انەۋگۇنى الەۋمەتتىك جەلىلەردە كەڭىنەن تاراعان قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆتىڭ اڭ-قۇستاردىڭ ت ۇلىپتارىنا تولى كەڭسەسىنىڭ فوتوسۋرەتى كوپشىلىكتىڭ نازارىن اۋداردى. بۇل جايت وقۋ ورنى باسشىسىمەن بىرگە تۇسكەن سۋرەتىن الەۋمەتتىك جەلىگە جۇكتەگەن سپورتشى جانقوش تۇراروۆتىڭ پاراقشاسىنان تاراعان بولاتىن. شاماسى, جاس سپورتشى دا, سىنعا ىلىككەن سپورت جانە تۋريزم اكادەمياسىنىڭ جەتەكشىسى دە وقيعانىڭ سوڭى بۇلاي بەلەڭ الاتىنىن اڭداماي قالسا كەرەك. جەلى قولدانۋشىلارى, اسىرەسە «قىزىل كىتاپقا» ەنگەن قار بارىسىنىڭ تەرىسىنە بايلانىستى ءتيىستى ۆەدومستۆونىڭ تۇسىندىرمە بەرۋىن تالاپ ەتتى.
ال اتالعان كەلەڭسىز كورىنىسكە قاتىستى اقپارات قۇرالدارىنا اشىق سۇحبات بەرگەن ق.زاكيريانوۆ بۇل بارىستىڭ شىنايى تەرىسى ەمەس, بار بولعانى بەدەرىن ءدال بەرگەن جاساندى دۇنيە ەكەنىن ايتىپ اقتالدى. سونداي-اق ول الماتى قالاسىنداعى كەڭسەدە تۇرعان كوز جاۋىن الاتىن قىمبات اڭ تەرىلەرى مەن ت ۇلىپتارىنىڭ ءوزى زاڭدى نەگىزدە اڭشىلىقتان تۇسكەن ولجالارى ەكەنىن جەتكىزدى. ونىڭ ايتۋىنشا, قار بارىسىنىڭ جاساندى تەرىسىن تۋعان كۇنىنە سىيلاعان كورىنەدى. ال قار بارىسىنىڭ قاسىندا تۇرعان سىلەۋسىن دە سىيعا تارتىلعان ەكەن. دەسە دە اكادەميا باسشىسى سىلەۋسىننىڭ «قىزىل كىتاپقا» كىرمەيتىن جىرتقىش ەكەنىن ايتادى. بۇدان وزگە ونىڭ كوللەكتسياسىندا 30 شاقتى اڭ ت ۇلىپتارى ءار قۇرلىقتان جينالعان, سونىڭ ىشىندە افريكا, اۋستراليا مەن جاڭا زەلانديادان اۋلانعان ەكەن. ماسەلەن, ءۇش جىل بۇرىن وڭتۇستىك افريكا رەسپۋبليكاسىنىڭ ۇكىمەتىنەن ساتىپ العان ليتسەنزيا بويىنشا ارىستاندى اتىپ العانىن ماقتانىشپەن ايتادى. ءتىپتى اڭقۇمار وتانداسىمىز افريكالىقتاردىڭ وسى ارقىلى اقشا تاۋىپ وتىرعانىن, الايدا زاڭ بويىنشا اتالىعىن عانا اتۋعا رۇقسات بەرەتىنىن تاپتىشتەپ تۇسىندىرەدى. ياعني بۇل اڭدار ايتەۋىر ءبىر كۇنى ءوز اجالىنان ولەدى, ايتپەسە باسقا ءبىر جىرتقىشتىڭ جەمى بولادى. سوندىقتان بۇل ارەكەتىن قاتىگەزدىككە بالامايتىنىن جەتكىزەدى. اڭشىلىق قۇمارلىعىن فيلوسوفيامەن استاستىرعان ونىڭ تاعى ءبىر ءۋاجى – ت ۇلىپتار مەن تەرىلەردىڭ ءوز مەنشىگىندە ەمەس, اكادەميا يەلىگىنە جاتاتىنى. ياعني ديرەكتورلار كەڭەسىنىڭ ارنايى شەشىمىمەن اكادەميانى ناسيحاتتاۋ ماقساتىندا, تالاپكەرلەر تارتۋ ورايىندا قاراجات بولىنەتىنىن, ال ءوزى – تەك ورىنداۋشى عانا كورىنەدى. «ماسەلەن, شارتتى تۇردە بيىل زوومۋزەيگە ارنالعان جادىگەرلەردى تولىقتىرۋ ءۇشىن 10 ملن تەڭگە بولۋگە ديرەكتورلار كەڭەسى شەشىم شىعارادى, وسى ىسپەن مەن شۇعىلدانامىن», دەيدى ق.زاكيريانوۆ.
