVID-19 ىندەتىنىڭ ورشۋىنە جول بەرگەنى ءۇشىن سىنعا قالعان. Johns Hopkins ۋنيۆەرسيتەتىنىڭ مالىمەتىنە سايكەس, برازيليا كوروناۆيرۋستان قايتىس بولعاندار سانى بويىنشا الەمدە ەكىنشى ورىندا تۇر. ەلدە 215 مىڭنان استام ناۋقاستىڭ ءومىرى قيىلعان. ال وڭىرلەردەگى اۋرۋحانالاردا ورىن جەتپەي, وتتەگى مەن وزگە دە مەديتسينالىق قۇرىلعىلار تاپشى بولعان.
ەل پرەزيدەنتىنىڭ ارەكەتتەرىن سىنعا الىپ, اكىمشىلىكتىڭ شەشىمدەرىن ءتيىمسىز دەۋشىلەردىڭ قاتارى كۇن ساناپ ارتىپ كەلەدى. وتكەن سەنبىدە ۇكىمەتتىڭ پاندەمياعا قارسى ارەكەتىنە نارازى مىڭداعان ادام برازيليانىڭ بىرنەشە قالاسىندا نارازىلىققا شىقتى.