بۇل ولجانىڭ بارلىعى كاسىبي باعدارلاۋ نەگىزىندە الىنعانىن العا تارتقان اكادەميا باسشىسىنىڭ ايتۋىنشا, ءاربىر ۋنيۆەرسيتەتتىڭ ءوزىنىڭ برەندى, ءحوببيى بولعاندىقتان, سپورت جانە تۋريزم اكادەمياسىنىڭ كوزدەگەن ماقسات-مۇراتى دا جابايى تابيعاتقا, قورشاعان ورتاعا, تۋريزمگە نازار اۋدارتۋ. ال قارۋ-جاراققا قاتىستى كەز كەلگەن تەكسەرۋ ورگانىنىڭ وكىلى كەلسە دە رۇقساتناما قۇجاتتارى ءازىر ەكەنىن, ءبارى زاڭدى ەكەنىن ايتادى.
بۇل رەتتە ەكولوگيا, گەولوگيا جانە تابيعي رەسۋرستار مينيسترلىگىنىڭ ءباسپاسوز حاتشىسى سامال يبراەۆا ۆەدومستۆوعا قاراستى ورمان شارۋاشىلىعى جانە جانۋارلار دۇنيەسى كوميتەتىنىڭ الماتى وبلىسى بويىنشا اۋماقتىق ينسپەكتسياسىنىڭ وتە سيرەك كەزدەسەتىن جانە جوعالىپ كەتۋ قاۋپى بار قار بارىسىنىڭ تەرىسى بەلگىلەرى بويىنشا جوعارىدا ايتىلعان ايعاققا قۇقىق قورعاۋ ورگاندارىنان تەكسەرۋ جۇرگىزۋدى سۇراعانىن حابارلادى.
«تۇلكى تۇگىنەن جازادى» دەگەندەي, باعالى اڭ تەرىلەرىنە اۋەستىك بۇرىننان بار. دەگەنمەن تابيعاتتى قورعاۋ بويىنشا قۇرىلعان قوعامدىق قوزعالىستار بۇل قاعيداتتى وزگەرتۋگە كۇش سالىپ كەلە جاتقانى ايان. ايتپەسە توقسانىنشى جىلداردا ايۋ مەن قاسقىر سياقتى اڭ تەرىلەرى قازاقستاندىقتار اراسىندا دا سانگە اينالعانى بەلگىلى. بۇگىنگى تاڭدا بۇل ۇردىسكە قارسىلىق بىلدىرۋشىلەردىڭ قاتارى كوبەيىپ كەلە جاتقانى قۋانتادى. قولدا بار التىننىڭ قادىرىن بىلگەن ابزال. اسىرەسە قورشاعان ورتانىڭ بولىنبەس بولشەگى – ءتىرى جان يەسىنە... ال قازاق سپورت جانە تۋريزم اكادەمياسىنداعى تاكسيدەرميا ۇلگىلەرىنىڭ زاڭدىلىعى الداعى ۋاقىتتا انىقتالادى.
